Kamap Strongfala Christian Taem Iu Followim Wei Bilong Paul
“Mi trae hard for ran long gudfala resis hia. And distaem mi kasem end bilong disfala resis and mi gohed yet for hol strong long biliv bilong mi.”—2 TIM. 4:7.
1, 2. Wanem samting nao Saul no duim moa? Wanem waka nao hem duim bihaen?
SAUL wea kam from Tarsus hem garem bigfala savve and hem man for kwiktaem duim samting. Nomata olsem, hem ‘duim nomoa samting wea hemseleva laekem.’ (Eph. 2:3) Hem storyim hemseleva olsem “man for againstim God and spoelem pipol and man wea bighed.”—1 Tim. 1:13.
2 Gogo Saul barava changem olketa wei bilong hem. Hem lusim olketa rabis samting wea hem duim bifor and hem no ‘tingim hemseleva bat hem laek for helpem nara pipol.’ (1 Cor. 10:33) Hem kaen tumas and hem showim love long olketa Christian brata wea hem spoelem olketa bifor. (Readim 1 Thessalonians 2:7, 8.) Hem sei: “Mi kamap wanfala wakman.” Then hem talem moa: “Nomata mi nao lalas man long evri pipol bilong God, God hem kaen tumas and hem givim disfala waka long mi. Hem sendem mi go long olketa wea no Jew for talemaot gud nius abaotem olketa nambawan samting wea Christ duim wea iumi nating savve tingim.”—Eph. 3:7, 8.
3. Taem iumi readim olketa leta wea Paul raetem and tingim preaching waka wea hem duim, datwan helpem iumi long wanem wei?
3 Saul, wea bihaen hem garem nem Paul, hem kamap wanfala strong Christian. (Acts 13:9) Sapos iumi laek olsem hem tu, iumi savve readim olketa leta wea Paul raetem, tingim preaching waka wea hem duim, and followim wei bilong hem. (Readim 1 Corinthians 11:1; Hebrews 13:7.) Distaem bae iumi storyim hao olketa samting hia savve helpem iumi for laek study seleva evritaem, showim love long pipol, and hambol.
Hem Wei Bilong Paul for Study Seleva
4, 5. Taem Paul study seleva, datwan helpem hem long wanem wei?
4 Paul savve finis long samfala scripture bikos taem hem wanfala Pharisee bifor, “Gamaliel nao teacher bilong [hem] wea lanem hem for followim Law bilong olketa laen dadi bilong [hem].” (Acts 22:1-3; Phil. 3:4-6) Bihaen hem baptaes, hem “go long Arabia” for ting raonem samting wea hem lanem. Maet hem go long datfala drae ples long Syria or long ples wea nem bilong hem Arabian Peninsula. (Gal. 1:17) Luk olsem Paul laek for ting raonem olketa scripture wea showimaot Jesus nao Messiah. Hem laek for redi tu for waka wea hem bae duim bihaen. (Readim Acts 9:15, 16, 20, 22.) Paul markem taem for ting raonem olketa samting wea hem lanem abaotem God.
5 Samting wea Paul lanem long olketa scripture taem hem study seleva barava helpem hem for lanem pipol olketa tru samting abaotem God. Tingim wanfala taem wea Paul stap long Antioch long Pisidia. Taem hem story long pipol long sinagog, hem readim faevfala toktok wea stap long Hebrew Scripture for showimaot Jesus nao Messiah. Hem storyim tu samfala nara samting long Hebrew Scripture. From Paul duim olsem, “plande Jew and nara man wea worshipim God olketa go bihaen long Paul and Barnabas” for lanem plande samting moa. (Acts 13:14-44) Plande year bihaen, olketa Jew wea stap long Rome go lukim Paul. Paul “storyim kingdom bilong God long olketa and hem talemaot toktok wea stap long law bilong Moses and olketa Profet abaotem Jesus for mekem olketa biliv.”—Acts 28:17, 22, 23.
