Laef Insaed Refugee Camp
WANEM nao iu tingim taem iu herem toktok “refugee camp”? Waswe, iu enitaem visitim wanfala ples olsem? Hao nao lukluk bilong hem?
Taem mifala raetem disfala story, 13-fala refugee camp nao stap long west saed bilong Tanzania. Gavman bilong Tanzania, wea waka tugeta witim United Nations High Commissioner of Refugees (UNHCR), hem helpem 500,000 refugee from olketa nara kantri long Africa wea ranawe from war long kantri bilong olketa. Hao nao living insaed wanfala camp?
Arrive Long Camp
Wanfala teenage girl, Kandida, hem explainim samting wea happen taem hem and famili bilong hem arrive long there tu-thri year bifor: “Olketa givim mifala wanfala ration card wea garem ID namba, and putim mifala long Nyarugusu refugee camp. Long there, olketa givim mifala namba bilong ples wea mifala bae stap. Olketa showim mifala ples for katem tree and kolektem grass for buildim smol haos bilong mifala. Mifala wakem olketa mud brik. UNHCR givim mifala wanfala big plastic kava wea mifala putim long ruf. Hem hard waka, bat mifala hapi taem mifala finis buildim simpol haos bilong mifala.”
Mifala iusim datfala ration card evri mek-tu Wednesday. “Yes, mifala laen ap for kolektem kaikai wea UNHCR givimaot,” Kandida sei.
Wanem nao man kaikaim insaed wan day?
“Each wan kasem samting olsem thrifala kap maize (corn) flour, wanfala kap peas, 20 gram soya, 2 tablespoon oil for kuki, and 10 gram salt. Samfala taem mifala kasem tu wanfala bar soap, wea hem ration for wan month.”
Waswe klin wata? Hem stap tu? Wanfala young woman, Riziki, hem sei: “Yes, olketa pumpim kam wata from wanfala river thru long olketa pipe go insaed olketa bigfala wata tank. Olketa putim chlorine insaed wata and pumpim diswan go long olketa wata pipe long olketa difren camp. Nomata olsem mifala boelem wata bifor mifala drinkim for trae stap klia from sik. Staka taem mifala busy start long morning go kasem evening for kolektem wata and wasim kaleko long olketa wata pipe hia. Olketa letem mifala for kasem wan and haf baket wata nomoa insaed wanfala day.”
Sapos iu draev pasim wanfala camp, maet iu savve lukim olketa pre-skul, primary skul, and secondary skul. Maet samfala skul for olketa full-grown pipol tu stap. Wanfala police station and gavman office stap just aotsaed long camp for keepim camp sef. Maet iu lukim wanfala big market witim staka smol stoa wea olketa refugee savve kasem vegetable, frut, fish, chicken, and olketa nara main kaikai. Samfala pipol wea no stap long camp kam long market for sellim samting. Bat wea nao olketa refugee kasem selen for baem samting? Samfala garem smol vegetable garden and sellim samting olketa growim long market. Olketa narawan maet sellim samfala flour or peas olketa kasem and iusim selen for peim meat or frut. Tru nao, wanfala camp savve luk olsem wanfala big vilij and no wanfala camp. Hem normal samting for lukim pipol laflaf and hapi long market, olsem olketa duim long hom bilong olketa.
Sapos iu visitim hospital, wanfala doctor maet talem iu hao samfala clinic stap long camp wea savve treatim olketa smol sik. Olketa emergency and serious sik nomoa kasem hospital. Maternity ward and rum for bornem baby kamap important part bilong hospital taem iumi tingim wei wea, long wanfala camp wea garem 48,000 refugee, samting olsem 250 baby olketa born insaed wan month.
Planti Spiritual Kaikai
Raonem world, Olketa Jehovah’s Witness maet laek savve abaotem olketa spiritual brata bilong olketa insaed olketa camp long Tanzania. Evriwan tugeta hem 1,200, wea olketa insaed 14-fala kongregeson and 3-fala grup. Hao nao olketa?
Wanfala long olketa first samting olketa faithful Christian hia duim taem olketa kasem olketa camp hem for askem pis land for buildim Kingdom Hall. Diswan bae mekem olketa nara refugee savve wea for faendem olketa Witness and wea for attendim olketa meeting bilong olketa wea kamap evri week. Long Lugufu camp, 659 active Christian stap insaed 7-fala kongregeson. Long olketa Sunday meeting, samting olsem 1,700 nao attendim meeting long 7-fala kongregeson.
Olketa Witness insaed evri camp kasem gud samting tu from olketa big Christian assembly and convention. Long firstfala distrik convention wea kamap long Lugufu camp, 2,363 nao attend. Olketa Witness buildim wanfala pool for baptism klosap long ples bilong convention. Disfala pool hem wanfala hol wea olketa digim, kavarem witim plastic, and then fulimap witim wata. Olketa brata iusim bicycle for karem wata from wanfala river wea stap 2 kilometer awe. Olketa karem 20 litre each wei, wea minim staka taem for go and kam. Olketa wea redy for baptaes laen ap for baptism witim kaleko wea showaot respect. Fifti-six pipol nao baptaes taem olketa go anda long wata evribit. Wanfala full-taem minister wea olketa interviewim long convention talem hao hem studyim Bible witim 40-fala pipol. Fofala long olketa student bilong hem hia baptaes long datfala convention.
