Tufala Brata wea Garem Difren Tingting
Samting parents disaedem hem barava affectim pikinini bilong olketa. Datwan hem tru long garden bilong Eden, and hem tru distaem tu. Wei wea Adam and Eve no obey hem barava affectim olketa man. (Genesis 2:15, 16; 3:1-6; Romans 5:12) Nomata olsem, iumi evriwan garem chance for fren gud witim Creator bilong iumi, sapos iumi laekem. Diswan hem showaot klia long story bilong Cain and Abel, tufala first brata long history bilong olketa man.
Bible no talem sapos God hem story witim Adam and Eve bihaen hem aotem tufala from Eden. Nomata olsem, hem no minim Jehovah no story witim olketa son bilong tufala. Luk olsem Cain and Abel lane abaotem samting wea happen from parents bilong olketa. Olketa savve lukim “olketa cherub and sword wea laet olsem fire wea go ahed for tan raon for gardim road wea go long tree bilong laef.” (Genesis 3:24) Olketa lukim tu hao laef hem fulap witim hard waka and pain, olsem God talem bae happen.—Genesis 3:16, 19.
Cain and Abel mas savve long toktok bilong Jehovah long datfala snek: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Genesis 3:15) Savve bilong Cain and Abel abaotem Jehovah bae mekem olketa fit for fren witim hem long wei wea hem appruvim.
Taem Cain and Abel ting raonem profesi bilong Jehovah and fasin bilong hem olsem wanfala loving Man wea Helpem olketa, datwan mas muvim tufala for laekem God for appruvim olketa. Bat waswe, bae olketa mekem grow datfala feeling? Waswe, bae olketa worshipim God and mekem grow spiritual fasin bilong olketa mekem olketa showimaot faith long hem?—Matthew 5:3.
Tufala Brata Tekem Kam Olketa Offering
Gogo, Cain and Abel tekem kam olketa offering long God. Cain offerim olketa frut bilong graon, and Abel offerim olketa firstborn bilong flock bilong hem. (Genesis 4:3, 4) Long datfala taem tufala man hia maet samting olsem 100 year, bikos Adam hem 130 year taem son bilong hem, Seth, hem born.—Genesis 4:25; 5:3.
Offering wea tufala givim showim hao Cain and Abel luksavve olketa sinner and laekem God for appruvim olketa. Masbi olketa bin ting raonem promis bilong Jehovah saed long datfala snek and datfala Seed bilong woman. Bible no talem haomas taem and strong nao Cain and Abel iusim for mekem grow wei for fren witim Jehovah long wei wea hem appruvim. Bat samting wea God duim saed long offering bilong tufala helpem iumi luksavve long really tingting bilong each wan.
Samfala savveman garem idea hao Eve hem ting long Cain olsem datfala “seed” wea bae finisim datfala snek, bikos taem hem born, Eve hem sei: “Mi bornem wanfala man witim help bilong Jehovah.” (Genesis 4:1) Sapos Cain tu bilivim diswan, hem barava rong. Long narasaed, Abel givim sakrifaes bilong hem witim faith. And so, “thru long faith Abel offerim long God wanfala sakrifaes wea moabeta winim Cain.”—Hebrews 11:4.
Spiritual savve bilong Abel wea Cain no garem, hem no only wei wea tufala brata hia difren from each other. Wei for tingting bilong tufala tu hem difren. Dastawe, “taem Jehovah hem lukluk witim hapi long Abel and offering bilong hem, hem no hapi long Cain and offering bilong hem.” Luk olsem Cain ting smol long wei for givim offering and just duim nomoa. Bat God no appruvim kaen worship olsem. Heart bilong Cain kamap wicked, and Jehovah luksavve hao rong samting nao muvim hem. Feeling bilong Cain taem Jehovah rejectim sakrifaes bilong hem showimaot really tingting bilong hem. Winim wei for trae for stretem diswan, “Cain kamap kros tumas, and feis bilong hem change.” (Genesis 4:5) Wei bilong hem showimaot olketa wicked idea and plan bilong hem.
Warning and Samting Hem Duim
From hem savve long tingting bilong Cain, God kaonselem hem olsem: “Why nao iu barava kros tumas and why nao feis bilong iu change? Sapos iu change for duim gudfala samting, waswe, bae hapi no kamap? Bat sapos iu no change for duim gudfala samting, sin hem sidaon long door, and hem barava wantem iu; and waswe long iu, bae iu winim hem?”—Genesis 4:6, 7.
Iumi savve lanem samting from diswan. Olketa chance for duim sin stap for trapim iumi. Nomata olsem, God givim iumi free will, and iumi savve chus for duim stret samting. Jehovah invaetem Cain for “change for duim gudfala samting,” bat Hem no forcem hem for change. Cain chusim wei bilong hemseleva.
