Followim Toktok Bilong God Long Evri Samting
“Disfala God hem God bilong iumi for olowe. Hem nao bae leadim iumi go kasem taem iumi dae.”—PS. 48:14.
1, 2. Why nao iumi mas trustim Jehovah nomoa for leadim iumi and no long savve bilong iumiseleva? Wanem nao olketa kwestin wea bae iumi ansarem?
HEM isi tumas for iumi tingse olketa iusles samting hem gud nomoa. (Prov. 12:11) Plande taem, heart bilong iumi savve talem iumi hem gud nomoa for duim samting wea iumi laek tumas for duim, nomata hem no fitim wanfala Christian for duim datwan. (Jer. 17:5, 9) Dastawe man wea raetem psalm showimaot hem garem gudfala tingting taem hem prea olsem long Jehovah: “Plis iu showim kam laet bilong iu and talem kam tru toktok bilong iu for leadim mi.” (Ps. 43:3) Hem trustim Jehovah nomoa for leadim hem and no long savve bilong hemseleva, from hem savve Jehovah nomoa savve helpem hem. Olsem man wea raetem psalm, hem gud for iumi tu trustim God for leadim iumi.
2 Bat why nao iumi mas luksavve Jehovah nomoa fit for leadim iumi? Wanem taem nao iumi barava needim datwan? Sapos iumi laekem Jehovah for leadim iumi, iumi mas waswe? And long wanem wei nao Jehovah hem leadim iumi distaem? Disfala study bae ansarem olketa important kwestin hia.
Why Nao Iumi Mas Trustim Toktok Bilong Jehovah?
3-5. Why nao iumi barava trustim toktok bilong Jehovah?
3 Jehovah hem Dadi bilong iumi wea stap long heven. (1 Cor. 8:6) Hem savve gud long iumi wanwan and long tingting bilong iumi. (1 Sam. 16:7; Prov. 21:2) King David hem sei olsem long God: “Iu savve finis long evri samting wea mi duim. Nomata iu stap farawe, iu savve nomoa long tingting bilong mi. Nomata mi no toktok yet, bat Jehovah iu savve finis long olketa samting wea bae mi talem!” (Ps. 139:2, 4) From Jehovah savve gud long iumi, hem savve wanem nao bae helpem iumi! Jehovah nomoa garem bigfala savve. Hem savve lukim evri samting wea man no savve lukim, and hem savve wanem nao bae kasem iumi taem iumi duim wanfala samting. (Isa. 46:9-11; Rom. 11:33) “God seleva nomoa hem garem evri savve.”—Rom. 16:27.
4 Jehovah lovem iumi tu and hem laekem iumi for kasem gud samting evritaem. (John 3:16; 1 John 4:8) Hem barava kaen tumas long iumi. Disaepol James hem sei olsem: “Evri gudfala and perfect present kam from antap, from hem kam from Dadi wea wakem olketa laet long skae.” (Jas. 1:17) Olketa wea followim toktok bilong God, olketa kasem plande gud samting from hem.
5 Nara samting tu, Jehovah nomoa garem barava bigfala paoa. Man wea raetem psalm hem tok olsem abaotem diswan: “God hem Ruler bilong universe and Hem garem evri paoa. Man wea stap andanit long shadow bilong hem and trustim hem for lukaftarem hem, bae hem sei long Jehovah: ‘Iu nao God bilong mi wea mi trustim. Iu nao lukaftarem mi and leadim mi.’ ” (Ps. 91:1, 2) Taem iumi followim toktok bilong Jehovah, datwan showimaot iumi laekem hem nao for leadim iumi bikos hem nomoa savve leadim iumi long gudfala wei. Nomata sapos pipol againstim iumi, Jehovah bae helpem iumi evritaem. (Ps. 71:4, 5; Readim Proverbs 3:19-26.) Tru nao, Jehovah hem savve wanem nao bae helpem iumi, and hem laekem iumi for kasem gud samting. And tu, hem garem paoa for givim long iumi samting wea bae helpem iumi. Sapos iumi no followim toktok bilong hem, iumi nao krangge! Bat wanem taem nao iumi barava needim datwan?
Wanem Taem Nao Iumi Needim God for Leadim Iumi?
6, 7. Wanem taem nao iumi needim Jehovah for leadim iumi?
6 For tok stret, iumi needim God for leadim iumi long full laef bilong iumi. Man wea raetem psalm hem sei: “Disfala God hem God bilong iumi for olowe. Hem nao bae leadim iumi go kasem taem iumi dae.” (Ps. 48:14) Olsem man wea raetem psalm, olketa Christian tu needim God for leadim olketa long evri samting.
