Wei for Iusim Microphone

OLKETA Christian brata and sista bilong iumi spendem planti taem and strong for attendim olketa Christian meeting. Olketa mas herem toktok klia sapos olketa bae kasem gud samting from datwan.

Long taem bilong Israel bifor, olketa no garem electric saond system. Taem Moses hem toktok long nation bilong Israel long Level Ples bilong Moab bifor olketa go insaed long Promis Land, hao nao evriwan long audience, wea planti million, fit for herem hem? Maet Moses iusim olketa man for talem narawan samting wea hem talem, then olketa man wea standap long olketa difren ples midol long olketa pipol insaed datfala camp pasim go toktok bilong hem. (Deut. 1:1; 31:1) No longtaem bihaen olketa Israelite start for winim datfala land long west saed bilong Jordan river, Joshua hipimap datfala nation front long Maunt Gerizim and Maunt Ebal, and luk olsem olketa Levite stap long valley midol long tufala maunten hia. Long there olketa pipol herem and acceptim olketa blessing and olketa trabol from God wea Joshua readim. (Josh. 8:33-35) Maet long datfala taem tu olketa iusim olketa man for pasim go olketa toktok hia, bat wei wea hem isi for herem samting long datfala area hem helpem diswan tu.

Samting olsem 1,500 year bihaen, taem “wanfala barava bigfala sekson hipap” long Sea bilong Galilee for lisin long Jesus, hem go insaed wanfala boat, padol go aot lelebet, and hem sidaon for story long olketa. (Mark 4:1, 2) Why nao Jesus hem toktok kam from insaed wanfala boat? Luk olsem hem bikos voice bilong man savve here klia tumas taem hem story ovarem smooth wata.

Kam kasem start bilong mek-20 century, haomas samting wanfala man long audience savve herem, hem planti taem depend long wei wea voice bilong speaker hem big or klia. Bat start long olketa year bilong 1920, olketa servant bilong Jehovah start for iusim olketa electric saond system for herem voice bilong man long olketa convention.

Olketa Saond System. Saond system olsem savve mekem voice bilong speaker barava moa big and long semtaem keepim gudfala saond long voice bilong hem. Diswan no putim hevi long voice bilong speaker. Hem no hard tumas for olketa wea lisin for herem wanem hem talem. Olketa savve tingim nomoa datfala message.

Olketa duim bigfala waka for mek sure gudfala saond system hem stap for iusim long olketa convention and assembly bilong Olketa Jehovah’s Witness. And tu, planti Kingdom Hall iusim saond system for mekem voice bilong olketa wea givim tok, conductim meeting, or read from platform moa big. And samfala kongregeson garem tu olketa microphone wea audience iusim taem olketa givim koment long meeting. Sapos kongregeson bilong iu garem saond, lane for iusim gud.

Samfala Main Instruction. For iusim saond system long stretfala wei, tingim olketa samting hia: (1) Microphone mas samting olsem ten go kasem fiftin centimeter from mouth bilong iu. Sapos microphone hem klosap tumas, toktok bilong iu bae no klia. Sapos hem farawe tumas, bae audience hard for herem. (2) Microphone shud stap front long iu, no long saed. Sapos iu muvim hed bilong iu long raet saed or left saed, toktok nomoa taem feis bilong iu point go long microphone. (3) Tok long wei wea lelebet moa big and strong winim wei wea iu story long man wanwan. Bat no need for singaot. Saond system bae mekem hem isi for evriwan long audience for herem iu. (4) Sapos iu need for kof or sneeze, mek sure iu tanem hed bilong iu awe from datfala microphone.

Taem Iu Givim Tok. Taem iu kam long speaker stand, wanfala brata bae stretem microphone. Taem hem duim datwan, standap gud and feis go long audience. Putim olketa note bilong iu long speaker stand, and mek sure microphone no blokem olketa note.

Taem iu start for story, lisin long saond bilong voice bilong iu long saond system. Waswe, hem big tumas, or samfala word here olsem samting hem bosta? Iu maet need for muv bak samting olsem faevfala centimeter. Taem iu luk kwiktaem long note bilong iu, remember iu shud toktok and read taem iu feis go long microphone nomoa or lelebet antap long hem, no anda long hem.

Taem Iu Read Long Platform. Best wei nao hem for holem ap Bible or nara pablikeson mekem iu feis go long audience. Bikos klosap evritaem datfala microphone bae stap barava front long iu, iu maet need for holem samting wea iu readim long wansaed lelebet. Diswan minim hed bilong iu mas lelebet long narasaed long microphone. Then taem iu read, voice bilong iu bae go stret long microphone.

Planti brata wea read long Wastaoa Study standap and read long wanfala microphone. Diswan mekem olketa savve isi for tekwind and for read witim moa feeling. Hem gud for remember hao wei for readim olketa paragraf hem wanfala main part bilong datfala meeting. Wei wea audience kasem gud samting hem depend, long bigfala wei, long wei for herem reading bilong datfala information.

Taem Iu Givim Koment Long Meeting. Sapos kongregeson bilong iu iusim olketa microphone taem audience tekpart, no forget hem important for story klia and witim big wea fitim. Taem iu givim koment, trae for holem study pablikeson or Bible long hand bilong iu. Diswan bae mekem iu fit for lukim klia datfala information taem iu toktok long microphone.

Long samfala kongregeson olketa brata kasem assignment for tekem go olketa microphone long olketa wea givim koment. Sapos hem olsem long kongregeson bilong iu, taem iu bae koment, apim hand bilong iu long wei for mekem brata wea holem microphone hem lukim wea nao iu sidaon and hem savve kam long iu kwiktaem. Sapos hem microphone wea iu savve holem, stanbae for tekem. No givim koment bilong iu bifor iu holem long stretfala wei. Taem iu finisim koment, kwiktaem givim bak microphone long datfala brata.

Taem Iu Insaed Wanfala Demonstration. For iusim microphone long wanfala demonstration needim spesol wei for prepare. Sapos microphone hem long wanfala stand, tufala hand bilong iu bae free for holem Bible and olketa note bilong iu. For iusim wanfala microphone wea iu holem maet mekem iu free for muv, bat iu maet needim narawan wea stap witim iu for holem. Long wei olsem hand bilong iu bae free for holem Bible. Iu and haosholder bilong iu shud practicem diswan mekem hem savve hao for holem stret. Remember tu hao, taem iu long platform, iu mas no tanem baksaed bilong iu long audience, especially taem iu story.

Long olketa demonstration long Service Meeting, samfala difren man maet tekpart, and olketa maet muv raon long platform. So, diswan maet needim planti microphone. Olketa shud stap redy long platform or olketa wea tekpart shud tekem go long platform. For mek sure olketa microphone stap redy long stretfala ples needim gudfala plan firstaem. For practicem olketa demonstration bifor olketa duim hem givim chance for givim instruction long olketa wea tekpart long stretfala wei for iusim olketa microphone. Taem iu no savve practicem long platform, hem maet wise for olketa wea tekpart for holem smol samting wea olsem size bilong wanfala microphone mekem olketa practicem stretfala wei for holem. Bihaen datfala demonstration, olketa wea tekpart shud careful for putim microphone long ples bilong hem, and careful for no foldaon long olketa wire bilong nara microphone taem olketa lusim platform.

For iumi lukluk gud long wei wea iumi iusim olketa microphone hem barava join witim wanfala main goal bilong olketa meeting bilong iumi, hem nao, for givim gud samting long narawan taem iumi storyim Word bilong God. (Heb. 10:24, 25) Taem iumi lane for iusim olketa microphone long gudfala wei, iumi wanwan help for kasem disfala important goal.