“Wanfala Best Day Long Laef Bilong Mi”
BEYONDBLUE, wanfala organization long Australia wea gavman sapotim hem sei: “Sorre feeling wea no savve finis, hem nao wanfala problem bilong olketa young wan wea staka pipol ting hem barava serious and olketa herem evritaem.” Olketa faendemaot hao evri year samting olsem 100,000 young pipol long Australia safa long sorre feeling olsem.
Sorre feeling wea no savve finis kasem olketa young Christian tu. Bat, faith long Jehovah helpem staka long olketa for deal witim datfala problem and iusim gud young laef bilong olketa. Taem olketa duim olsem, datwan mekem nara pipol tinghae long olketa. Wanem nao olketa duim?
Tingim experience bilong Claire, wanfala gele wea 18 year. Hem and mami bilong hem member bilong wanfala kongregeson bilong Olketa Jehovah’s Witness long Melbourne. Claire start for feel sorre bihaen dadi bilong hem lusim olketa. Bat faith bilong hem long Jehovah, Dadi bilong hem long heven, gohed strong. Wanday, Lydia, wea hem doctor bilong olketa, visit kam for lukim mami bilong Claire from hem sik. Bihaen, Claire laek for go long stoa and datfala doctor sei hem willing for tekem hem long car. Taem tufala long road, datfala doctor askem Claire sapos hem garem eni boyfren. Claire sei hem wanfala Jehovah’s Witness, so hem bae no fren olobaot. Datfala doctor barava sapraes. Then Claire explainim hao Bible nao helpem hem for mekem olketa wise disison long laef bilong hem. Gogo, Claire sei bae hem givim hem wanfala Bible pablikeson wea barava helpem hem. Title bilong datfala buk hem Questions Young People Ask—Answers That Work.
Thrifala day bihaen Lydia tekem buk hia, hem ringim mami bilong Claire long telephone for sei hem laekem tumas datfala buk. Then hem askem sixfala buk moa for olketa narafala doctor. Taem Claire tekem go olketa buk hia, datfala doctor sei hem tinghae tumas long faith bilong Claire. Claire talem datfala doctor hao hem willing for studyim Bible witim hem, and datfala doctor acceptim.
For samfala month, Claire conductim datfala study taem doctor hia spel for lunch. Gogo, Lydia askem Claire sapos hem olraet for hem story abaotem wei wea olketa young wan feel sorre long wanfala meeting. Claire acceptim, nomata hem fraet lelebet. Winim 60 pipol nao kam long datfala meeting. Fofala savveman saed long kaen sik olsem—evriwan bigman finis—olketa story for evriwan wea hipap. Then hem kasem taem bilong Claire for story. Hem strongim hao hem important for olketa young wan fren witim God. Hem explainim hao Jehovah God hem barava kea for olketa young wan wea want for kasem sapot and comfort from hem. Hem talem tu hem bilivim hao klosap nao Jehovah bae finisim evri sik long body and mind. (Isaiah 33:24) Wanem nao kamaot from disfala nambawan witness?
Claire hem sei: “Taem meeting finis, staka kam and sei olketa hapi tumas for herem wanfala young wan tok abaotem God. Mi givimaot 23-fala Young People Ask buk. Thrifala gele long olketa wea hipap givim telephone namba bilong olketa long mi. Distaem wanfala long olketa gele hia studyim Bible nao. Hem wanfala best day long laef bilong mi.”