Bible Buk Namba 35​—Habakkuk

Man wea Raetem: Habakkuk

Ples Hem Raetem: Judah

Taem Hem Finis Raetem: c. 628 B.C.E.(?)

HABAKKUK hem narawan long olketa smol profet bilong Hebrew Scripture. Nomata olsem, vision and toktok wea hem talem wea kam from God hem no smol samting long pipol bilong God. Profesi bilong hem encouragem and strongim tu olketa servant bilong God long taem bilong hevi. Datfala buk hem mekhae long tufala nambawan truth: Jehovah God hem Sovereign Bilong Universe, and from faithful fasin olketa raeteous wan bae stap laef. Datfala raeting hem olsem wanfala warning tu long pipol wea againstim olketa servant bilong God and olketa wea laea for sei olketa pipol bilong hem. Hem showimaot example bilong strongfala faith long Jehovah, wea fit for kasem evri singsing bilong praise.

² Buk bilong Habakkuk start witim disfala toktok: “Vision bilong Habakkuk abaotem samting wea hem mas talemaot.” (Hab. 1:1) Hu nao disfala profet Habakkuk (Hebrew, Chavaq·quqʹ), wea nem bilong hem minim “Barava Holem Strong”? No eni information stap abaotem parents, tribe, living, or dae bilong Habakkuk. Hem hard for savve sapos hem wanfala Levite man wea pleim music long temple, nomata samfala ting olsem bikos long disfala toktok long end bilong datfala buk: “For director bilong olketa string instrument bilong mi.”

³ Wanem taem nao Habakkuk talemaot profesi toktok bilong hem? Toktok antap and olketa word “Jehovah stap insaed holy temple bilong hem” showaot temple long Jerusalem hem stap yet. (2:20) Datwan, witim message bilong profesi hia hem showimaot hem talemaot no longtaem bifor Jerusalem distroe long 607 B.C.E. Bat haomas year bifor diswan? Hem mas bihaen long rul bilong King Josiah wea fraet long God, long 659-629 B.C.E. Datfala profesi seleva talem diswan taem hem storyim wanfala waka wea pipol long Judah bae no bilivim sapos olketa herem. Wanem nao diswan? Hem nao wei wea God bae iusim olketa bilong Chaldea (olketa bilong Babylon) for panisim Judah wea no garem faith. (1:5, 6) Diswan bae fitim start long rul bilong King Jehoiakim wea worshipim idol, wanfala taem wea wei for no biliv and no followim justice hem big tumas long Judah. Pharaoh Necho nao putim Jehoiakim for rul, and datfala nation hem stap anda long paoa bilong Egypt. From living olsem, pipol hia garem reason for tingse hem hard for Babylon attakim olketa. Bat Nebuchadnezzar winim Pharaoh Necho long Carchemish long 625 B.C.E., and from datwan hem brekem paoa bilong Egypt. So profesi hia hem kamaot bifor datfala samting hem happen. So evri samting hia point go long start long rul bilong Jehoiakim (wea start long 628 B.C.E.), wea showaot Habakkuk stap long semtaem witim Jeremiah.

⁴ Hao nao iumi bae savve disfala buk hem kam from God? Olketa oldfala list bilong olketa Hebrew Scripture showimaot wei wea Habakkuk hem part bilong Bible. Nomata olketa no talemaot nem bilong disfala buk, hem part long list bilong ‘twelvfala Smol Profet,’ wea sapos Habakkuk no stap insaed, bae datfala list no kasem 12-fala. Aposol Paul luksavve long disfala profesi olsem part bilong olketa Scripture wea kam from God and talem toktok from Habakkuk 1:5, and story abaotem hem olsem samting wea “olketa talem insaed Olketa Profet.” (Acts 13:40, 41) Tu-thri taem nao hem talem toktok from buk hia insaed olketa leta bilong hem. Tru nao, wei wea toktok bilong Habakkuk againstim Judah and Babylon fulfill hem markem hem olsem wanfala tru profet bilong Jehovah, wea toktok long nem bilong hem and for glory bilong hem.

