Wanfala Kingdom wea Bae Stap for Olowe

Lo wanfala naet, King Nebuchadnezzar garem dream wea mekem hem fraet. Datwan mekem hem wari tumas so hem no savve sleep. Hem kolem kam olketa man blo hem wea duim magic and sei lo olketa: ‘Storyim kam dream blo mi.’ Olketa sei: ‘Iu storyim kam dream blo iu, O king.’ Bat Nebuchadnezzar talem olketa: ‘Nomoa! Iufala nao storyim kam dream blo mi, sapos nomoa bae mi killim iufala dae.’ Then olketa sei moa: ‘Storyim kam dream blo iu lo mifala and mifala bae explainim.’ Hem sei: ‘Iufala evriwan trae for trikim mi. Talem kam dream blo mi!’ Olketa sei lo king: ‘No eni man lo earth savve duim datwan. Samting wea iu askem hem hard tumas.’

Nebuchadnezzar hem kros tumas so hem givim komand for killim dae evri wise man lo datfala land. Datwan includim tu Daniel, Shadrach, Meshach, and Abednego. So Daniel askem king for givim hem lelebet taem. Then Daniel and olketa fren blo hem prea lo Jehovah and askem hem for helpem olketa. Wat nao Jehovah duim?

Jehovah showim dream blo Nebuchadnezzar and mining blo hem lo Daniel insaed wanfala vision. Lo next day, Daniel go lo wakaman blo king and sei: ‘No killim dae eni wise man. Mi savve talem mining blo dream blo king.’ Datfala wakaman tekem Daniel go lo Nebuchadnezzar. Daniel sei lo king: ‘God hem showim lo iu samting wea bae happen. Diswan nao dream blo iu: Iu lukim wanfala statue wea big tumas wea hed blo hem gold, chest and tufala hand blo hem silver, bele and thighs blo hem copper, tufala leg blo hem iron, and tufala foot blo hem iron wea mix witim clay. Then wanfala ston from wanfala maunten hem bangam tufala foot blo datfala statue. Datfala statue hem pisis and wind blowim go nao. And datfala ston hem change lo wanfala big maunten and hem kavarem full earth.’

Then Daniel sei: ‘Diswan nao mining lo dream blo iu: Kingdom blo iu nao datfala hed wea hem gold. Datfala silver hem wanfala kingdom wea bae rul bihaen iu. Then nara kingdom wea hem copper, bae rulim full earth. Next kingdom bae hem strong olsem iron. And last kingdom bae hem divaed, wea samfala part blo hem strong olsem iron and samfala part blo hem wik olsem clay. Datfala ston wea change lo wanfala maunten hem nao Kingdom blo God. Hem bae pisisim evri kingdom hia and hem seleva nomoa bae stap for olowe.’

Nebuchadnezzar baodaon go kasem graon front lo Daniel. Hem sei: ‘God blo iu showim disfala dream lo iu. No eni God olsem hem.’ Instead for killim dae Daniel, Nebuchadnezzar mekem hem boss blo evri wise man and rul ovarem province blo Babylon. Iu lukim hao Jehovah ansarem prea blo Daniel?