Story long Bible hem go ahed for sei: “Bihaen datwan Cain sei long Abel brata bilong hem: ‘Iumi go long field.’ So taem tufala stap yet long field Cain hitim brata bilong hem Abel and killim hem dae.” (Genesis 4:8) Long wei olsem Cain hem kamap wanfala man wea disobey and no garem feeling wea min for killim dae narawan. Taem Jehovah askem hem: “Wea nao brata bilong iu Abel?” hem nating showimaot eni sorre. Bat, long bighed wei wea no garem feeling, Cain hem ansa: “Mi no savve. Waswe, mi nao man for lukaftarem brata bilong mi?” (Genesis 4:9) Wei wea hem laea stret and no laek for kasem blame showimaot hao heart bilong Cain no garem feeling.
Jehovah cursim Cain and raosem hem from area bilong Eden. Luk olsem datfala curse wea Jehovah putim finis long graon bae moa strong long graon wea Cain wakem, and earth bae no givim gud samting nomata hem waka hard long hem. Bae hem man wea ranawe and no stap long wan ples long earth. Wei wea Cain hem komplen abaotem disfala hardfala panis, hem from hem wari nogud samwan laek killim hem dae for changem Abel, bat hem nating showimaot fasin for repent. Jehovah putim “wanfala saen” for Cain—luk olsem wanfala law wea pipol savve abaotem and followim for stopem eniwan for killim hem dae for pei bak.—Genesis 4:10-15.
Then Cain hem “go from front long feis bilong Jehovah and stap long land for Ranawe long east saed bilong Eden.” (Genesis 4:16) Hem tekem dota bilong brata or sista bilong hem, or maet wanfala sista olsem waef and hem buildim wanfala taon wea hem kolem Enoch, nem bilong firstborn son bilong hem. Lamech wea kam from laen bilong Cain hem kamap raf man olsem hem. Bat famili laen bilong Cain hem finis long Flood long taem bilong Noah.—Genesis 4:17-24.
Olketa Leson for Iumi
Iumi savve lane from story abaotem Cain and Abel. Aposol John givim strongfala encouragement for olketa Christian for lovem each other, “no olsem Cain, wea hem kam from datfala nogud man and wea killim dae brata bilong hem.” ‘Olketa waka bilong Cain hem nogud, bat olketa waka bilong brata bilong hem hem raeteous.’ John sei tu: “Eniwan wea heitim brata bilong hem, hem man for killim dae samwan, and iufala savve hao man for killim dae samwan no garem laef olowe.” Yes, wei wea iumi deal witim olketa Christian brata bilong iumi hem affectim wei wea iumi fren witim Jehovah and laef bilong iumi long future. God bae no appruvim iumi sapos iumi heitim eni Christian brata bilong iumi.—1 John 3:11-15; 4:20.
Cain and Abel mas kasem sem training taem tufala growap, bat Cain no garem faith long God. Tru tumas, hem showimaot spirit bilong Devil, firstfala ‘man for killim dae man and father bilong laea fasin.’ (John 8:44) Samting wea Cain duim showim hao iumi evriwan savve chus. Diswan showim tu hao olketa wea chus for sin mekem olketa seleva stap separate from God, and hao Jehovah hem panisim olketa wea no repent.
Long narasaed, Abel showimaot faith long Jehovah. Tru nao, “thru long faith Abel offerim long God wanfala sakrifaes wea moabeta winim Cain, wea thru long disfala faith hem kasem witness hao hem raeteous and God givim witness abaotem olketa present bilong hem.” Nomata no eni toktok bilong Abel stap long Bible, thru long nambawan faith bilong hem, hem “still toktok.”—Hebrews 11:4.
Abel hem first wan bilong staka wea keepim faithful fasin. Jehovah nating forgetim blood bilong hem wea ‘krae aot long Hem from graon.’ (Genesis 4:10; Luke 11:48-51) Sapos iumi showimaot faith olsem Abel duim, iumi tu savve enjoyim spesol wei for fren witim Jehovah for olowe.
[Box long page 22]
DATFALA FARMER AND DATFALA SHEPHERD
Samfala first responsibility wea God givim for Adam hem for mekem samting grow long earth and for lukaftarem olketa animal. (Genesis 1:28; 2:15; 3:23) Son bilong hem Cain kamap farmer, and Abel kamap shepherd. (Genesis 4:2) From kaikai bilong olketa man bifor Flood hem olketa frut and vegetable nomoa, why nao olketa keepim sheep?—Genesis 1:29; 9:3, 4.
For stap gud, sheep needim olketa man for lukaftarem olketa. Waka bilong Abel pruvim hao olketa man keepim kaen animal olsem from start long history bilong olketa. Bible no talem sapos olketa first man iusim milk bilong olketa animal olsem kaikai, bat nomata pipol wea no savve kaikaim meat olketa savve iusim wool bilong sheep. And taem sheep dae, olketa savve iusim skin bilong olketa. Olsem example, Jehovah provaedem “longfala kaleko from skin bilong animal” for Adam and Eve.—Genesis 3:21.
Nomata wanem, luk olsem hem fitim iumi for tingse Cain and Abel waka gud tugeta firstaem. Olketa provaedem samting wea olketa narawan long famili needim saed long kaleko and kaikai.
[Piksa long page 23]
‘Olketa waka bilong Cain hem nogud, bat olketa waka bilong brata bilong hem hem raeteous’