“Lukaotem Jehovah and Strong Bilong Hem”

“Eye bilong Jehovah muv raonem full earth for showim strong bilong hem for olketa wea givim full heart long hem.”—2 CHRONICLES 16:9.

1. Wanem nao paoa, and hao nao olketa man iusim?

PAOA savve minim samfala difren samting, olsem for kontrolem, for olsem boss, for affectim nara pipol; savve for duim samting for muvim narawan; strong bilong body; or wei for muvim mind or fasin. Olketa man no garem gudfala record bilong wei for iusim paoa. Lord Acton, wanfala man for raetem history sei olsem abaotem paoa wea olketa man bilong politik garem: “Paoa savve spoelem man and full paoa barava spoelem man evribit.” History bilong distaem fulap witim olketa example wea showimaot hao toktok bilong Lord Acton hem tru planti taem. Long mek-20 century, “man hem bossim man and spoelem hem” winim enitaem bifor. (Ecclesiastes 8:9) Olketa raf ruler iusim paoa bilong olketa long barava nogud wei and killim dae planti million pipol. Paoa wea love, wisdom, and justice no bossim hem danger samting.

2. Minim hao nao olketa nara fasin bilong Jehovah affectim wei wea hem iusim paoa bilong hem?

² Long wei wea difren from planti man, God evritaem iusim paoa bilong hem for gud samting. “Eye bilong Jehovah muv raonem full earth for showim strong bilong hem for olketa wea givim full heart long hem.” (2 Chronicles 16:9) Jehovah kontrolem paoa wea hem iusim. Patient fasin mekem God hol bak for distroem wicked pipol for givim olketa chance for repent. Love muvim hem for mekem sun shaen long evri man—olketa wea raeteous and no raeteous. Justice bae muvim hem for iusim bigfala paoa bilong hem for finisim dat wan wea kosim dae, Devil Satan.—Matthew 5:44, 45; Hebrews 2:14; 2 Peter 3:9.

3. Why nao barava bigfala paoa bilong God hem wanfala reason for trustim hem?

³ Maeti paoa bilong Dadi bilong iumi long heven hem wanfala reason for garem trust and barava sure—long olketa promis bilong hem and wei wea hem protectim iumi. Wanfala smol pikinini feel sef taem hem stap witim olketa stranger sapos hem holem hand bilong dadi bilong hem, bikos hem savve dadi bilong hem bae no letem eni samting spoelem hem. Olsem tu, Dadi bilong iumi long heven, dat wan wea “fulap long paoa for sevem pipol,” bae protectim iumi from eni samting wea savve spoelem iumi for olowe sapos iumi wakabaot witim hem. (Isaiah 63:1; Micah 6:8) And olsem wanfala gud Dadi, Jehovah evritaem fulfillim olketa promis bilong hem. Barava bigfala paoa bilong hem mekem iumi sure hao ‘toktok bilong hem bae nating savve fail long datfala samting wea hem sendem hem for duim.’—Isaiah 55:11; Titus 1:2.

4, 5. (a) Wanem nao kamaot from wei wea King Asa trust evribit long Jehovah? (b) Wanem nao savve happen sapos iumi depend long ansa from olketa man for olketa problem bilong iumi?

⁴ Why nao hem important tumas for iumi disaed strong for evritaem luksavve long protection from Dadi bilong iumi long heven? Bikos hem isi for bigfala samting wea happen raonem iumi for mekem iumi forgetim wea nao barava sef ples hem stap. Iumi lukim diswan long example bilong King Asa, wanfala man wea trustim Jehovah. Long rul bilong Asa, wan million man long army bilong Ethiopia attakim Judah. From hem luksavve olketa enemy hia garem bigfala army tumas, Asa prea olsem: “O Jehovah, long saed bilong wei for help, hem samting nating nomoa long iu nomata olketa staka or olketa wea no garem paoa. Helpem mifala, O Jehovah God bilong mifala, from mifala depend long iu, and for saed long nem bilong iu mifala kam againstim disfala sekson. O Jehovah, iu nao God bilong mifala. No letem man wea savve dae for keepim strong againstim iu.” (2 Chronicles 14:11) Jehovah ansarem prea bilong Asa and mekem hem win evribit.