6. Taem bigfala trabol kasem Paul, wanem nao strongim hem?
6 Taem samfala big trabol kasem Paul, hem readim olowe olketa scripture for strongim hem. (Heb. 4:12) Taem hem stap long prison long Rome, Paul talem Timothy for tekem kam “olketa scroll” and “olketa nara scroll wea olketa wakem long skin bilong animal.” (2 Tim. 4:13) Luk olsem olketa scroll hia hem Hebrew Scripture wea Paul iusim for study seleva. Paul luksavve taem hem studyim olketa scripture evritaem, datwan nao strongim hem.
7. Taem iu study seleva, datwan helpem iu long wanem wei?
7 Taem iumi studyim Bible olowe and ting raonem samting wea iumi readim, datwan bae helpem iumi kamap olketa strongfala Christian. (Heb. 5:12-14) Man wea raetem psalm hem storyim hao Bible savve helpem iumi. Hem sei: “Mi laekem tumas law bilong iu winim evri gold and silver. Komandment bilong iu hem mekem mi garem gudfala tingting winim pipol wea againstim mi, bikos mi tingim olowe toktok bilong iu. Mi no savve followim olketa nogud wei bikos mi laek obeyim toktok bilong iu.” (Ps. 119:72, 98, 101) Waswe, hem wei bilong iu for studyim Bible seleva evritaem? Taem iu readim Bible evriday and ting raonem, datwan bae redyim iu for duim eni waka for Jehovah.
Gogo Saul Lovem Pipol
8. Saul hem waswe long pipol bilong narafala religion?
8 Taem Saul no wanfala Christian yet, hem barava strong long Jew religion and hem no laekem pipol bilong narafala religion. (Acts 26:4, 5) Hem hapi nomoa taem samfala Jew sutim Stephen long ston gogo hem dae. Datwan mekem hem tingse olketa samting wea hem duim for spoelem olketa Christian hem gud nomoa and hem tingse hem fitim nao for Stephen kasem panis for dae. (Acts 6:8-14; 7:54–8:1) Bible talem olsem: “Saul laek finisim nao datfala kongregeson. Hem gogo raon long evri haos for kasholem olketa man and woman and hem putim olketa insaed long prison.” (Acts 8:3) Hem “go kasem tu olketa taon aotsaed long Israel for spoelem olketa long there.”—Acts 26:11.
9. Wanem nao kasem Saul wea mekem hem changem wei bilong hem?
9 Taem Saul wakabaot go for Damascus for spoelem olketa disaepol bilong Christ, wanfala laet long skae shaen raonem hem. Jesus nao kam long hem. Bat datfala big laet raonem Son bilong God mekem Saul no savve lukim eni samting and samfala nao mas holem hand bilong hem for leadim hem go. Jehovah talem Ananias for go kasem Saul for mekem eye bilong hem gud bak moa. Start long datfala taem, Saul no laek spoelem pipol nao. (Acts 9:1-30) Taem hem kamap Christian, hem followim wei bilong Jesus for kaen long evriwan. Hem no raf nao and hem “stap gud witim evri man.”—Readim Romans 12:17-21.
10, 11. Wanem nao Paul duim wea showimaot hem barava lovem pipol?
10 Paul hapi tumas taem hem stap gud witim nara pipol. Bat hem laek preach long olketa tu for showimaot hem barava lovem olketa. Taem hem startim missionary waka bilong hem, hem talemaot gud nius long pipol long Asia Minor. Nomata pipol barava againstim Paul and olketa wea gogo witim hem, olketa waka hard for helpem pipol wea laek kamap Christian. Olketa go bak moa long Lystra and Iconium nomata pipol long olketa taon hia laek killim dae Paul.—Acts 13:1-3; 14:1-7, 19-23.
11 Bihaen datwan, Paul and olketa wea gogo witim hem go long Philippi, wanfala taon long Macedonia, for lukaotem pipol wea laek savve long God. Wanfala woman wea nem bilong hem Lydia hem followim Jew religion. Taem hem herem gud nius, hem kamap wanfala Christian nao. Olketa bigman long datfala taon whipim nogud Paul and Silas and putim tufala long prison. Nomata olsem, Paul story long man wea lukaftarem prison and gogo datfala man and famili bilong hem baptaes and worshipim Jehovah.—Acts 16:11-34.
