Kwestin From Reader

Sapos samwan hem suisaed, waswe, fitim wanfala Christian minister for givim funeral tok?

Each Christian minister mas disaed for hemseleva sapos conscience bilong hem bae klia front long God for givim funeral tok for samwan wea suisaed. Taem hem disaed, hem shud tingim olketa kwestin hia: Hao nao Jehovah ting long suisaed? Waswe, hem really min for killim dae seleva? Waswe, sik saed long mind or feeling wea olabaot nao muvim hem for suisaed? Hao nao pipol long datfala area ting long suisaed?

Olsem olketa Christian, iumi interest long tingting bilong Jehovah abaotem suisaed. Laef bilong man hem samting wea spesol and holy long Jehovah. (Genesis 9:5; Psalm 36:9) Wei wea man min for killim dae hemseleva hem samting wea God no laekem. (Exodus 20:13; 1 John 3:15) Waswe, datwan minim iumi no savve givim funeral tok for samwan wea suisaed?

Tingim samting wea happen long King Saul bilong Israel. Taem Saul luksavve hem bae no winim last faet bilong hem againstim olketa Philistine, hem no wantem olketa enemy hia for spoelem hem so “Saul tekem sword and foldaon antap long hem.” Taem olketa Philistine faendem body bilong hem, olketa hangem long wall bilong taon bilong Beth-shan. Taem olketa faendaot samting wea olketa Philistine duim, pipol bilong Jabesh-gilead tekem datfala body and bonem. Then olketa tekem olketa bon bilong hem and berem. Olketa no kaikai for sevenfala day tu, wea hem kastom bilong olketa Israelite for showimaot sorre. (1 Samuel 31:4, 8-13; Genesis 50:10) Taem David, datfala anointed wan bilong Jehovah herem samting wea pipol bilong Jabesh-gilead duim, hem sei: “Blessing for iufala olketa bilong Jehovah, bikos iufala showimaot loving-kaeness long lord bilong iufala, long Saul, taem iufala berem hem. And distaem letem Jehovah showimaot loving-kaeness and trust long iufala.” (2 Samuel 2:5, 6) Bible no sei olketa pipol bilong Jabesh-gilead kasem panis from olketa duim funeral bilong King Saul. Markem datwan witim olketa wea pipol no berem from olketa duim rong samting. (Jeremiah 25:32, 33) Wanfala Christian minister maet tingting long story long Bible abaotem Saul for disaedem sapos hem savve givim funeral tok for samwan wea suisaed or nomoa.

Hem gud for datfala minister ting long goal bilong funeral tok tu. Long wei wea difren from pipol wea biliv hao soul no savve dae, Olketa Jehovah’s Witness no duim funeral witim rong idea for sei datwan wea dae hem go long narafala ples. Main goal bilong funeral tok hem for givim comfort long olketa wea sorre and givim witness for olketa wea attend abaotem wanem nao kasem olketa wea dae. (Ecclesiastes 9:5, 10; 2 Corinthians 1:3-5) Nara important goal for garem funeral tok hem for helpem evriwan wea attend for ting abaotem wei wea laef hem short tumas. (Ecclesiastes 7:2) Waswe, wei for duim funeral tok for datwan wea suisaed bae kasem olketa goal hia?

Hem tru, samfala maet tingse datfala man hem min for killim dae hemseleva, and hem luksavve hem sin againstim Jehovah. Bat waswe, iumi savve pruvim datwan evritaem? Waswe, maet hem samting wea seknomoa hem duim nao? Samfala wea trae for suisaed changem tingting and no duim datwan. Bat man kanduit repent from samting wea hem duim bihaen hem dae.

Narafala important samting tu hem olketa sik saed long mind and feeling wea kosim planti for suisaed. Olketa hia sekson wea suisaed spoelem. Samfala report sei 90 percent bilong olketa wea suisaed garem samkaen problem saed long mind, feeling, or wei for depend long samting. Waswe, Jehovah bae forgivim pipol wea killim olketa seleva dae from mind bilong olketa no stret evribit? Iumi no fit for judge and sei datwan wea dae hem duim wanfala sin long eye bilong Jehovah and no fit for kasem forgiveness. Wanfala Christian minister maet tingim living and medical history bilong samwan wea suisaed taem hem go ahed for disaed for givim funeral tok or nomoa.

Wanfala samting moa for tingim hem olsem: Hao nao pipol long datfala community lukluk long suisaed and dae bilong datfala man? Diswan hem samting wea olketa elder mas barava ting strong long hem from nem bilong kongregeson bilong Olketa Jehovah’s Witness hem insaed diswan. Followim tingting bilong pipol long datfala area abaotem suisaed, and especially long datwan wea suisaed, olketa elder maet disaed for no duim funeral hia long pablik or for givim funeral tok insaed Kingdom Hall.

Nomata olsem, sapos olketa askem wanfala Christian minister for givim funeral tok, maet hem ting hao hem savve duim diswan bat no olsem man wea stand for kongregeson. Sapos hem disaed for duim olsem, hem shud iusim gudfala tingting for no talem eni toktok abaotem wei wea datfala man bae resurrect or nomoa. Eni future hope for olketa wea dae hem long hand bilong Jehovah, and no eniwan fit for sei sapos datwan wea dae bae resurrect or nomoa. Datfala minister savve story abaotem olketa truth insaed Bible abaotem dae and givim comfort for olketa wea sorre.