⁵ Bat, bihaen planti year bilong faithful service, trust bilong Asa long paoa bilong Jehovah for sevem man hem wikdaon. For mekem army bilong north kingdom bilong Israel no faetem hem, hem tan long Syria for help. (2 Chronicles 16:1-3) Nomata wei wea hem peim King Ben-hadad bilong Syria mekem Israel no attakim Judah, covenant bilong Asa witim Syria showimaot hao hem no trustim Jehovah. Profet Hanani ask­em hem stret: “Waswe, olketa bilong Ethiopia and Libya no wanfala barava bigfala army, wea garem olketa chariot and man wea raedem horse; and from wei wea iu depend long Jehovah waswe, hem no givim olketa long hand bilong iu?” (2 Chronicles 16:7, 8) Nomata olsem, Asa rejectim repruv wea hem kasem. (2 Chronicles 16:9-12) Taem iumi feisim olketa problem, iumi mas no depend long ansa from olketa man. Bat iumi mas showimaot trust long God, bikos wei for trust long paoa bilong man bae gogo lead for sorre.—Psalm 146:3-5.

Lukaotem Paoa wea Jehovah Givim

6. Why nao iumi mas “lukaotem Jehovah and strong bilong hem”?

⁶ Jehovah savve givim paoa long olketa servant bilong hem and protectim olketa tu. Bible encouragem iumi for “lukaotem Jehovah and strong bilong hem.” (Psalm 105:4) Why nao olsem? Bikos taem iumi duim olketa samting long strong bilong God, paoa bilong iumi bae helpem, and no spoelem, nara pipol. No eni nara example long diswan hem winim Jesus Christ, wea duim planti mirakol long “paoa bilong Jehovah.” (Luke 5:17) Sapos hem laekem, Jesus savve busy for kamap rich, garem bignem, or kamap wanfala barava strong king tu. (Luke 4:5-7) Bat, long difren wei hem iusim paoa wea God givim long hem for trainim, teachim, helpem and healim pipol. (Mark 7:37; John 7:46) Datwan hem nambawan example for iumi!

7. Wanem important fasin nao iumi mas mekem grow taem iumi duim samting long strong bilong God and no bilong iumiseleva?

⁷ And tu, taem iumi duim samting long “strong wea God givim,” diswan bae helpem iumi for stap hambol. (1 Peter 4:11) Olketa man wea lukaotem paoa for olketa seleva kamap bighed. Wanfala example nao King Esar-haddon bilong Assyria, wea tok praod olsem: “Mi garem paoa, mi garem full paoa, mi wanfala bigman, mi wanfala barava bigman.” Long difren wei, Jehovah “chusim olketa wik samting bilong world, for mekem olketa strongfala man feel shame.” So, sapos wanfala Christian tok praod, hem tok praod for Jehovah, bikos hem savve wanem hem duim hem no from strong bilong hemseleva. Wei for “kamap hambol anda long maeti hand bilong God” bae mekem man kasem trufala praise.—1 Corinthians 1:26-31; 1 Peter 5:6.

8. Wanem nao first samting iumi mas duim for kasem paoa bilong Jehovah?

⁸ Hao nao iumi savve kasem strong bilong God? First samting, iumi mas askem datwan insaed long prea. Jesus promisim olketa disaepol bilong hem hao Dadi bilong hem bae givim holy spirit long olketa wea askem. (Luke 11:10-13) Tingim hao diswan barava givim paoa long olketa disaepol bilong Christ taem olketa chus for obeyim God and no olketa leader bilong religion wea orderim olketa for stop for witness abaotem Jesus. Taem olketa prea long Jehovah for help, prea from heart bilong olketa kasem ansa, and holy spirit strongim olketa for no fraet for go ahed preachim gud nius.—Acts 4:19, 20, 29-31, 33.

9. Talem mek-tu ples wea iumi savve kasem spiritual strong, and givim wanfala Bible example wea show­imaot diswan hem tru.

