Samfala Ask Olsem
Waswe, Olketa Jehovah’s Witness Iusim Old Testament?
Olketa Jehovah’s Witness bilivim hao Bible hem kam from God and olketa tingim Old Testament and Niu Testament olsem tufala evriwan important. Bat olketa laek for iusim nem “Hebrew Scripture” and “Christian Greek Scripture” wea barava fitim, bikos tufala hia nao main languis wea olketa iusim for raetem Bible.
Samfala pipol wea sei olketa Christian no laek for iusim Old Testament. Olketa sei hem storyim God wea kros, wea faetem olketa war, killkill, and samfala wei moa wea no showimaot love wea diswan hem barava difren from God wea Niu Testament storyim. Olketa sei tu hao from Old Testament hem storyim tumas religion bilong olketa Jew, hem no fitim olketa Christian. Bat sapos iumi tingim toktok bilong God long Deuteronomy 12:32 for no addim or tekem aot eni toktok from Bible, waswe, hem fitim for no iusim bigfala haf long Bible?
Taem Christian aposol Paul visitim Thessalonica, long Greece long 50 C.E., “hem iusim olketa Scripture for pullim tingting bilong olketa, hem minim and pruvim from olketa scripture hao Christ mas safa and laef bak from dae.” (Acts 17:1-3) Samfala long olketa wea herehere long Paul kamap Christian, and hem praisem olketa olsem: “Taem iufala herem toktok bilong God, wea iufala herem from mifala, iufala acceptim datwan, no olsem toktok bilong man, bat, toktok bilong God.” (1 Thessalonians 2:13) Long datfala taem, luk olsem long 27-fala buk insaed Christian Greek Scripture, Gospel bilong Matthew nomoa olketa raetem finis. Datwan minim Paul iusim olketa Hebrew Scripture for pruvim toktok bilong hem.
Olketa wea raetem Christian Greek Scripture iusim barava toktok from olketa Hebrew Scripture samting olsem 320 taem and samfala nara toktok staka handred taem. Why nao olsem? From “evri samting olketa raetem bifor hem for lanem iumi, mekem wei wea iumi gohed strong and olketa Scripture savve strongim iumi and givim iumi hope.” (Romans 15:4) Diswan showim hao olketa wea iusim full Bible distaem barava kasem gudfala samting from datwan.
Olketa Christian Greek Scripture barava join gud witim olketa Hebrew Scripture and showimaot long bigfala wei moa plan bilong God. Olketa Christian Greek Scripture no mekem olketa Hebrew Scripture for kamap iusles. Herbert H. Farmer, wanfala savveman wea studyim God long Cambridge University hem talem diswan: “Iumi no savve minim olketa Gospel sapos iumi no ting raonem toktok long Old Testament abaotem pipol wea followim Law covenant.”
No eniwan need for changem Bible. Bat “wei bilong olketa raeteous wan hem olsem braet laet wea kakamap braet go kasem big daylaet.” (Proverbs 4:18) Taem God mekem Olketa Christian Greek Scripture kamap part long Bible, hem mekem mining bilong plan bilong hem kamap braet go moa and long semtaem hem mekhae long olketa Hebrew Scripture. Full Bible hem “toktok bilong Jehovah [wea] stap for olowe.”—1 Peter 1:24, 25.