⁵ Buk bilong Habakkuk hem garem thrifala chapter. First tufala chapter hem wanfala story midolwan man wea raetem and Jehovah. Tufala storyim strong bilong olketa bilong Chaldea, and tu bigfala sorre wea bae kasem datfala nation bilong Babylon wea mekem grow samting wea no bilong hem, wea kasem planti samting long nogud wei for haos bilong hem, wea buildim wanfala taon from wei for killim dae pipol, and wea worshipim image. Mek-thri chapter deal witim nambawan wei bilong Jehovah long day bilong faet, and hem winim evri nara chapter saed long paoa, and strong bilong hem. Disfala chapter hem wanfala prea bilong sorre and pipol kolem “wanfala barava nambawan buk bilong Hebrew poetry.”a

WEI WEA HEM HELPEM IUMI

¹² From hem luksavve wei wea profesi bilong Habakkuk hem gud for teach, aposol Paul talem toktok from chapter 2, verse 4, long thrifala difren taem. Taem hem mekhae long gud nius olsem paoa bilong God for salvation for evriwan wea garem faith, Paul raet olsem for olketa Christian long Rome: “From insaed long hem nao raeteous fasin bilong God hem go ahed for showaot thru long faith, olsem olketa raetem finis: ‘Bat olketa wea raeteous—bae olketa laef thru long faith.’” Taem hem raet for olketa long Galatia, Paul mekhae long point hao blessing kam thru long faith: “Wei wea law no mekem man raeteous witim God hem showaot klia, bikos ‘man wea raeteous bae stap laef thru long faith.’” Paul talem tu long leta bilong hem for olketa Hebrew hao olketa Christian mas showimaot faith wea laef, faith wea keepim soul hem laef, and hem talem moa toktok bilong Jehovah for Habakkuk. Nomata olsem, hem no talem nomoa toktok bilong Habakkuk, “saed bilong raeteous wan, from faithful fasin bilong hem bae hem stap laef,” bat tu nara toktok bilong hem wea Greek Septuagint talem: “Sapos hem muv bak, soul bilong mi no hapi long hem.” Then hem finisim witim disfala toktok: Iumi “no datkaen wea muv bak for finis evribit, bat datkaen wea garem faith for keepim soul laef.”—Rom. 1:17; Gal. 3:11; Heb. 10:38, 39.

¹³ Profesi bilong Habakkuk hem barava helpem olketa Christian distaem wea needim strong. Hem teachim wei for depend long God. Hem gud tu for warnim nara pipol abaotem olketa judgment bilong God. Diswan hem strongfala warning leson: No tingse olketa judgment bilong God hem delay tumas; bae olketa “no fail for kamap tru.” (Hab. 2:3) Profesi abaotem wei wea Babylon distroem Judah hem no fail for kamap tru, and Babylon seleva tu olketa bilong Media and Persia kasholem long 539 B.C.E. Diswan hem strongfala warning for bilivim toktok bilong God! Dastawe, aposol Paul faendem hem gud for talem toktok bilong Habakkuk taem hem warnim olketa Jew long taem bilong hem for mas garem faith: “Mek sure wanem olketa talem insaed Olketa Profet hem no happen long iufala, ‘Lukim, iufala wea mekfani, and sapraes long diswan, and gogo for finis, bikos mi duim wanfala waka long taem bilong iufala, wanfala waka wea iufala bae no bilivim nomata sapos eniwan storyim long iufala.’” (Acts 13:40, 41; Habakkuk 1:5, LXX) Olketa Jew wea no garem faith no followim wanem Paul talem, olsem olketa no bilivim tu warning bilong Jesus abaotem Jerusalem wea bae distroe; olketa kasem samting wea kamaot from wei wea olketa no faithful taem army bilong Rome distroem Jerusalem long 70 C.E.—Luke 19:41-44.

¹⁴ Olsem tu distaem, profesi bilong Habakkuk encouragem olketa Christian for garem strongfala faith, taem olketa stap insaed world wea fulap witim raf fasin. Hem helpem olketa for teachim nara pipol and for ansarem kwestin wea pipol evriwea long world askem finis, Waswe, bae God pei bak long wicked pipol? Lukim moa toktok bilong disfala profesi: “Go ahed for expectim; from hem bae no fail for kamap tru. Hem bae no leit.” (Hab. 2:3) Nomata wanem samting kamap long earth, anointed remnant bilong olketa wea bae rul long Kingdom tingim toktok bilong Habakkuk abaotem pei bak bilong Jehovah long bifor: “Iu go aot for salvation bilong pipol bilong iu, for sevem anointed wan bilong iu.” (3:13) Jehovah nao hem “Holy Wan” bilong olketa from taem bifor, and “Rok” wea bae repruvim olketa wea no raeteous and givim laef for olketa wea hem lovem. Evriwan wea lovem raeteous fasin savve hapi long Kingdom and olmaeti rul bilong hem, taem olketa sei: “For saed bilong mi, bae mi hapi long Jehovah seleva; bae mi hapi long God bilong salvation bilong mi. Jehovah datfala Sovereign Lord nao strong bilong mi.”—1:12; 3:18, 19.

[Footnote]