Wanem Nao Happen Long Olketa?
NOPH and No hem olketa Bible nem for Memphis and Thebes, tufala kapitol taon bilong Egypt bifor wea staka savve long hem. Noph (Memphis) hem stap samting olsem 23 kilometer south long Cairo, long west saed bilong Nile River. Nomata olsem, gogo Memphis hem lusim wei wea hem olsem kapitol taon bilong Egypt. Long start nomoa bilong mek-15 century B.C.E., No (Thebes), hem kamap niufala kapitol taon bilong Egypt wea stap samting olsem 500 kilometer south long Memphis. Midolwan planti temple long Thebes wea finis evribit hem datwan bilong Karnak, wea no eni nara building wea olketa wakem witim olketa bigfala post hem big winim hem. Thebes and datfala Karnak temple, olketa dedicatem long worship bilong Amon, chief god bilong olketa long Egypt.
Wanem nao Bible profesi talemaot abaotem Memphis and Thebes? Hem talemaot nogud judgment againstim Pharaoh bilong Egypt and olketa god bilong hem, especially datfala chief god, “Amon bilong No.” (Jeremiah 46:25, 26) Pipol wea go for worship long there bae “finis evribit.” (Ezekiel 30:14, 15) Hem nao samting wea happen. Only samting wea stap yet long worship bilong Amon hem olketa samting wea stap bihaen bilong datfala temple wea distroe. Taon bilong Luxor distaem hem stap long ples wea Thebes stap bifor, and samfala nara sismol vilij tu stap long there.
No eniting stap long Memphis, only beregraon nomoa. Man for studyim Bible Louis Golding hem sei: “For planti handred year olketa Arab wea tekovarem Egypt iusim staka samting wea stap bihaen bilong Memphis wea distroe olsem wanfala ples for kasem olketa ston for buildim kapitol taon bilong Egypt [Cairo] long narasaed long river. Gudfala building waka bilong olketa Arab and gravel bilong Nile River mekem iu no savve lukim eni ston showaot antap long graon for planti kilometer long ples wea datfala taon stap bifor.” Tru tumas, olsem profesi long Bible talem, Memphis kamap ‘samting for sapraes long hem . . . wea no eniwan stap insaed.’—Jeremiah 46:19.
Diswan hem tufala nomoa long planti example wea showimaot hao olketa Bible profesi stret evribit. Wei wea Thebes and Memphis finis evribit givim iumi strong reason for barava trustim olketa Bible profesi wea no fulfill yet.—Psalm 37:10, 11, 29; Luke 23:43; Revelation 21:3-5.
[Piksa Credit Line long page 32]
Photograph taken by courtesy of the British Museum