Bible Buk Namba 31​—Obadiah

Man wea Raetem: Obadiah

Taem Hem Finis Raetem: c. 607 B.C.E.

INSAED 21 verse nomoa, Obadiah, buk wea short winim evri nara buk insaed Hebrew Scripture, hem talemaot wanfala judgment bilong God wea kosim end bilong wanfala nation, and semtaem talem profesi abaotem win bilong Kingdom bilong God. Hem start witim disfala toktok: “Datfala vision bilong Obadiah.” Wanem taem and wanem year hem born, wanem tribe hem kam from, olketa information olsem abaotem laef bilong hem—buk no storyim. Hem klia, information abaotem disfala profet hem no important samting; message nao important, and diswan fitim from olsem Obadiah seleva hem talemaot, hem ‘wanfala report from Jehovah.’

² Main part bilong report hia hem abaotem Edom. Land bilong Edom, wea pipol kolem tu Maunt Seir, hem start long south bilong Dead Sea and kam followim Arabah, and hem ples bilong olketa hae maunten witim olketa barava steep ples. Long samfala ples, hae bilong olketa maunten long east bilong Arabah kasem 1,700 meter. Long bifor, pipol savve long distrik bilong Teman for wisdom and fasin for no fraet bilong pipol bilong hem. From land bilong Edom hem olsem, wea olsem natural protection, pipol bilong hem feel sef and praod.a

³ Pipol bilong Edom kam from laen bilong Esau, brata bilong Jacob. Nem bilong Jacob hem change for kamap Israel, so pipol bilong Edom olketa klos relative bilong olketa Israelite; diswan barava klos dastawe olketa kolem olketa, ‘olketa brata.’ (Deut. 23:7) Nomata olsem, Edom barava nating olsem brata. No longtaem bifor olketa Israelite go insaed Promis Land, Moses sendem message go long king bilong Edom for ask for pas thru long land bilong hem, bat long wei wea showimaot heit, pipol bilong Edom les for letem and saportim diswan taem army bilong olketa go for stopem olketa. (Num. 20:14-21) Nomata David rul ovarem olketa, bihaen, olketa join witim Ammon and Moab for againstim Judah long taem bilong Jehoshaphat, faetem son bilong King Jehoshaphat, Jehoram, tekem olketa Israelite prisoner from Gaza and Tyre, and attakim Judah long taem bilong King Ahaz and tekem staka moa olsem prisoner.—2 Chron. 20:1, 2, 22, 23; 2 Ki. 8:20-22; Amos 1:6, 9; 2 Chron. 28:17.

⁴ Disfala raf wei barava showaot big long 607 B.C.E. taem army bilong Babylon finisim Jerusalem. Olketa bilong Edom no hapi long diswan nomoa, bat encouragem olketa wea attak hia for spoelem evribit. “Finisim evribit! Finisim evribit go kasem faondeson bilong hem!” olketa singaot olsem. (Ps. 137:7) Taem olketa gambol for olketa samting olketa tekem from Jerusalem, olketa bilong Edom tu share long diswan; and taem olketa Jew trae ranawe from datfala land, olketa hia blokem road and givim olketa go long enemy. Luk olsem disfala raf wei long taem wea Jerusalem distroe nao hem reason for disfala strongfala toktok wea Obadiah recordim, and hem raetem long taem wea olketa nogud samting wea Edom duim hia hem klia yet long mind. (Obad. 11, 14) From Nebuchadnezzar win ovarem and tekova long Edom insaed tu-thri year bihaen Jerusalem distroe, Obadiah mas raetem disfala buk bifor datfala taem; luk olsem 607 B.C.E. nao stretfala date.