12. Why nao Saul wea raf tumas hem kamap wanfala aposol bilong Jesus Christ?
12 Why nao Saul wea raf tumas bifor hem kamap wanfala Christian? Why nao hem kamap aposol wea kaen tumas and laek helpem pipol lanem tru samting abaotem God and Christ nomata pipol laek killim hem dae? Paul tok olsem: ‘God kaen tumas long mi and hem showim kam Son bilong hem long mi.’ (Gal. 1:15, 16) Paul story olsem long Timothy: “God hem sorre tumas long mi mekem bigfala love bilong Christ Jesus hem showaot. Diswan hem for helpem pipol wea bae biliv long hem bihaen, mekem olketa kasem laef olowe.” (1 Tim. 1:16) From Jehovah kaen tumas and sorre long Paul, Hem forgivim hem. Diswan mekem Paul laek talemaot gud nius long pipol from hem lovem olketa.
13. Why nao iumi mas showimaot love long pipol? Wanem nao iumi savve duim for showimaot diswan?
13 Jehovah hem forgivim sin bilong iumi tu. (Ps. 103:8-14) Man wea raetem psalm hem tok olsem: “Jehovah, sapos samting wea iu lukluk long hem nomoa hem rong samting wea mifala duim, mifala no wei nao!” (Ps. 130:3) Tingim diswan, sapos God hem no sorre long iumi, bae iumi no hapi for worshipim hem and bae iumi no garem hope for laef olowe tu. God hem kaen tumas long iumi evriwan. So iumi tu laek followim wei bilong Paul for lovem pipol taem iumi preach long olketa, lanem tru samting long olketa, and strongim olketa brata and sista bilong iumi.—Readim Acts 14:21-23.
14. Wanem samting moa iumi savve duim long preaching waka?
14 Paul laek tumas for savve gud hao for story witim pipol, and hem barava laek followim wei bilong Jesus. Wanfala wei Jesus showimaot hem lovem pipol tumas hem taem hem duim preaching waka. Jesus sei: “Staka samting stap for harvestim, bat no staka wakman stap for duim datwan. So askem man wea ownim plantation for sendem go olketa wakman for harvestim plantation bilong hem.” (Matt. 9:35-38) From Paul laekem samfala wakman moa for helpem hem, hem strong for duim preaching waka. Waswe long iu? Waswe, iu trae for lanem gud hao for duim preaching waka? Waswe, iu savve duim samfala hour moa long disfala waka? Waswe, iu fit for pioneer? Iumi laek tumas for showimaot iumi lovem pipol taem iumi helpem olketa for “hol strong long toktok wea bae givim laef long olketa.”—Phil. 2:16.
Paul Hem Ting Hao Long Hemseleva?
15. Paul hem ting hao long hemseleva and olketa nara Christian?
15 Iumi olketa Christian savve lanem narafala samting tu from wei bilong Paul. Nomata Paul kasem plande waka long Christian kongregeson, hem luksavve hem no kasem olketa waka hia from hem garem bigfala savve. Bat from God nao kaen tumas long hem dastawe hem kasem olketa waka hia. Paul luksavve olketa narafala Christian tu savve tumas for preachim gud nius. Nomata hem garem bigfala waka long kongregeson, hem hambol nomoa.—Readim 1 Corinthians 15:9-11.
16. Taem wanfala problem kamap, wanem nao Paul duim wea showimaot hem hambol?
16 Tingim samting wea Paul duim taem wanfala problem kamap long Antioch, wanfala taon long Syria. Samfala long datfala kongregeson sei man mas circumcise, bat samfala sei man no need for circumcise. (Acts 14:26–15:2) From Paul kasem waka for preach long pipol wea no Jew wea olketa no circumcise, maet hem tingse hem nao savve hao for story witim pipol hia and hem nao fit for stretem datfala problem. (Readim Galatians 2:8, 9.) Hem trae for stretem datwan bat problem hia gohed nomoa. So taem olketa sei for hem go story witim governing body long Jerusalem abaotem diswan, hem hambol nomoa and hem duim datwan. Governing body herem datfala problem and talemaot ansa for datwan. And taem olketa markem Paul witim samfala moa for go talem olketa nara kongregeson samting wea olketa disaedem, Paul hapi for duim diswan. (Acts 15:22-31) Taem Paul duim olsem, hem showimaot hem “tinghae” long olketa nara Christian winim hemseleva.—Rom. 12:10b.