Branch office bilong olketa Jehovah’s Witness arrange for olketa traveling overseer visitim olketa camp hia. Wanfala long olketa sei: “Olketa brata bilong iumi olketa go ahed strong long ministry. Olketa garem bigfala territory for preach long hem, and long wanfala kongregeson, each Witness hem iusim 34 hour evri month long ministry. Staka conductim faev or moa Bible study witim olketa wea interest. Wanfala pioneer [full-taem minister] sei no eni territory bae moabeta winim datwan. Pipol long olketa camp barava enjoyim olketa pablikeson.”
Hao nao olketa Bible literature kasem olketa camp? Branch sendem thru long train go long Kigoma, wanfala taon long east saed bilong Lake Tanganyika. Olketa brata kasem olketa pablikeson and arrange for tekem olketa hia go long olketa kongregeson. Samfala taem olketa rentim wanfala trak and olketa seleva nao tekem olketa literature go long olketa camp. Diswan hem tekem samting olsem thri or fofala day long olketa barava nogud road.
Olketa Help Long Material Wei
Olketa Jehovah’s Witness long France, Belgium, and Switzerland barava help for provaedem need bilong olketa refugee long olketa camp hia. Ministry of Home Affairs and UNHCR letem samfala for visitim olketa camp long Tanzania. Olketa Witness long Europe kolektem staka soy milk, kaleko, shoe, skulbuk, and soap. Olketa givimaot olketa samting hia long evri refugee, olsem Bible hem talem: “From iumi garem taem wea hem fitim, iumi shud duim gud samting long evriwan, bat main wan nao long olketa wea garem sem faith olsem iumi.”—Galatians 6:10.
Olketa help olsem duim bigfala samting, and hem bigfala help for olketa refugee. The Refugee Community Committee bilong wanfala long olketa camp hia talem thankiu toktok olsem: “For saed bilong full community, hem wanfala honor for talem thankiu for kaenfala fasin wea organization bilong iufala givim thrifala taem . . . 12,654 man, woman, and pikinini, witim olketa baby wea just born tu, kasem kaleko olketa needim . . . Muyovozi refugee camp distaem garem 37,000 refugee. Evri help hia helpem 12,654 pipol, 34.2 percent bilong population.”
Long narafala camp, 12,382 refugee kasem thrifala kaleko each, and nara camp kasem staka thousand skulbuk for iusim long olketa secondary and primary skul and olketa ples for lukaftarem smol pikinini. Wanfala wakman bilong UNHCR hem sei: “Mifala thankiu tumas for donation wea mifala kasem [wea fulfillim] bigfala need bilong pipol long olketa refugee camp. Last donation mifala kasem hem faevfala container bilong olketa skulbuk, wea olketa community service bilong mifala givimaot long olketa refugee. . . . Thankiu tumas.”
Olketa lokol niuspepa tu storyim help wea olketa Witness givim. Wanfala story insaed Sunday News niuspepa bilong May 20, 2001, hem garem title: “Kaleko for Olketa Refugee Long Tanzania Olketa Kam.” Sem niuspepa hia, bilong February 10, 2002, hem sei: “Olketa refugee tinghae long donation bikos samfala long olketa pikinini, wea finis skul from olketa no garem kaleko, distaem olketa skul bak moa.”
Hard Tumas Bat Kasem Help
Hem tekem samting olsem wan year for staka long olketa refugee getius long living long camp. Olketa garem simpol living. Olketa Jehovah’s Witness long olketa camp hia iusim staka taem bilong olketa for sharem gud nius from Word bilong God, Bible, wea givim comfort, long olketa nara refugee neiba bilong olketa. Olketa story abaotem wanfala niu world, wea evri pipol “mas hammerim sword bilong olketa for kamap hou, and spia bilong olketa for kamap naef for katem tree. Olketa bae no iusim sword, nation againstim nation, and bae olketa no lanem war moa.” Then evriwan “bae sidaon anda long vine bilong hem and anda long fig tree bilong hem, and no eniwan bae mekem olketa seksek; from barava mouth bilong Jehovah bilong olketa army hem talem finis.” Tru nao, witim blessing bilong God, disfala world bae no garem olketa refugee camp moa.—Micah 4:3, 4; Psalm 46:9.
[Piksa long page 8]
Olketa haos long Nduta camp
[Olketa Piksa long page 10]
Lukole Kingdom Hall (raet saed) Baptism long Lugufu (daon)
[Piksa long page 10]
Distrik convention long Lugufu camp