Fofala Boy wea Obeyim Jehovah

Taem Nebuchadnezzar tekem olketa lo famili blo king and olketa important man lo Judah go lo Babylon, hem appointim wanfala hae official wea nem blo hem Ashpenaz for lukaftarem olketa. Nebuchadnezzar talem Ashpenaz for faendem olketa boy wea barava healthy and kleva tumas. Olketa young boy hia bae kasem training for thri years. Datfala training bae redyim olketa for kamap olketa important man lo Babylon. Olketa boy hia mas lane for read, raet, and story lo Akkadian languis blo Babylon. Olketa mas kaikaim tu sem kaikai wea king and olketa wakaman blo hem kaikaim. Fofala lo olketa boy hia nao hem Daniel, Hananiah, Mishael, and Azariah. Ashpenaz nemim olketa lo olketa nem lo Babylon, wea hem nao: Belteshazzar, Shadrach, Meshach, and Abednego. Hao, disfala training wea olketa kasem bae mekem olketa for stop for worshipim Jehovah?

Fofala boy hia disaed strong for obeyim Jehovah. Olketa luksavve olketa shud no kaikaim olketa kaikai blo king bikos Law blo Jehovah sei samfala lo olketa kaikai hia hem no klin. So olketa sei lo Ashpenaz: ‘Plis no mekem mifala for kaikaim olketa kaikai blo king.’ Ashpenaz sei lo olketa: ‘If iufala no kaikai and king lukim dat iufala luk sik, bae hem killim mi dae!’

Daniel garem wanfala idea. Hem sei lo gard wea lukaftarem olketa: ‘Plis givim mifala olketa vegetable and wata nomoa for ten days. Then comparem mifala witim olketa boy wea kaikaim olketa kaikai blo king.’ So datfala gard hem agree.

Afta mek-ten day, Daniel and thrifala fren blo hem luk healthy winim evri nara boy. Jehovah hapi bikos olketa hia obeyim hem. Hem even givim wisdom lo Daniel for minim olketa vision and olketa dream.

Taem datfala training finis, Ashpenaz tekem olketa boy hia go lo Nebuchadnezzar. Datfala king story witim olketa and hem faendaot dat Daniel, Hananiah, Mishael, and Azariah nao wise tumas winim evri nara boy. So hem chusim fofala hia for waka lo palace blo hem. King savve askem advaes lo olketa for olketa important samting. Jehovah mekem olketa for wise go moa winim evri wise man blo king and olketa man wea duim magic.

Nomata Daniel, Hananiah, Mishael, and Azariah stap lo difren ples, olketa no forget dat olketa pipol blo Jehovah. Hao, iu tu bae evritaem tingim Jehovah nomata iu no stap witim parents blo iu?