⁵ Profesi bilong Obadiah againstim Edom fulfill evribit! Gogo for end bilong profesi bilong hem, datfala profesi hem sei: “Haos bilong Esau [mas kamap] olsem drae grass; and olketa mas bonem olketa and finisim olketa. And no eniwan long haos bilong Esau bae stap laef; bikos Jehovah seleva nao talem diswan.” (Vs. 18) Edom hem iusim sword and dae from sword, and no eni laen pikinini bilong hem stap moa. So diswan pruvim hao man fit for trustim disfala record and hem tru. Obadiah garem evri mark bilong trufala profet: Hem tokaot long nem bilong Jehovah, profesi bilong hem honorim Jehovah, and hem fulfill olsem history hem pruvim. Dastawe nem bilong hem wea garem mining “Servant bilong Jehovah” hem barava fitim.

WEI WEA HEM HELPEM IUMI

¹⁰ For strongim hao disfala judgment againstim Edom bae sure for fulfill, Jehovah mekem olketa nara profet tu for talem semkaen judgment. Olketa main wan nao Joel 3:19; Amos 1:11, 12; Isaiah 34:5-7; Jeremiah 49:7-22; Ezekiel 25:12-14; 35:2-15. Olketa first profesi story abaotem olketa raf samting Edom duim bifor, bat olketa profesi bihaen hem olketa judgment toktok bilong panis bilong Edom for olketa rong bilong hem wea bae nating kasem forgiveness, wea Obadiah storyim, long taem Babylon tekem Jerusalem. Sapos iumi lukluk long hao olketa profesi abaotem olketa trabol wea kasem Edom hem fulfill, diswan bae strongim faith long paoa bilong Jehovah for talem profesi. And tu, hem bae buildim trust long Jehovah olsem God wea evritaem fulfillim purpose wea hem talem.—Isa. 46:9-11.

¹¹ Obadiah profesi hao “olketa man wea insaed covenant witim” Edom, olketa “wea stap long peace witim” hem, bae olketa wea bae win againstim hem. (Obad. 7) Peace midolwan Babylon and Edom no stap olowe. Insaed mek-six century B.C.E., army bilong Babylon anda long King Nabonidus winim Edom.b Nomata olsem, wan handred year bihaen Nabonidus winim datfala land, Edom wea feel sure still laek for kamap strong moa, wea Malachi 1:4 report olsem abaotem hem: “Bikos Edom go ahed for sei, ‘Mifala pisis nao, bat mifala bae kam bak moa and buildim olketa ples wea finis,’ diswan nao samting wea Jehovah bilong olketa army hem talem, ‘Olketa, for saed bilong olketa, bae build; bat mi, for saed bilong mi, bae brekem daon.’” Nomata Edom trae hard for kamap gud moa, pipol bilong Nabataea kamap big long datfala land long mek-foa century B.C.E. Bihaen olketa raosem olketa aot from land, pipol bilong Edom go stap long south part bilong Judea, wea gogo olketa nemem Idumea. Olketa nating winim bak land bilong Seir.

¹² Josephus hem sei long mek-tu century B.C.E., olketa forcem pipol bilong Edom wea laef yet for stap anda long Jew king John Hyrcanus I, forcem olketa for circumcise, and gogo joinim olketa Jew anda long wanfala Jew governor. Bihaen long taem wea Rome distroem Jerusalem long 70 C.E., nem bilong olketa lus from history.c Hem olsem Obadiah profesi abaotem finis: “Iu mas finis evribit for olowe. . . . And no eniwan long haos bilong Esau bae stap laef.”—Obad. 10, 18.

¹³ Long wei wea difren from distroe bilong Edom, olketa Jew kasem bak hom kantri bilong olketa long 537 B.C.E. anda long lead bilong governor Zerubbabel, and olketa buildim bak moa temple long Jerusalem and kamap big long datfala land.

¹⁴ Hem barava klia hao praod and bighed fasin savve lead go long trabol! Evriwan wea praod for apim seleva and hapi long nogud samting wea kasem olketa servant bilong God mas kasem warning from samting wea happen long Edom. Olketa mas luksavve, olsem Obadiah duim, hao “wei for rul mas kamap bilong Jehovah.” Olketa wea faet againstim Jehovah and pipol bilong hem bae finis for olowe, bat nambawan rul bilong Jehovah and rul bilong hem for olowe bae no savve finis!—Vs. 21.

[Olketa Footnote]