⁹ Mek-tu, iumi savve kasem spiritual strong from Bible. (Hebrews 4:12) Paoa wea toktok bilong God garem hem showaot klia long taem bilong King Josiah. Nomata disfala king bilong Judea hem aotem finis olketa heathen idol from datfala land, taem olketa faendem Law Bilong Jehovah insaed long temple, diswan muvim hem for go ahed moa strong long datfala klining program.a Bihaen Josiah seleva readim Law long olketa pipol, datfala full nation mekem wanfala covenant witim Jehovah, and olketa go ahed mek-tu taem for againstim wei for worshipim idol. Gudfala samting wea kamaot from wei for stretem worship wea Josiah duim hem hao ‘olketa no tan difren from wei for followim Jehovah long full laef bilong hem.’—2 Chronicles 34:33.

10. Wanem nao mek-thri wei for kasem strong from Jehovah, and why nao diswan important?

¹⁰ Mek-thri, iumi kasem strong from Jehovah thru long Christian wei for kaban tugeta. Paul encouragem olketa Christian for attendim olketa meeting evritaem for “muvim narawan for showimaot love and gudfala waka” and for encourag­em evriwan. (Hebrews 10:24, 25) Taem Peter kamaot from prison from wanfala mirakol, hem laek for stap witim olketa brata bilong hem, so hem go stret long haos bilong mami bilong John Mark, wea “planti pipol hipap tugeta and prea.” (Acts 12:12) Hem tru, evri pipol hia savve stap bak long haos bilong olketa and prea. Bat olketa chus for kam tugeta and prea and encourag­em evriwan long datfala hardfala taem. Klosap long end bilong longfala and danger gogo bilong Paul for Rome, hem meetim samfala brata long Puteoli and bihaen samfala moa wea go for meetim hem. Hao nao hem feel from diswan? “Taem hem lukim olketa, Paul sei thankiu long God and kasem strong.” (Acts 28:13-15) Hem feel strong bikos hem stap moa witim olketa Christian brata. Iumi tu kasem strong from wei for hipap witim olketa Christian brata. Taem iumi free and fit for hipap tugeta, iumi mas no trae for wakabaot seleva long smol road wea lead go for laef.—Proverbs 18:1; Matthew 7:14.

11. Talem samfala samting wea happen wea man barava needim “paoa wea winim wanem iumi garem.”

¹¹ Long wei for prea evritaem, studyim Word bilong God, and hipap witim olketa brata, iumi “go ahed for kasem paoa long Lord and long bigfala strong bilong hem.” (Ephesians 6:10) Iumi evriwan needim “paoa long Lord.” Samfala safa from bigfala sik, olketa narawan from nogud samting bilong wei for olo or from olketa lusim partner wea dae. (Psalm 41:3) Olketa narawan stand strong taem partner wea no biliv againstim olketa. Dadi and mami, especially olketa single wan, maet faendem hao wei for garem full-taem waka for selen and lukaftarem famili hem wanfala bigfala responsibility. Olketa young Christian needim strong for feisim hevi from olketa wea sem age and sei no long drug and dirty fasin. No eniwan mas hol bak for askem Jehovah for “paoa wea winim wanem iumi garem” for deal witim olketa challenge olsem.—2 Corinthians 4:7.

“Givim Paoa Long Man wea Taed”

12. Hao nao Jehovah strongim iumi insaed long Christian ministry?

¹² Nara samting tu, Jehovah givim paoa long olketa servant bilong hem taem olketa duim ministry. Iumi readim diswan long profesi bilong Isaiah: “Hem givim paoa long man wea taed; and man wea no garem bigfala strong, hem mekem full paoa stap long hem. . . . Olketa wea hope long Jehovah bae kasem paoa moa. Olketa bae garem wing and flae olsem olketa eagle. Olketa bae ran and no kamap taed; olketa bae wakabaot and no wikdaon.” (Isaiah 40:29-31) Aposol Paul tu kasem paoa for duim ministry bilong hem. Dastawe ministry bilong hem win. Hem raet olsem for olketa Christian long Thessalonica: “Gud nius wea mifala preachim hem no kam long iufala thru long toktok nomoa bat witim paoa and witim holy spirit.” (1 Thessalonians 1:5) Waka bilong hem for preach and teach garem paoa for barava changem living bilong olketa wea lisin long hem.

