Give Gogo Iu Safa

“IU SAVVE kolem mi man for beg; hem gud nomoa. Mi beg for kasem selen for Jesus.” Disfala toktok bilong wanfala Protestant minister hem mekhae long datfala big kwestin saed long wei wea religion kasem selen. Luk olsem sapos religion no kasem staka selen from pipol bae hard for hem go ahed. Olketa needim selen for peim salary, buildim and keepim gud olketa temple, and for evangelizing waka. From wea nao bae olketa kasem selen olketa needim?

For staka church, ansa hem wei for givim tithe.a Evangelist Norman Robertson hem sei: “Tithe hem wei bilong God for saportim kingdom bilong Hem long earth saed long selen. Diswan hem wei bilong God for kasem selen mekem church fit for preachim datfala Gospel.” Long wei for no shame for remindim olketa follower bilong hem hao hem responsibility bilong olketa for give, hem talem stret: ‘Wei for givim tithe hem no samting iu duim bikos iu fit for peim. Hem wei for obey. Sapos iu no givim, iu brekem komand bilong God. Hem fasin for steal.’—Tithing—God’s Financial Plan.

Staka bae agree hao wei for give hem shud part bilong Christian worship. Bat, waswe, iu faendem hem mekem iu feel no mas gud taem olketa evritaem askem selen? Savveman bilong religion from Brazil, Inácio Strieder, sei Church iusim wei for givim tithe olsem wei for “stretem olketa problem bilong hem,” and hem kolem diswan wei wea “no followim law, mekius long pipol, and go difren from teaching.” Hem sei samting wea kamaot from diswan nao hem wei wea “pipol wea no garem waka, olketa widow, pipol wea no garem gud haos, and olketa wea no savve ting stret tingse God lusim olketa, and from olketa mas givim big selen long ‘preacher,’ famili bilong olketa seleva hangre.”

Maet iu askem iuseleva: ‘Waswe, olketa church wea mekhae long wei for givim tithe followim Bible long stretfala wei? Or waswe, maet samfala religion mekius long wei wea pipol fraetem panis from God for forcem olketa for givim selen? Waswe, hem stret for sei God expectim iumi for give go kasem taem iumi safa?’

[Footnote]