Report Bilong Olketa wea Talemaot Kingdom
Olketa Kasem Reward From Faith Bilong Olketa
APOSOL PAUL hem wanfala man wea garem spesol faith, and hem encouragem olketa wea biliv for mekem grow faith bilong olketa. Hem sei: “Man wea kam long God mas biliv hem stap and hem kamap man wea givim reward long olketa wea barava lukaotem hem.” (Hebrews 11:6) Olketa experience hia from Mozambique showimaot hao Jehovah givim reward long olketa wea garem strongfala faith and hem ansarem olketa strongfala prea.
• Wanfala widow sista from north saed long province bilong Niassa barava wari tumas abaotem hao nao hem and sixfala pikinini bilong hem bae attendim “Live Followim Way Bilong God” Distrik Convention. Only wei wea hem savve kasem selen hem for sellim samfala samting long market, bat taem date bilong convention kam klosap, hem garem selen fitim nomoa for peim fare for wan-wei long train for hem and famili bilong hem. Nomata olsem, hem putim trust long olketa samting wea Jehovah savve provaedem and go ahed witim plan bilong hem for attendim convention.
Hem go insaed long train witim sixfala pikinini bilong hem. Then conductor kam long hem for ticket. Taem hem lukim badge card bilong hem, conductor askem wanem kaen card nao hem werem. Sista hia talem hem hao datwan showimaot hem wanfala long pipol for attendim distrik convention bilong Olketa Witness Bilong Jehovah. Conductor ask: “Wea nao disfala convention bae kamap?” Bihaen hem luksavve hao convention bae kamap long next province bilong Nampula, samting olsem 300 kilometer farawe, hem askem selen long sista wea fitim nomoa haf price long ticket bilong wan wei! And nara haf long selen for fare, conductor hem tekem and hem givim olketa ticket for go bak hom long sista hia and famili bilong hem. Disfala sista barava hapi tumas for putim trust bilong hem long Jehovah!—Psalm 121:1, 2.
• For samting olsem 25 year, wanfala woman wea strong long religion bilong hem prea long God for showim hem stret wei for worshipim hem. Church wea hem attendim joinim tugeta wei for worship long saed long religion witim olketa wei bilong kastom, and hem garem daot sapos God hapi witim diskaen wei for worship.
Hem sei: “Mi evritaem tingim olketa toktok bilong Jesus long Matthew 7:7: ‘Go ahed for askem, and bae iu kasem; go ahed for lukaotem, and iu bae faendem; go ahed for noknok, and bae hem open for iu.’ Witim scripture hia long mind bilong mi, mi prea evritaem long God for leadim mi long truth. Wanday pastor long church bilong mifala askem evriwan wea waka long market for tekem kam long hem samfala selen witim samfala samting wea olketa sellim, for hem blessim olketa. Mi ting wanem hem askem hem againstim Bible, so evriwan tekem kam samting bat mi no duim. Taem pastor lukim hao mi no tekem kam eni ‘offering,’ hem start for tokspoelem mi front long evri member bilong church. Long datfala day mi luksavve hao diswan hem no wei wea God wantem iumi for worshipim hem, so mi lusim datfala church. Long semtaem, mi go ahed for prea for faendem truth.
“Gogo mi kasem strong for no fraet and mi go long wanfala wantok wea hem wanfala long Olketa Witness Bilong Jehovah. Hem givim mi wanfala tract, and taem mi readim mi stretawe luksavve hao God hem ansarem prea bilong mi. Gogo, fren bilong mi tu start for tinghae long olketa truth bilong Bible, and mitufala stretem marit bilong mitufala long saed bilong law. Bihaen, hasband bilong mi kasem bigfala sik. Bat go kasem taem hem dae, hem encouragem mi for go ahed strong long wei bilong truth mekem mitufala savve meet moa long Paradaes.
“Mi hapi olowe long Jehovah for ansarem olketa prea bilong mi and showim mi stret wei for worshipim hem. Olketa prea bilong mi kasem ansa tu long wei wea mi lukim eitfala pikinini bilong mi kamap olketa servant bilong Jehovah wea dedicate.”