Lanem Pikinini Bilong Iu

Samuel Duim Stret Samting Evritaem

WASWE, enitaem iu lukim pipol duim olketa nogud samting?​—a Samuel lukim pipol duim olketa nogud samting. Hem stap long ples wea maet iu tingse hem hard for pipol duim olketa nogud samting long there. Hem stap long tabernacle bilong God, wea hem nao ples wea pipol worshipim God. Tabernacle hem stap long datfala taon, Shiloh. Bae iumi storyim why nao Samuel hem stap long tabernacle.

Bifor Samuel hem born, mami bilong hem Hannah laek tumas for garem pikinini. Long wanfala taem wea Hannah go long tabernacle, hem storyim datwan long God. From hem barava prea strong long God, mouth bilong hem nomoa mumuv. Taem hae priest Eli lukim diswan, hem tingse Hannah hem drunk. Bat taem Hannah talem Eli hao hem no drunk bat hem prea strong abaotem wanfala samting long God, Eli hem sei long Hannah: “God bilong Israel bae givim iu samting wea iu askem long hem.”​—1 Samuel 1:​17.

Gogo, taem Samuel hem born, Hannah hem barava hapi and hem talem hasband bilong hem Elkanah: ‘Bihaen Samuel hem finis susu, bae mi tekem hem long tabernacle mekem hem savve worshipim God long there.’ Gogo Hannah hem duim datwan! Long datfala taem maet Samuel hem foa or faev year nomoa.

Eli hem olo nao and olketa son bilong hem, Hophni and Phinehas, olketa no worshipim Jehovah long stretfala wei. Tufala durong witim olketa woman tu wea kam long tabernacle! Long tingting bilong iu, wanem nao dadi bilong tufala shud duim?​— Iaman, hem shud panisim olketa and no letem olketa for duim olketa nogud samting hia.

From Samuel hem stap long tabernacle, luk olsem hem savve long nogud wei bilong tufala son bilong Eli. Waswe, Samuel hem followim nogud wei bilong tufala?​— Nomoa, hem gohed for duim stret samting, olsem mami and dadi bilong hem lanem hem for duim. Bat Jehovah hem kros tumas long Eli. Jehovah talem wanfala profet tu for go lukim Eli and talem hem hao Hem bae panisim famili bilong Eli witim tufala son bilong hem.​—1 Samuel 2:​22-​36.

Samuel hem gohed for waka witim Eli long tabernacle. Long wanfala naet, taem Samuel hem sleep, samwan singaotem nem bilong hem. So Samuel hem ran go long Eli, bat Eli sei hem no kolem hem. Sem samting hem happen narataem moa. Taem Samuel hem herem sem samting mek-thri taem, Eli hem talem Samuel for tok olsem: “Jehovah iu story kam, wakman bilong iu hem lisin long iu.” Taem Samuel hem talem datwan, Jehovah hem story kam long hem. Waswe, iu savve wanem nao Jehovah hem talem long Samuel?​—

God hem talem Samuel wanem nao hem bae duim for panisim famili bilong Eli. Long next morning Samuel hem fraet for talem Eli wanem nao Jehovah talem long hem. Bat Eli hem askem Samuel olsem: “Plis iu mas talem samting wea iu herem.” So gogo Samuel hem talem Eli evri samting wea Jehovah talem bae Hem duim, olsem profet bilong Hem storyim finis long Eli. Eli hem sei: “Samting wea Jehovah laek duim hem mas duim nao.” Gogo olketa killim dae Hophni and Phinehas, and Eli hem dae tu.​—1 Samuel 3:​1-​18.

Bat “Samuel hem big finis, and Jehovah stap witim hem.” Maet Samuel hem teenager taem Eli and tufala son bilong hem dae. Waswe, iu tingse hem isi for Samuel gohed duim stret samting long taem wea olketa narawan duim olketa nogud samting?​— Nomata maet hem no isi, Samuel hem faithful long Jehovah long full laef bilong hem.​—1 Samuel 3:​19-​21.

Waswe long iu, bae iu olsem Samuel tu? Waswe, bae iu gohed for duim stret samting? Waswe, bae iu gohed for followim wanem Bible hem talem and herem toktok bilong mami and dadi bilong iu? Sapos iu duim olsem, bae Jehovah hapi long iu and mami and dadi bae hapi tu.