Jehovah Patient Witim Jonah

Lo Nineveh wea hem taon blo Assyria, pipol lo there wei blo olketa nogud tumas. Jehovah talem profet blo hem Jonah for go lo Nineveh and warnim pipol lo there for changem wei blo olketa. Bat Jonah ranawe go lo difren ples. Hem go insaed wanfala ship wea go for Tarshish.

Taem ship hem lo sea, wanfala strong wind blow, and olketa sailor fraet fogud. Olketa prea lo god blo olketa and ask olsem: ‘Why nao diswan happen?’ Gogo, Jonah talem olketa: ‘Mi nao ia. Mi ranawe from wat Jehovah talem mi for duim. Iufala torowem mi insaed sea, and sea bae hem fine.’ Olketa sailor hia no laek for torowem hem insaed sea, bat hem talem olketa for mas duim datwan. Taem olketa torowem hem insaed sea, strong wind hem stop nao.

Jonah tingse bae hem dae nao. So taem hem sink go daon insaed deep sea, hem prea lo Jehovah. Then Jehovah sendem wanfala big fish. Hem swallom Jonah, bat datfala fish no killim hem dae. Taem Jonah insaed bele blo datfala fish, hem prea olsem: ‘Mi promis for obeyim iu evritaem.’ Jehovah mekem Jonah for stap laef insaed bele blo datfala fish for thrifala day, then hem mekem datfala fish for vomitim Jonah lo drae land.

From Jehovah sevem Jonah, hao datwan minim bae hem no go lo Nineveh nao? Nomoa. Jehovah talem Jonah for go lo there moa. Distaem, Jonah obey nao. Hem go talem olketa wicked pipol lo there: ‘40 days nomoa stap, then Nineveh bae distroe.’ Then samting wea hem no expectim happen, olketa pipol lo Nineveh obey and changem wei blo olketa. King blo Nineveh talem pipol blo hem: ‘Prea lo God, and repent. Maet bae hem no killim iumi dae.’ Taem Jehovah lukim pipol hia repent, hem no distroem Nineveh.

Jonah kros tumas taem datfala taon no distroe. Tingim: Jehovah hem patient and showim mercy lo Jonah, bat Jonah no showim mercy lo pipol lo Nineveh. Hem go aotsaed from datfala taon and sidaon andanit shade blo wanfala botol-gourd plant and hem feel nogud. Gogo datfala plant hem dae, and Jonah kros fogud. So Jehovah talem hem olsem: ‘Iu sorre for disfala plant bat iu nating sorre for pipol lo Nineveh. Mi showim mercy lo olketa, and olketa no dae.’ Wat nao iumi savve lanem from datwan? Pipol lo Nineveh olketa important winim eni plant.