Olketa Nating Baodaon

No longtaem afta King Nebuchadnezzar dreamim datfala statue, hem wakem wanfala big image lo gold. Hem standapim datfala image lo flat ples lo Dura and kolem kam olketa important pipol lo datfala land, includim Shadrach, Meshach, and Abednego, for olketa standap front lo datfala image. Then king komandim olketa olsem: ‘Taem iufala herem saond blo olketa trumpet, harp, and olketa bagpipe, iufala baodaon lo datfala statue! Eniwan wea no baodaon bae olketa torowem hem insaed lo bigfala fire wea hot tumas.’ Hao, bae thrifala Hebrew hia baodaon lo datfala statue or bae olketa worshipim Jehovah nomoa?

Then king komandim olketa for pleim music. Evriwan baodaon for worshipim datfala statue bat Shadrach, Meshach, and Abednego nao nomoa. Samfala man lukim olketa and talem king: ‘Thrifala Hebrew hia no laek for worshipim statue blo iu.’ Nebuchadnezzar talem olketa for kam and hem sei: ‘Bae mi givim iufala nara chance moa for worshipim datfala statue. If iufala no baodaon, bae mi torowem iufala lo datfala big fire wea hot tumas. No eni god stap wea fit for sevem iufala from mi.’ Olketa sei lo king: ‘Mifala no needim nara chance moa. God blo mifala savve sevem mifala. Bat nomata sapos hem no sevem mifala, O king, mifala bae no worshipim datfala statue.’

Nebuchadnezzar kros fogud. Hem sei lo olketa man blo hem: ‘Mekem datfala fire hem sevenfala taem hot winim normal hot blo hem!’ Then hem givim order for olketa soldia blo hem: ‘Taengem olketa man hia and torowem olketa insaed datfala fire!’ Datfala big fire hem hot tumas and taem olketa soldia hia go klosap, olketa dae semtaem. So thrifala Hebrew hia foldaon go insaed datfala fire. Bat taem Nebuchadnezzar luk go insaed, hem lukim fofala man nao wakabaot insaed datfala fire. Hem fraet tumas and askem olketa hae official blo hem olsem: ‘Iumi torowem thrifala man nomoa lo fire, iaman? Fofala nao mi lukim and wanfala lo olketa hem luk olsem angel!’

Nebuchadnezzar go klosap lo datfala fire and singaot olsem: ‘Kamaot, iufala olketa servant blo Most Hae God!’ Evriwan sapraes tumas for lukim Shadrach, Meshach, and Abednego wakabaot kamaot and fire nating bonem olketa. Skin blo olketa, hair blo olketa, and kaleko blo olketa nating bone, and olketa no smel lo fire tu.

Nebuchadnezzar sei: ‘God blo Shadrach, Meshach, and Abednego hem winim eni nara god. Hem sendem angel blo hem and sevem olketa. No eni god hem olsem God blo olketa.’

Olsem thrifala Hebrew hia, hao, iu disaed strong for loyal lo Jehovah nomata wat nao happen?