Samting wea Iumi Lanem From Jesus

Abaotem Kingdom Bilong God

Wanem nao Kingdom bilong God?

Kingdom bilong God hem wanfala gavman wea bae rulim earth. Jesus talem olsem: “Iufala mas prea long wei olsem: . . . ‘Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.’”​—Matthew 6:​9, 10; Daniel 2:​44.

Hu nao bae rul long Kingdom bilong God?

Jesus born kam for King long Kingdom bilong God. Wanfala angel talem mami bilong Jesus olsem: “Jehovah God bae mekem hem king olsem dadi bilong hem King David.” (Luke 1:​30-​33) And Jesus chusim samfala disaepol for rul witim hem. Hem talem olketa aposol olsem: “Taem mi kasem olketa test, iufala nao olketa wea no lusim mi; and mi mekem wanfala promis witim iufala, olsem Dadi bilong mi mekem wanfala promis witim mi, for wanfala kingdom.” (Luke 22:28, 29; Daniel 7:​27) Bae 144,000 disaepol nomoa rul witim Jesus.​—Revelation 5:​9, 10; 14:1.

Disfala gavman bae stap long wea?

Kingdom bilong God bae stap long heven. Jesus talem olketa disaepol olsem: “Sapos mi go and redyim wanfala ples for iufala [long heven], mi bae kam bak moa and tekem iufala kam long mi, mekem ples wea mi stap iufala tu bae stap. . . . Mi redi for go long Dadi.”​—John 14:​2, 3, 12; Daniel 7:​13, 14.

Kingdom bilong God bae duim wanem long olketa rabis samting?

Jesus bae finisim evri rabis pipol long disfala earth. Jesus talem olsem: “Taem Son bilong man [Jesus] kasem glory, and olketa angel witim hem, then hem bae kamap king. And pipol long evri kantri bae hipap front long hem, and hem bae divaedem pipol. . . . And olketa hia [wea no raeteous] bae finis for olowe, bat olketa wea raeteous bae kasem laef olowe.”​—Matthew 25:31-​34, 46.

Hu nao bae stap taem Kingdom hem rulim earth?

Jesus talem olsem: “Olketa wea hambol bae hapi, bikos olketa bae tekem earth.” (Matthew 5:5; Psalm 37:29; 72:8) Evriwan wea stap long earth bae lovem narawan. Jesus talem olketa disaepol olsem: “Mi givim niufala law long iufala for iufala lovem narawan; olsem mi lovem iufala, iufala mas lovem narawan tu. Sapos iufala lovem narawan, evriwan bae savve iufala nao olketa disaepol bilong mi.”​—John 13:34, 35.

Kingdom bilong God bae duim wanem for olketa wea stap long earth?

Jesus bae mekem gud moa evriwan wea sik. Taem Jesus stap long earth, hem story long staka pipol “abaotem kingdom bilong God, and hem mekem gud moa olketa wea sik.” (Luke 9:​11) Bihaen aposol John lukim Jesus wea laef bak long wanfala vision, hem talem olsem: “Mi lukim wanfala niu skae and wanfala niu earth . . . mi herem . . . bigfala voice from throne hem sei: “Lukim! Tent bilong God hem stap witim olketa man . . . And hem bae aotem evri wata from eye bilong olketa, and bae no eniwan hem dae moa.’”​—Revelation 21:​1-4.

Kingdom bilong God bae mekem earth kamap Paradaes. Wanfala rabis man wea dae saed long Jesus hem talem olsem: “Jesus, tingim mi taem iu kasem kingdom bilong iu.” And Jesus talem hem olsem: “Tru nao, mi talem iu tuday, Iu bae stap witim mi long Paradaes.”​—Luke 23:42, 43; Isaiah 11:​4-9.

For savve moa, lukim chapter 8 long buk Wanem Nao Really Samting wea Bible Teachim?a

[Footnote]