Praisem Jehovah “Midolwan Long Kongregeson”

OLKETA Christian meeting hem arrangement bilong Jehovah for keepim pipol bilong hem strong long spiritual wei. For attendim olketa meeting evritaem, iumi showimaot iumi tinghae long olketa samting wea Jehovah provaedem. And tu, iumi help for “muvim [olketa brata] for showimaot love and gudfala waka,” wea hem wanfala important wei for iumi showimaot love long each other. (Hebrews 10:24; John 13:35) Bat, hao nao iumi savve muvim olketa brata long olketa meeting?

Talemaot Long Pablik

King David raet olsem abaotem hemseleva: “Mi bae talemaot nem bilong iu long olketa brata bilong mi; midolwan long kongregeson nao mi bae praisem iu. Long big kongregeson mi bae praisem iu.” “Mi bae praisem iu long big kongregeson; midolwan long planti pipol mi bae praisem iu.” “Mi talem datfala gud nius bilong raeteous fasin long big kongregeson. Lukim! Mi no stopem lips bilong mi.”—Psalm 22:22, 25; 35:18; 40:9.

Long taem bilong aposol Paul, taem olketa Christian hipap for worship, olketa tu talemaot faith long Jehovah and abaotem glory bilong hem. Long wei olsem olketa encouragem and muvim each other for showimaot love and gudfala waka. Distaem, winim planti handred year bihaen David and Paul, iumi barava “luksavve datfala day [bilong Jehovah] hem kam klosap.” (Hebrews 10:24, 25) System bilong Satan hem gogo for finis, and olketa problem go ahed for kamap moa big. Winim enitaem bifor, iumi “garem need for go ahed strong.” (Hebrews 10:36) Olketa brata nao fit evribit for encouragem iumi for go ahed strong.

Distaem, olsem long taem bifor, Jehovah provaedem for each wan wea biliv chance for talemaot faith “midolwan long kongregeson.” Wanfala samting wea evriwan savve duim nao hem for givim koment long olketa kongregeson meeting. Tingim hao gud samting savve kamaot from koment bilong iu. Olsem example, koment wea showimaot hao for winim or stap klia long olketa problem savve strongim olketa brata for disaed strong for followim olketa Bible principle. Koment wea explainim scripture wea olketa no raetem toktok bilong hem insaed paragraf or information from research bilong iu savve encouragem olketa narawan for mekem grow gudfala wei for study.

For savve hao evriwan kasem gud samting taem iumi givim koment shud muvim evri Jehovah’s Witness for winim fasin for fraet. Hem barava important for olketa elder and ministerial servant givim koment long olketa meeting, from olketa nao mas showimaot example long diswan and for evritaem attendim olketa meeting. Bat, hao nao man savve kamap moabeta sapos hem faendem hard tumas for givim koment?

Olketa Idea for Kamap Moabeta

Remember hao hem part long worship for Jehovah. Wanfala Christian sista long Germany talem tingting bilong hem olsem: “Koment wea mi givim hem for ansarem Satan from hem trae for mekem pipol bilong God for no talemaot faith bilong olketa.” Wanfala brata wea just baptaes wea attendim datfala sem kongregeson sei: “Mi savve prea planti taem mekem mi savve givim koment.”

Prepare gud. Sapos iu no studyim datfala information firstaem, bae hem hard for iu givim koment and koment bilong iu bae no mas helpem man. Olketa idea long hao for givim koment hem stap long buk Kasem Gud Samting From Theocratic Ministry Skul Education, page 70.a

Markem goal for givim wanfala koment long each meeting. Preparem samfala ansa, mekem iu savve apim hand planti taem, from diswan nao bae mekem conductor chusim iu for givim koment. And tu, iu savve talem conductor firstaem abaotem olketa kwestin wea iu prepare for ansarem. Diswan savve help sapos iu just start nomoa for givim koment. Iu maet fraet lelebet for apim hand bilong iu “long big kongregeson,” bat for savve hao iu nao redyim ansa for disfala paragraf and conductor bae lukluk for hand bilong iu bae encouragem iu for givim koment.

Koment long start. Wanfala hard samting for duim hem no savve kamap isi taem iu leavim firstaem. For givim koment long start bilong meeting savve helpem iu. Then hem bae moa isi for givim koment bihaen iu givim datfala first koment.

Chusim gud ples for sidaon. Samfala faendem hem isi for givim koment taem olketa sidaon long front long Kingdom Hall. No staka samting bae disturbim olketa, and conductor savve lukim hand bilong olketa. Sapos iu sidaon long front, remember for tok laod mekem evriwan herem, diswan hem moa tru sapos kongregeson no garem microphone.

Lisin gud. Diswan savve helpem iu for no talem moa sem ansa wea samwan talem finis. And tu, koment bilong olketa narawan maet mekem iu tingim wanfala scripture or wanfala point wea join witim koment wea samwan just talem. Samfala taem, wanfala shortfala experience savve mekhae long wanfala point. Olketa koment olsem savve barava helpem iumi.