13. Wanem nao strongim Jeremiah for no givap nomata pipol againstim hem?

¹³ Taem iumi meetim pipol wea nating interest long territory bilong iumi—maet iumi preach long datfala territory for planti year bat no eniwan lisin—diswan maet mekem iumi feel wikdaon. Jeremiah tu feel wikdaon taem pipol againstim, mekfani, and no interest. Hem talem hemseleva: “Mi bae no storyim [God], and mi bae no talem eni samting long nem bilong hem.” Bat hem no savve stap kwaet. Message bilong hem “olsem wanfala fire wea burn wea stap insaed olketa bone bilong [hem].” (Jeremiah 20:9) Wanem nao givim hem moa paoa for feisim olketa wea againstim hem? Jeremiah sei: “Jehovah hem olsem wanfala maeti wan witim mi.” (Jeremiah 20:11) Wei wea Jeremiah tinghae long important message bilong hem and assignment wea God givim mekem hem acceptim encouragement bilong Jehovah.

Paoa for Spoelem and Paoa for Healim

14. (a) Wanem paoa nao tongue hem garem? (b) Talem olketa example bilong wei wea tongue savve spoelem man.

¹⁴ No evri paoa wea iumi garem kam stret from God. Example, tongue hem smol samting nomoa, bat hem garem paoa for spoelem man and healim hem tu. Solomon givim disfala warning: “Dae and laef stap long paoa bilong tongue.” (Proverbs 18:21) Samting wea kamaot from short story bilong Satan witim Eve showimaot wei wea toktok savve barava spoelem man. (Genesis 3:1-5; James 3:5) Iumi tu savve duim bigfala nogud samting for spoelem man witim tongue. Nogud toktok abaotem wei wea wanfala girl hem fat savve muvim hem for no kaikai gogo hem kasem sik anorexia. Wei for talem moa laea toktok againstim samwan savve spoelem gudfala wei for fren. Tru nao, iumi mas bossim tongue.

15. Hao nao iumi savve iusim tongue for buildimap and healim man?

¹⁵ Bat, tongue savve build­imap and daonem man tu. Wanfala Bible proverb sei: “Toktok bilong man wea tok olabaot hem olsem sword wea katem man, bat tongue bilong wisefala man savve mekem man feel gud.” (Proverbs 12:18) Olketa wise Christian iusim paoa bilong tongue for comfortim olketa wea feel sorre or wea lusim samwan olketa lovem long dae. Kaenfala toktok savve encouragem olketa teenager wea kasem hard taem from olketa wea sem age. Tongue wea tingting gud savve remindim olketa olo brata and sista hao iumi needim and lovem olketa. Olketa kaenfala toktok savve mekem olketa wea sik feel gud. Winim evri samting, iumi savve iusim tongue bilong iumi for sharem strongfala Kingdom message witim evriwan wea laek for lisin. Iumi garem paoa for talemaot Word Bilong God sapos heart bilong iumi willing. Bible sei: “No holem bak gudfala samting from olketa wea fit for kasem, sapos iu garem paoa for duim diswan.”—Proverbs 3:27.

Stretfala Wei for Iusim Paoa

16, 17. Taem olketa iusim paoa wea God givim, hao nao olketa elder, dadi, mami, hasband, and waef savve followim Jehovah?

¹⁶ Nomata hem almighty, Jehovah rulim kongregeson witim love. (1 John 4:8) Olketa Christian overseer followim hem taem olketa lukafta­rem olketa sheep long loving wei—iusim gud, and no iusim olabaot paoa bilong olketa. Hem tru, samtaem olketa overseer need for “stretem, kaonselem, encouragem,” bat olketa duim diswan “witim evri long-suffering and gudfala wei for teach.” (2 Timothy 4:2) So olketa elder need for evritaem ting raonem toktok wea aposol Peter raetem for olketa wea garem paoa insaed kongregeson: “Shepherdim sheep bilong God wea iufala lukaftarem, no from eniwan forcem iufala, bat long willing wei; no from love for kasem selen, bat from iufala barava want for duim; no olsem iufala kamap bigman ovarem samting bilong God, bat kamap example long olketa sheep.”—1 Peter 5:2, 3; 1 Thessalonians 2:7, 8.