7 Samfala taem iumi laekem tumas for samwan helpem iumi. Maet “bigfala trabol” kasem iumi from pipol againstim iumi, iumi sik big, or iumi no garem waka for selen. (Ps. 69:16, 17) Long taem olsem, iumi savve prea long Jehovah from hem bae strongim iumi for gohed and helpem iumi for tingting gud firstaem bifor iumi disaedem eni samting. (Readim Psalm 102:17.) Bat iumi laekem hem for helpem iumi long olketa nara samting tu. Taem iumi preachim gud nius abaotem Kingdom long pipol, iumi laekem Jehovah for leadim iumi long datfala waka. Datwan bae helpem iumi for faendem pipol wea laek for studyim Bible. And tu, iumi needim Jehovah for leadim iumi taem iumi disaedem eni samting olsem hapitaem, kaleko and lukluk bilong iumi, hu nao iumi fren witim, wanem kaen waka iumi duim for kasem selen, education, or nara samting moa. Tru nao, iumi needim God for leadim iumi long evri samting.
Nogud Samting Man Kasem Taem Hem No Followim Toktok Bilong God
8. Taem Eve kaikaim frut wea God tambuim, hem showimaot hem laek waswe?
8 Hem tru, iumi mas willing for followim toktok bilong Jehovah. Nomata olsem, God bae no forcem iumi for followim hem sapos iumi no laekem. Eve nao first wan wea no laek followim toktok bilong Jehovah and datwan showimaot barava nogud samting nao savve kasem man sapos hem no tingting gud firstaem. Tingim tu hao Eve hem kaikaim frut wea God tambuim bikos hem laek “olsem God, for savve wanem nao hem gud and wanem nao hem nogud.” (Gen. 3:5) Taem hem kaikaim frut hia, datwan showimaot hem laek for duim samting wea no fitim hem for duim, wea hem nao for hemseleva disaedem wanem hem gud and wanem hem nogud. Eve no laek followim toktok bilong Jehovah. Hem no laekem Jehovah for rulim hem. Hemseleva nao laek boss. Adam tu hem bighed and followim waef bilong hem.—Rom. 5:12.
9. Sapos iumi no laek followim toktok bilong Jehovah, hem olsem iumi waswe? Why nao datwan showimaot iumi no garem gudfala tingting?
9 Sapos long distaem iumi no followim toktok bilong Jehovah, datwan showimaot iumi tu no laekem hem for rulim iumi. Tingim sapos wanfala man or woman hem laek tumas for lukluk long buk wea garem olketa rabis piksa long hem. Sapos hem wanfala Christian brata or sista, hem savve finis long tingting bilong Jehovah abaotem diswan. Hem savve hem no fitim for iumi storyim olketa rabis samting and hem barava no fitim for iumi lukluk long olketa kaen samting olsem tu. (Eph. 5:3) Taem man olsem no followim toktok bilong Jehovah long diswan, hem showimaot hem no laekem Jehovah for rulim hem and hem les long wei wea God nao hem hed long evri samting. (1 Cor. 11:3) Datwan showimaot man hia nating garem gudfala tingting, from Jeremiah talem finis: “Hem no fitim for man leadim gogo bilong hemseleva.”—Jer. 10:23.
10. Nomata iumi savve chusim wanem iumiseleva laek duim, why nao iumi mas tingting gud firstaem bifor iumi duim eni samting?
10 Maet samfala no laekem samting wea Jeremiah hem talem from olketa sei sapos Jehovah letem iumi chusim wanem iumiseleva laek duim, fitim hem for no judgem samting wea iumi duim. Hem tru, God hem kaen tumas from hem letem iumi chusim wanem iumiseleva laek duim. Bat sapos iumi duim or talem samting wea no fitim tingting bilong hem, bae hem judgem iumi. (Rom. 14:10) Jesus hem sei: “Samting wea man talem hem samting wea kam from heart bilong hem.” Hem talem tu: “Olketa nogud tingting wea spoelem man nao kam from heart bilong hem, wea mekem hem killim man dae, duim adultery, durong and olketa nara samting saed long sex wea no fitim, steal, laea, and tok spoelem God.” (Matt. 12:34; 15:19) Dastawe samting wea iumi talem and duim hem showimaot wanem nao stap long heart bilong iumi. Hem showimaot wanem kaen man nao iumi. So wanfala Christian wea garem gudfala tingting bae followim toktok bilong Jehovah long evri samting. Sapos hem duim olsem, Jehovah bae duim ‘gudfala samting’ long hem from ‘heart bilong man hia hem stret.’—Ps. 125:4.
