Why Nao Datfala World Bifor Hem Distroe?
DATFALA worldwaed Flood hem no wanfala natural disaster. Hem wanfala judgment from God. Olketa kasem warning, bat olketa ting nating long hem. Why? Jesus minim olsem: “Bifor long flood, olketa [pipol] kaikai and drink, olketa man marit and givim olketa woman for marit, go kasem taem wea Noah hem go insaed long ark; and olketa nating lisin gogo flood hem kam and swipim olketa go.”—Matthew 24:38, 39.
Living wea Garem Planti Samting
Long samfala wei, datfala living bifor Flood garem gud saed wea iumi no garem distaem. Olsem example, evriwan garem wanfala languis nomoa. (Genesis 11:1) Diswan mekem olketa for muv go ahed saed long art and science wea needim wei for joinim tugeta olketa difren kaen savve wea pipol garem. And tu, wei wea planti pipol dat taem laef for longfala taem minim savve bilong olketa bae go ahed for grow from samting wea olketa bin lanem insaed staka handred year.
Samfala tingse laef bilong olketa man dat taem hem no really long tumas and olketa year wea olketa storyim long Bible hem really olketa month. Waswe, diswan hem tru? Tingim example bilong Mahalalel. Bible hem sei: “Mahalalel hem stap for sixti-faev year. Then hem kamap dadi long Jared. . . . Full laef bilong Mahalalel hem kasem eit handred and naenti-faev year then hem dae.” (Genesis 5:15-17) Sapos wanfala year hem minim wanfala month, Mahalalel kamap dadi long pikinini bilong hem taem hem faev year nomoa! So, wan year hem no wanfala month. Pipol dat taem still klos long perfect strong bilong firstfala man, Adam. Olketa really stap for staka handred year. Wanem nao olketa kasem?
Planti handred year bifor datfala Flood, population bilong earth grow big gogo pikinini bilong Adam, Cain, hem fit for buildim wanfala taon, wea hem kolem Enoch. (Genesis 4:17) Insaed taem bifor Flood, wei for wakem olketa difren kaen samting kamap. Ples for wakem “evrikaen tul bilong copper and iron” stap. (Genesis 4:22) Iumi sure olketa iusim olketa tul hia for construction, waka bilong carpenter, wakem kaleko, and agriculture. Olketa storyim evri waka hia insaed olketa story abaotem olketa first man wea stap long earth.
Savve wea olketa kasem helpem olketa genereson wea bae kam bihaen for mekem grow olketa savve hia olsem wei for wakem iron, studyim graon and plant, lukaftarem olketa sheep and buluka, raeting, and wei for wakem piksa, karving and music. Olsem example, Jubal hem “first wan long evri man wea iusim harp and pipe.” (Genesis 4:21) Living hem start for kamap long bigfala wei. Nomata olsem, seknomoa evri samting hem finis. Wanem nao happen?
Wanem Nao Go Rong?
Nomata living bifor Flood garem planti gud samting hem no start long gudfala wei. Man wea startim diswan, Adam, hem go againstim God. Cain, man wea buildim firstfala taon wea olketa recordim, killim dae brata bilong hem. Dastawe nogud fasin kamap kwiktaem tumas! Nogud laef wea Adam pasim long olketa pikinini bilong hem mekem olketa nogud samting go ahed for grow.—Romans 5:12.
Luk olsem evri samting gogo for kasem end taem Jehovah disaed hao hem bae letem living hia go ahed for nara 120 year nomoa. (Genesis 6:3) Bible hem sei: “Nogud fasin bilong man hem big tumas long earth and evri wei bilong tingting long heart bilong hem nogud evritaem. . . . Earth hem fulap witim raf fasin.”—Genesis 6:5, 11.
Gogo, God talem stret long Noah hao Hem bae distroem evri flesh long wanfala flood. (Genesis 6:13, 17) Nomata Noah kamap “wanfala man wea preach abaotem raeteous fasin,” luk olsem hem hard for pipol bilivim hao evri samting wea stap raonem olketa bae finis. (2 Peter 2:5) Eitfala pipol nomoa followim datfala warning and sev. (1 Peter 3:20) Why nao diswan hem important long iumi distaem?
Wanem Diswan Minim for Iumi?
