Video for Kasem Heart Bilong Olketa Young Wan

PLANTI young pipol kasem encouragement for lukluk long fasin bilong olketa seleva taem olketa lukim datfala video Young People Ask—How Can I Make Real Friends?a Datfala video garem olketa gudfala kaonsel from Bible, olketa toktok wea kam from olketa young Christian, and wanfala drama wea muvim man wea kam from story from Bible abaotem Dinah. (Genesis, chapter 34) Olketa toktok long daon abaotem datfala video kam from Mexico.

Martha sei: “Datfala video barava affectim heart bilong mi. Hem olsem olketa wakem especially for mi. Mi tingse hem inaf for olketa teacher and olketa skulfren savve mi wanfala Jehovah’s Witness. Mi fail for pruvim datwan long wei for witness long olketa. Mi thankiu long Jehovah for evri information wea hem provaedem, especially long wei wea disfala video affectim iumi long bigfala wei.”

Juan Carlos sei: “Disfala video barava mekem man tingting. Olsem wanfala young man, mi mekem samfala mistek and mi garem sem feeling olsem samfala insaed datfala drama. Samfala year wea go pas finis, mi garem dabol laef, bat mi luksavve datkaen laef bae leadim man for kasem nogud samting. Bihaen mi lukim datfala video, mi barava disaed strong for mas faithful long Jehovah.”

Sulem talemaot: “Taem mi lukim datfala video, heart bilong mi barava feel sorre. Bifor, mi stop for readim Bible, and mi no prea evritaem long Jehovah. Taem mi lisin long olketa koment wea olketa young pipol talem insaed long datfala video, datwan muvim mi for startim bak wei for studyim Bible and for prea long Jehovah.”

Young pipol distaem feisim planti challenge, and fren wea olketa chusim savve evritaem affectim laef bilong olketa. (Psalm 26:4; Proverbs 13:20) Datfala video Young People Ask—How Can I Make Real Friends? hem helpem planti young wan for mekem gudfala disison saed long diswan.

[Footnote]