Mifala Hapi for Invaetem Iu

DATFALA Lord’s Supper, wea Lord Jesus Christ startim samting olsem 2,000 year go finis, hem no samting saed long history nomoa. Start kam from taem hem start, hem affectim pipol long bigfala wei. From wanem olketa readim insaed olketa Gospel abaotem samting wea happen long datfala naet, datwan muvim planti pipol for celebratem Lord’s Supper long planti difren wei.

Iumi luksavve long diswan, from Jesus Christ seleva givim komand for olketa follower bilong hem for keepim and for go ahed for duim. Hem talem olketa: “Go ahed for duim olsem for rememberim mi.”—Luke 22:19; 1 Corinthians 11:23-25.

Bat, for barava enjoyim datfala celebration, man mas garem stretfala savve long mining bilong hem, wea Word bilong God Bible nao provaedem. And witim datwan, hem important for savve wanem Bible talem abaotem day and taem and hao for keepim datfala celebration.

For obeyim datfala komand bilong Jesus, Olketa Jehovah’s Witness raonem world bae hipap tugeta long evening long Wednesday, April  16, 2003, for rememberim dae bilong Jesus. Hem bae wanfala taem for olketa lukluk long olketa scripture and for mekem niu moa faith and love for Lord Jesus Christ, wea sei: “From God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Mifala hapi tumas for invaetem iu for kam hipap witim olketa long datfala evening mekem iu tu savve strongim faith and love for Jesus Christ and Father bilong iumi long heven, Jehovah God.