11. Wanem nao iumi lanem from samting wea kasem olketa Israelite?
11 Tingim samting wea kasem olketa Israelite. Taem olketa chusim gud samting and obeyim olketa law bilong Jehovah, Jehovah protectim olketa. (Josh. 24:15, 21, 31) Bat plande taem nao samting wea olketa seleva duim hem no fitim tingting bilong God. Long taem wea Jeremiah hem stap, Jehovah sei olsem abaotem olketa Israelite: “Olketa no lisin and olketa no laek obeyim mi, bat olketa gohed followim tingting bilong olketa seleva nomoa and olketa bighed, gogo wei bilong olketa hem nogud winim bifor.” (Jer. 7:24-26) Datwan hem sorre samting! Iumi tu mas no bighed and laek duim samting wea iumiseleva nomoa laekem. Sapos iumi olsem, diswan bae mekem iumi followim tingting bilong iumiseleva and no toktok bilong Jehovah, and gogo ‘wei bilong iumi bae nogud winim bifor’!
Wanem Nao Bae Helpem Iumi for Followim Toktok Bilong God?
12, 13. (a) Wanem nao bae mekem iumi laek followim toktok bilong Jehovah? (b) Why nao iumi mas garem faith?
12 From iumi lovem Jehovah, bae iumi laek followim toktok bilong hem. (1 John 5:3) Bat Paul hem storyim nara samting moa wea iumi mas garem taem hem sei: “Iumi wakabaot followim faith, no followim samting iumi lukim.” (2 Cor. 5:6, 7) Why nao iumi mas garem faith? Nomata Jehovah leadim iumi long “olketa stretfala wei,” datwan no mekem iumi rich or garem bignem long disfala world. (Ps. 23:3) So iumi mas biliv strong hao iumi bae kasem olketa blessing taem iumi worshipim Jehovah. (Readim 2 Corinthians 4:17, 18.) And sapos iumi garem faith, hem bae helpem iumi for hapi nomoa long olketa samting wea iumi garem.—1 Tim. 6:8.
13 Jesus showimaot hao man wea worshipim God mas givim laef bilong hem for God tu, wea diswan minim hem mas garem faith. (Luke 9:23, 24) Samfala wea strong for worshipim God olketa feisim bigfala samting olsem poor living, pipol againstim and heitim olketa, and pipol barava spoelem olketa tu. (2 Cor. 11:23-27; Rev. 3:8-10) Samting wea helpem olketa for no givap long taem olsem nao hem strongfala faith wea olketa garem long God. (Jas. 1:2, 3) Diskaen faith hem mekem iumi trustim hao toktok bilong Jehovah nomoa savve helpem iumi evritaem. Nomata wanem nogud samting hem kasem iumi distaem, iumi savve hao sapos iumi faithful long God and no givap, bae iumi kasem barava bigfala blessing long future.—Heb. 11:6.
14. Why nao Hagar mas hambol?
14 For followim toktok bilong Jehovah, man mas hambol. Tingim Hagar wea hem slave bilong Sarah. From Sarah no savve garem pikinini, hem talem Hagar for sleep witim Abraham, and Hagar hem babule nao. Bat gogo Hagar hem bighed and hem les long Sarah. So Sarah hem “start for toktok strong long hem,” gogo Hagar hem ranawe. Bat wanfala angel bilong Jehovah kam faendem Hagar and talem hem: “Iu mas hambol and go bak moa long [Sarah].” (Gen. 16:2, 6, 8, 9) Maet Hagar laek herem difren samting. Bat for duim wanem angel hem talem, hem mas no bighed. So Hagar hem hambol for followim toktok bilong datfala angel, and hem bornem wanfala baby boy, Ishmael, long ples wea Abraham hem stap.