17, 18. (a) Paul hem ting hao long olketa brata and sista long olketa kongregeson? (b) Taem Paul lusim Ephesus, wanem nao happen? Datwan showimaot wanem samting abaotem wei bilong Paul?
17 Paul no cheekim olketa brata and sista long olketa kongregeson bat hem barava lovem olketa. Taem hem raet for olketa Christian long Rome, hem talem nem bilong winim 20-fala brata and sista long there. Hem nomoa ples wea nem bilong olketa stap long Bible, and samfala long olketa nomoa garem bigfala waka long kongregeson. Nomata olsem, olketa hia faithful long Jehovah and Paul lovem olketa tumas.—Rom. 16:1-16.
18 From Paul hem hambol and kaen long olketa brata and sista, datwan strongim olketa. Taem Paul redi for lusim olketa elder long Ephesus, “olketa holem Paul and kissim hem, bikos olketa barava sorre tumas taem olketa herem Paul talem bae olketa no lukim hem moa.” Sapos Paul hem wanfala man wea praod and cheekim pipol, hard tumas for olketa krae bihaenem hem olsem.—Acts 20:37, 38.
19. Long wanem wei nao iumi showimaot iumi “hambol”?
19 Olketa wea laek for kamap strongfala Christian mas hambol olsem Paul. Hem talem olketa Christian: “Iufala mas no tingim iufala seleva nomoa and laek raoa for winim nara man bat iufala mas hambol and tingim nara pipol olsem olketa nao gudfala winim iufala.” (Phil. 2:3) Hao nao iumi savve followim datfala toktok bilong Paul? Iumi savve waka tugeta witim olketa elder long kongregeson taem iumi followim samting wea olketa talem. And tu, taem olketa elder disfellowshipim wanfala man, iumi followim samting wea olketa elder disaedem. (Readim Hebrews 13:17.) Iumi followim wei bilong Paul tu taem iumi tinghae long evri brata and sista bilong iumi. Pipol from difren ples, kastom, languis, and kala skin nao stap long olketa kongregeson. From Paul lovem evri brata and sista and no saedem eniwan, waswe, fitim iumi tu for olsem? (Acts 17:26; Rom. 12:10a) Bible talem iumi for “mek-fren witim pipol olsem Christ hem mek-fren witim iumi finis. Diswan nao bae mekem pipol mekhae long God.”—Rom. 15:7.
“Ran Strong” Long Resis for Kasem Laef
20, 21. Wanem nao bae helpem iumi for ran strong long resis for kasem laef olowe?
20 Laef bilong olketa Christian hem olsem wanfala longfala resis. Paul sei: “Distaem mi kasem end bilong disfala resis and mi gohed yet for hol strong long biliv bilong mi. Disfala crown wea gudfala pipol bae kasem, hem stap redi finis for mi. Lord bilong mi wea judgem man long stretfala wei, hem nao bae givim datwan long mi long datfala day. Hem bae no givim datwan long mi nomoa, bat bae hem givim tu long olketa wea weitim taem wea hem bae kam.”—2 Tim. 4:7, 8.
21 Taem iumi followim wei bilong Paul, datwan bae helpem iumi for ran strong long resis for kasem laef olowe. (Heb. 12:1) Dastawe iumi mas study seleva evritaem, barava lovem pipol, and hambol, from olketa samting hia nao bae mekem iumi kamap olketa strongfala Christian.
Wanem Nao Ansa Bilong Iu?
• Taem Paul studyim olketa scripture, datwan helpem hem long wanem wei?
• Why nao olketa tru Christian mas lovem pipol?
• Wanem nao bae helpem iu for no saedem eniwan?
• Olsem Paul hem duim, wanem nao bae helpem iu for waka tugeta witim olketa elder?
[Piksa long page 23]
Readim olketa scripture for strongim iu, olsem Paul duim
[Piksa long page 24]
Preachim gud nius long pipol for showimaot iu lovem olketa
[Piksa long page 25]
Waswe, iu savve why nao olketa brata lovem Paul?