Iumi stap long taem wea semsem witim taem bilong Noah. Evritaem iumi herem olketa man duim raf fasin, wei for killim dae full tribe, pipol witim gun killim dae staka nomata no really reason stap for duim diswan, and raf fasin insaed famili hem big tumas. Earth fulap moa witim raf fasin, and olsem bifor, world kasem warning abaotem wanfala judgment wea bae kam. Jesus seleva sei hem bae kam olsem Judge wea God appointim and separatem pipol olsem wanfala shepherd hem separatem sheep from olketa goat. Jesus hem sei olketa wea no fit “bae finis evribit.” (Matthew 25:31-33, 46) Bible sei hao distaem, staka million pipol bae stap laef—wanfala bigfala crowd wea worshipim only tru God. Long world wea bae kam, pipol hia bae enjoyim laef wea garem trufala peace and security wea nating kamap bifor.—Micah 4:3, 4; Revelation 7:9-17.
Planti pipol mekfani long disfala toktok bilong Bible and long olketa warning abaotem datfala judgment wea bae pruvim hao olketa toktok hia hem tru. Bat aposol Peter talem hao olketa man hia wea daot ting nating long tru samting. Hem raet olsem: “Long olketa last day pipol wea laek for mekfani bae . . . sei: ‘Wea nao disfala taem wea hem promisim hem bae stap moa?’ . . . Bikos, olsem olketa wantem, olketa no luksavve long disfala samting, hao heven stap from bifor kam and wanfala earth wea stap aotsaed long wata and midolwan long wata thru long word bilong God; and thru long olketa samting hia world bilong datfala taem hem finis evribit taem bigfala wata kavarem earth. Bat thru long sem word, heven and earth wea stap distaem olketa stap redy for fire and weitim day for judgem and for distroem olketa man wea no followim God.”—2 Peter 3:3-7.
For obeyim komand bilong Jesus, evriwea long world wanfala sekson strong for preachim warning abaotem disfala day bilong judgment wea bae kam and message bilong gud nius abaotem peace wea bae kam bihaen. (Matthew 24:14) Hem no fitim for ting smol long disfala warning. Olmaeti God bae fulfillim promis bilong hem.
World wea Bae Kam
Wanem nao future bilong olketa man, taem iumi ting abaotem important change wea bae kamap? Long introduction long Sermon bilong hem long Maunten wea staka pipol savve, Jesus promis olsem: “Hapi nao olketa wea garem kwaet fasin, from olketa bae kasem earth.” Then hem go ahed for teachim olketa disaepol bilong hem for prea olsem long God: “Letem will bilong iu kamap long earth, olsem long heven.” (Matthew 5:5; 6:10) Tru nao, Jesus seleva teachim hao wanfala nambawan future hem stap for olketa faithful man hia long earth. Hem storyim olsem “niu-creation.”—Matthew 19:28.
So taem iu ting abaotem future, no letem olketa man for mekfani mekem iu daotem warning bilong God. Tru, olketa samting wea stap raonem iumi maet luk olsem hem set for go ahed nomoa, and world bae stap for longfala taem. Nomata olsem, iumi shud no putim trust bilong iumi long hem. World bilong olketa man kasem judgment finis. So kasem encouragement from olketa lastfala toktok bilong leta bilong aposol Peter:
“From evri samting hia bae finis olsem, iufala mas kamap wanem kaen man long holy fasin and waka wea showimaot fasin for lovem God, weitim and tingting evritaem long taem wea day bilong Jehovah bae stap . . . From iufala weitim samting hia, duim best bilong iufala mekem long end, hem savve lukim iufala no garem mark or dirty, and long peace. . . . Go ahed for grow long kaeness wea man no fit for kasem and savve abaotem Lord and Man wea Sevem iumi, Jesus Christ.” (2 Peter 3:11, 12, 14, 18) Dastawe, lane from samting wea happen bifor long taem bilong Noah. Kam klosap long God. Grow long savve abaotem Jesus Christ. Mekem grow fasin for lovem God, and stap midolwan planti million wea chus for winim end bilong disfala world and go insaed datfala peaceful world wea bae kam.
[Piksa long page 5]
Pipol savve wakem iron bifor datfala Flood
[Piksa long page 7]
Wanfala nambawan future hem stap front long iumi