¹⁷ Dadi, mami, and olketa hasband garem paoa tu wea Jehovah givim long olketa, and olketa mas iusim disfala paoa for helpem, strongim, and lovem pikinini and waef. (Ephesians 5:22, 28-30; 6:4) Example bilong Jesus showimaot hao man savve iusim paoa long loving wei. Sapos discipline hem balance and semsem evritaem, olketa pikinini bae no feel sorre. (Colossians 3:21) Marit kamap moa strong taem olketa Christian ­hasband duim waka olsem hed long loving wei and olketa waef barava respectim hasband olsem hed winim wei for go ovarem paoa wea God givim long olketa for olsem boss or kasem samting wea olketa laekem.—Ephesians 5:28, 33; 1 Peter 3:7.

18. (a) Hao nao iumi mas followim example bilong Jehovah for bossim kros bilong iumi? (b) Wanem nao olketa wea garem paoa mas trae for mekem grow insaed long pipol wea stap anda long olketa?

¹⁸ Olketa wea garem paoa insaed long famili and insaed long kongregeson mas barava careful for bossim kros bilong olketa, bikos kros hem mekem fraet nao grow and no love. Profet Nahum sei: “Jehovah no savve kros kwiktaem and garem bigfala paoa.” (Nahum 1:3; Colossians 3:19) For bossim kros bilong iumi hem wanfala saen bilong strong, bat for letem kros bossim iumi hem pruvim man hem wik. (Proverbs 16:32) Insaed long famili and insaed long kongregeson, goal hem for mekem love nao grow—love for Jehovah, love for evriwan, and love for olketa stretfala principle. Love nao hem main strong for keepim wan mind and wea muvim man for duim stret samting.—1 Corinthians 13:8, 13; Colossians 3:14.

19. Wanem comfort nao Jehovah givim, and hao nao iumi mas ting long diswan?

¹⁹ For iumi savve long Jehovah hem minim iumi luksavve long paoa bilong hem. Thru long Isaiah, Jehovah sei: “Waswe, iu no savve or iu no herem? Jehovah, Creator bilong full earth, hem wanfala God go kasem olowe. Hem no savve kamap taed or wikdaon.” (Isaiah 40:28) Paoa bilong Jehovah hem no savve finis. Sapos iumi depend long hem and no long iumiseleva, hem bae no lusim iumi. Hem promisim iumi: “Iu no fraet, bikos mi stap witim iu. Iu no lukluk olabaot, bikos mi God bilong iu. Mi bae strongim iu. Mi bae barava helpem iu. Mi bae barava hol strong long iu witim raet hand bilong raeteous wei bilong mi.” (Isaiah 41:10) Wanem nao iumi mas duim abaotem loving kea bilong hem? Olsem Jesus, iumi mas evritaem iusim paoa wea Jehovah givim for helpem and buildimap man. Letem iumi bossim tongue bilong iumi mekem hem healim and no spoelem man. And letem iumi evritaem wekap long spiritual wei, stand strong insaed long faith, and kamap strong long paoa bilong Barava Nambawan Creator bilong iumi, Jehovah God.—1 Corinthians 16:13.

[Footnote]

Waswe, Iu Savve Minim?

• Hao nao Jehovah iusim paoa bilong hem?

• Wanem nao olketa wei wea iumi savve kasem paoa bilong Jehovah?

• Hao nao iumi mas iusim paoa bilong tongue?

• Hao nao paoa wea God givim savve kamap wanfala blessing?

[Piksa long page 15]

Jesus iusim strong bilong Jehovah for helpem nara pipol

[Piksa long page 17]

Iumi garem paoa for talemaot Word Bilong God sapos heart bilong iumi willing