15. For followim toktok bilong Jehovah, wanem nao samfala samting wea iumi mas hambol long hem?
15 For followim toktok bilong Jehovah, iumi mas hambol tu. Maet samfala taem hapitaem wea iumi laekem hem no fitim tingting bilong Jehovah and iumi mas hambol for followim hem. Maet wanfala Christian hem mekem narawan feel nogud and hem mas tok sorre long hem. Or maet wanfala hem duim rong samting and hem mas talemaot datwan. Waswe sapos man hem duim bigfala sin? Hem mas hambol and talem diswan long olketa elder. Maet hem disfellowship tu. Sapos hem laek kam bak long kongregeson, hem mas repent and lusim nogud wei bilong hem. Toktok long Proverbs 29:23 savve strongim man long olketa taem olsem. Hem sei: “Sapos man hem praod tumas, bae hem foldaon. Bat sapos hem hambol, bae olketa narawan tinghae long hem.”
Long Wanem Wei Nao Jehovah Hem Leadim Iumi Distaem?
16, 17. Sapos iumi laek kasem gud samting from Bible, wanem nao iumi mas duim?
16 God givim Bible long iumi for leadim iumi. (Readim 2 Timothy 3:16, 17.) Iumi no weit go kasem taem iumi insaed problem bifor iumi lukluk long Bible for helpem iumi, bat iumi lukluk long hem evritaem. Iumi bae readim Bible evriday. (Ps. 1:1-3) Taem iumi duim datwan, bae iumi savve gud long Bible. Bae iumi garem sem tingting olsem God, and bae iumi fit for feisim olketa problem wea seknomoa kasem iumi.
17 Hem important tu for ting raonem samting wea iumi readim long Bible and for prea. Taem iumi ting raonem olketa scripture, iumi savve tingim hao nao hem savve helpem iumi long olketa difren samting. (1 Tim. 4:15) Taem iumi kasem olketa bigfala problem, iumi prea long Jehovah and askem hem for leadim iumi. Spirit bilong Jehovah bae helpem iumi for tingim moa olketa scripture wea iumi readim finis long Bible or long olketa buk bilong iumi wea savve helpem iumi.—Readim Psalm 25:4, 5.
18. Hu nao Jehovah hem iusim for leadim iumi?
18 Nara samting wea Jehovah iusim for leadim iumi hem olketa Christian brata and sista. “Faithful and wise slave” and Governing Body bilong hem duim barava important waka for givim spiritual kaikai long iumi evritaem, olsem olketa buk, olketa meeting and assembly. (Matt. 24:45-47; markem witim Acts 15:6, 22-31.) And long kongregeson, iumi garem olketa strongfala Christian tu, olsem olketa elder wea savve helpem iumi and givim kaonsel long iumi from Bible. (Isa. 32:1) Olketa young wan savve kasem help tu from dadi and mami wea worshipim Jehovah. From God markem dadi and mami for lanem olketa long toktok bilong hem, hem laekem olketa young wan for mas herem tufala.—Eph. 6:1-3.
19. Sapos iumi followim toktok bilong Jehovah evritaem, wanem kaen blessing nao bae iumi kasem?
19 Tru tumas, Jehovah hem leadim iumi long olketa difren wei, and hem gud for iumi followim toktok bilong hem. King David hem talem disfala toktok taem olketa Israelite faithful: “Olketa dadi bilong mifala long bifor olketa trustim iu and iu helpem olketa. Olketa krae long iu and iu sevem olketa. Olketa trustim iu and olketa no kasem shame.” (Ps. 22:3-5) Iumi tu bae “no kasem shame” sapos iumi trustim and followim toktok bilong Jehovah. Iumi bae kasem samting wea God promisim long iumi. Sapos iumi ‘givim go olketa hevi bilong iumi and laef bilong iumi long Jehovah,’ and no trustim savve bilong iumiseleva, bae iumi kasem staka blessing distaem. (Ps. 37:5) And sapos iumi gohed faithful olsem, bae iumi kasem olketa blessing hia for olowe. King David hem sei olsem: “Jehovah hem laekem tumas for duim samting wea stret, and hem bae no lusim olketa wea faithful long hem. Bae hem protectim olketa for olowe . . . Olketa gudfala pipol bae tekem earth, and olketa bae stap long hem for olowe.”—Ps. 37:28, 29.
Waswe, Iu Savve Minim Kam?
• Why nao iumi trustim toktok bilong Jehovah?
• Sapos iumi no laek followim toktok bilong Jehovah, hem olsem iumi waswe?
• Wanem nao samfala samting wea wanfala Christian mas hambol long hem?
• Long wanem wei nao Jehovah hem leadim iumi distaem?
[Piksa long page 8]
Waswe, Jehovah leadim iu long evri samting wea iu duim?
[Piksa long page 9]
Eve no laekem Jehovah for rulim hem
[Piksa long page 10]
For followim toktok bilong angel, Hagar mas waswe?