Wanfala Krae for Help

“GOD hem forgetim mi!” wanfala woman from Brazil hem krae aot olsem. Bihaen seknomoa hasband bilong hem dae, hem feel olsem laef bilong hem lusim mining nao. Waswe, enitaem iu trae comfortim samwan wea feel sorre tumas olsem or wea maet go ahed for krae for help?

Samfala lus hope tumas gogo olketa endim laef bilong olketa—and samfala long olketa they young pipol. Olsem niuspepa Folha de S. Paulo hem talem, wanfala research wea olketa duim long Brazil showimaot “suisaed midolwan young pipol hem go ap 26 percent.” Olsem example, tingim Walter,a wanfala young man long São Paulo. Hem no garem dadi and mami, no eni haos, no eni private taem, no eni fren wea hem savve depend long hem. For finisim sorre bilong hem, Walter disaed for jamp from wanfala bridge.

Wanfala singol mami, Edna, garem tufala pikinini finis taem hem meetim nara man. Bihaen wan month nomoa, tufala stap tugeta long haos bilong mami bilong man hia, wea disfala woman duim spiritism and depend long alcohol. Edna garem nara pikinini moa, start for drink tumas, and from hem kamap sorre tumas hem trae for suisaed. Gogo, kot tekem olketa pikinini bilong hem from hem.

Waswe long olketa olo pipol? Long bifor, Maria hem wanfala hapi girl and savve story tumas. Bat, taem hem kamap moa olo, hem start for wari abaotem waka bilong hem olsem nurse bikos hem fraet nogud hem mek mistek. Diswan mekem hem sorre tumas. Bihaen hem trae for healim hemseleva, hem lukaotem help bilong doctor, and treatment wea hem kasem luk olsem helpem hem. Bat taem hem 57 year and lusim waka bilong hem, hem kasem bak sorre feeling wea moa worse gogo hem no lukim eni wei moa. Maria start tingting for suisaed.

“Samting olsem 10 percent long pipol wea feel sorre trae for suisaed,” Professor José Alberto Del Porto bilong São Paulo University hem sei. “Hem hard for biliv hao suisaed killim dae moa pipol winim olketa murder, bat hem sorre samting wea tru,” U. S. surgeon general, Dr. David Satcher hem reportim.

Samtaem wei for trae for suisaed hem really wanfala krae for help. And no eni daot stap hao olketa famili member and fren want for duim stret samting for datwan wea lus hope. Bat, kaen toktok olsem bae no help: “No feel sorre for iuseleva,” “Moa pipol olketa moa worse winim iu” or, “Iumi evriwan garem nogud day samfala taem.” Winim diswan, hao sapos iu kamap wanfala trufala fren and lisin gud? Yes, trae for helpem olketa wea sorre for lukim hao laef hem no samting nating.

French man for raet, Voltaire, raet olsem: “Datfala man wea, long taem hem barava feel nogud, killim hemseleva tuday, bae hope hem laef yet sapos hem weit wan week.” Sapos olsem hao nao pipol wea lus hope savve faendaot laef hem no samting nating?

[Footnote]

[Piksa long page 3]

Namba bilong young and full-grown pipol wea suisaed kamap moa big

[Piksa long page 4]

Hao nao iu savve helpem man wea lus hope?