Lane for ansa long toktok bilong iuseleva. For readim koment from datfala study pablikeson showimaot iu faendem stretfala ansa, and hem wanfala gud wei for start givim koment. Bat taem iu ansa long toktok bilong iuseleva hem showimaot iu minim gud datfala point. Iumi no need for talem sem toktok wea stap insaed olketa pablikeson. Olketa Jehovah’s Witness no duim olsem.

Koment nomoa abaotem datfala subject. Hem no fitim for givim koment wea no abaotem datfala subject or wea no join witim olketa main point. So koment mas abaotem datfala subject nomoa. Olketa koment olsem savve buildimap man long spiritual wei and mekem theme kamap moa klia.

Garem goal for encouragem narawan. From main reason for givim koment hem for encouragem olketa narawan, iumi mas stap klia for givim koment wea mekem man wikdaon. Nara samting tu, no koment long evri point long datfala paragraf from diswan bae mekem olketa narawan no garem chance for givim koment. Olketa ansa wea long tumas or hard for minim savve mekem mining no klia. Olketa short ansa wea garem samfala toktok nomoa savve barava help, and diswan bae encouragem olketa niu wan for talem olketa shortfala ansa wea olketa preparem.

Responsibility Bilong Conductor

Conductor garem bigfala responsibility for encouragem evriwan. Hem showimaot interest taem hem lisin gud long olketa koment and luk long datwan wea givim koment and no busy for duim difren samting. Hem bae no mas gud sapos hem talem moa sem samting or askem moa kwestin wea olketa just ansarem finis!

Conductor bae no encouragem man sapos evritaem hem talem moa olketa koment and changem lelebet, olsem hem tingse datfala koment hem no mas gud. Bat, long nara saed hem gud tumas taem olketa koment help for storyim moa wanfala important point. ‘Hao nao iumi savve duim diswan insaed kongregeson?’ or, ‘Wanem scripture long paragraf nao saportim datfala koment?’ For askem olketa kwestin olsem nao savve encouragem wei for givim olketa gudfala koment, wea evriwan bae kasem gudfala samting.

Iumi shud praisem olketa niu wan or olketa wea fraet taem olketa givim koment. Iumi savve duim olsem bihaen study for no mekem hem feel shame and tu for conductor givim hem samfala idea wea fitim.

Long taem for story, man wea laek for hemseleva nomoa story bae stopem gudfala wei for story. Olketa wea lisin bae feel olketa no need for story nao. Olketa bae lisin bat no barava interest. Sem kaen samting savve happen sapos conductor seleva nomoa koment planti taem. Bat, samfala taem conductor savve muvim tingting bilong audience taem hem askem extra kwestin. Hem shud no ova tumas long diswan.

Conductor maet no need for askem first man wea apim hand bilong hem. Sapos hem duim olsem diswan bae no helpem olketa wea needim lelebet taem for ting raonem wanem for talem. Wei for weit lelebet, bae givim chance long samwan wea no givim koment yet. Hem bae showimaot fasin for luksavve taem hem no askem smol pikinini for ansarem kwestin wea no fitim hem.

Waswe sapos samwan talem wanfala rong ansa? Conductor shud stap klia long wei for mekem datfala man feel shame. Nomata taem olketa koment hem rong, samfala taem lelebet part bilong hem stret. Wanfala conductor savve stretem datfala koment long wei for no mekem man shame taem hem mekhae long part long koment wea stret, askem moa datfala kwestin long difren wei or askem wanfala extra kwestin.

Conductor savve encouragem evriwan for koment taem hem no askem kaen kwestin olsem: ‘Waswe, eniwan garem eni koment moa?’ And disfala kwestin, ‘Hu nao no koment yet? Diswan nao last chance bilong iu!’ maet luk olsem hem gud, bat hem no encouragem man for talemaot tingting bilong hemseleva. Conductor shud no mekem olketa brata feel guilty from olketa no givim koment long start bilong study. Bat, olketa shud kasem encouragement for sharem savve bilong olketa from diswan showimaot love. Nara samting moa, bihaen conductor askem samwan for givim koment, hem moabeta for no sei, “Bihaen hem, iumi bae herem koment bilong Brata So-and-so and then Sista So-and-so.” Conductor shud firstaem lisin long datfala koment and then disaed sapos need stap for nara koment moa.

For Givim Koment Hem Wanfala Privilege

Hem wanfala spiritual need for attendim olketa Christian meeting. For givim koment hem wanfala privilege. Taem iumi duim olsem hem wanfala spesol wei for praisem Jehovah “midolwan long kongregeson” and long wei olsem iumi followim example bilong David and obeyim kaonsel bilong Paul. For givim koment showimaot iumi lovem olketa brata and iumi part long big kongregeson bilong Jehovah. Iumi laek for evritaem attendim olketa meeting from ‘iumi luksavve datfala day hem kam klosap.’—Hebrews 10:25.

[Footnote]

[Olketa Piksa long page 20]

Hem important for lisin and givim koment long olketa Christian meeting

[Piksa long page 21]

Conductor showimaot hem barava interest long evri koment