Kwestin From Reader

Hao nao olketa spialaen for maritim olketa relative wea stap insaed Law Bilong Moses hem affectim olketa Christian distaem?

Law wea Jehovah givim for nation bilong Israel no talem staka samting abaotem olketa wedding ceremony or wei for duim olketa marit. Nomata olsem, datfala Law storyim olketa tambu saed long hu nao man savve maritim. Olsem example, long Leviticus 18:6-20, iumi lukim wanfala list bilong olketa tambu saed long sex witim “klos relative.” Datfala scripture givim planti information saed long wanem relative nao hem tambu for duim sex witim. Hem tru, olketa Christian no stap anda long Law Bilong Moses, or eni rul insaed long datwan. (Ephesians 2:15; Colossians 2:14) Nomata olsem, hem no minim olketa Christian savve ting nating long diswan taem olketa chusim marit partner. Samfala reason stap for diswan.

First samting, olketa gavman putim olketa law saed long wei for maritim olketa klos relative, and olketa Christian mas followim olketa law bilong kantri olketa stap insaed. (Matthew 22:21; Romans 13:1) Hem tru, evri ples maet garem difren law saed long diswan. Distaem, faondeson bilong planti law hia hem olketa gene. Hem barava tru hao, taem tufala klos relative marit, eni pikinini bilong olketa barava stap long danger for born nogud or garem enikaen sik. From disfala reason and from olketa Christian “stap anda long olketa hae paoa,” olketa followim law saed long marit long ples wea olketa stap.

Nara samting for tingim hem wanem nao stret or no stret long ples man hem stap. Klosap evri ples garem olketa rul and kastom wea tok strong againstim marit midolwan long tufala klos relative wea sem blood, and planti taem saed long kastom bilong olketa diswan hem olsem incest and dastawe hem tambu. Nomata kastom bilong wanfala ples maet putim tambu wea barava difren from nara ples, The Encyclopædia Britannica hem sei hao “klosap evritaem datfala tambu for olketa duim sex hem moa strong taem tufala barava klos relative.” Dastawe, nomata olketa Christian no duim incest, olketa no laek for duim eniting for barava againstim olketa kastom or feeling bilong community, mekem olketa stap klia long wei for pipol tok daonem Christian kongregeson or nem bilong God.—2 Corinthians 6:3.

Iumi mas tingim tu conscience wea God givim iumi. Evriwan born witim feeling for wanem hem stret and no stret, gud and nogud. (Romans 2:15) Sapos conscience bilong olketa hem waka long stretfala wei and garem feeling hem talem olketa wanem nao stret and fitim and wanem nao hem no natural and barava nogud. Jehovah hem point go long disfala tru samting taem hem givim olketa Israelite law bilong hem wea tambuim olketa klos relative for marit. Hem read olsem: “Wei wea land bilong Egypt duim, wea iufala stap long hem bifor, iufala mas no duim; and wei wea land bilong Canaan duim, wea mi tekem iufala go long hem, iufala mas no duim; and long law bilong olketa iufala mas no wakabaot.” (Leviticus 18:3) Olketa Christian barava tinghae long conscience bilong olketa wea Bible trainim and no letem krangge tingting bilong olketa nation saed long wanem hem stret and no stret for spoelem conscience bilong olketa.—Ephesians 4:17-19.

So, wanem nao evri samting hia minim for iumi? Nomata olketa Christian no stap anda long Law Bilong Moses, conscience bilong olketa talem olketa klia hao wei for maritim olketa klos relative—olsem dadi witim dota, mami witim son, brata witim sista—hem barava tambu for olketa Christian.a Saed long olketa nara relative wea klos tumas, olketa Christian luksavve hao olketa law stap saed long marit and tu olketa standard stap wea pipol and kastom acceptim. Iumi mas ting strong long olketa samting hia mekem iumi savve followim komand bilong Bible wea sei: “Letem marit garem honor midolwan long evriwan.”—Hebrews 13:4.

[Footnote]