Teachim Olketa Pikinini Bilong Iu for Givim Koment

PERLA, wea kam from Mexico, rememberim hao taem hem smol gele mami bilong hem helpem hem for preparem olketa shortfala koment for givim long Wastaoa Study. Distaem Perla garem wanfala son wea hem faev year. Hao nao hem helpem son bilong hem? “Firstaem, miseleva mas studyim Wastaoa. Taem mi duim datwan, mi lukaotem wanfala paragraf wea hem isi for son bilong mi minim and wea hem savve explainim long toktok bilong hemseleva. Then mitufala lukluk gud long datwan. Hem kolem ‘paragraf bilong mi.’ Mi askem hem for iusim eni simpol example wea hem minim for explainim datfala paragraf long mi. Then mitufala practicem datfala koment tu-thri taem. Mifala iusim samting wea sem size olsem microphone mekem hem practicem hao for holem gud datwan taem hem givim koment bilong hem. Mi barava hapi hao long evri meeting hem givim koment or apim hand bilong hem. Plande taem, hem story witim conductor bifor meeting hem start and talem hem wanem kwestin nao hem laek for ansarem.”

Jens, wanfala elder long wanfala Hindi languis grup hem garem tufala son wea age bilong olketa, foa and tu. Taem hem and waef bilong hem prepare for meeting witim olketa pikinini, olketa followim example wea Jens lanem from parents bilong hem. Hem sei: “Mifala disaedem wanem samting insaed datfala article olketa pikinini fit for minim. Then mifala trae for storyim olketa main point bilong datfala article long olketa and then askem olketa kwestin wea mifala laekem olketa for ansarem long meeting. Plande taem mifala sapraes long ansa wea olketa givim wea kam from heart bilong olketa. Samting olketa talem barava showimaot samting wea olketa minim. Diswan mekem ansa bilong olketa hem barava givim praise long Jehovah and hem showimaot faith bilong olketa pikinini.”