Laef Olowe Long Earth Hem Hope wea God Givim
“Olketa samting wea God wakem kamap iusles . . . bat God givim hope long olketa tu.”—ROM. 8:20.
1, 2. (a) Why nao hope for laef olowe hem important long iumi? (b) Why nao staka pipol daotem disfala hope for laef olowe long earth?
IU HAPI tumas taem iu lanem hao pipol bae no olo and no dae bat olketa bae stap olowe long earth. (John 17:3; Rev. 21:3, 4) Iu hapi tumas tu for storyim long pipol datfala hope from Bible. Hope for laef olowe hem important samting wea iumi storyim taem iumi preachim gud nius. Disfala hope hem important long iumi from hem mekem iumi garem stretfala tingting abaotem laef bilong iumi.
2 Staka religion wea sei olketa Christian nating teachim pipol abaotem disfala hope for laef olowe long earth. Nomata Bible talem no eni part long man hem gohed laef taem hem dae, staka church teachim hao man hem garem soul wea gohed for laef olowe long heven bihaen hem dae. (Ezek. 18:20) Dastawe staka pipol daotem teaching wea sei man savve laef olowe long earth. So hem gud for iumi tingim diswan: Waswe, disfala hope for laef olowe hem samting wea Bible teachim? Sapos olsem, wanem taem nao God mekem olketa man savve long disfala hope?
‘Olketa Samting Kamap Iusles bat God Givim Hope Long Olketa’
3. Wanem nao God talem long Adam wea showimaot klia plan bilong hem for olketa man?
3 Start long taem wea Jehovah wakem olketa man, hem showimaot klia plan bilong hem for olketa. Toktok wea God talem long Adam showimaot hem bae laef olowe sapos hem obeyim God. (Gen. 2:9, 17; 3:22) Olketa man wea born bihaen long Adam herem wanem nao mekem olketa man no perfect, and olketa lukim tu samfala samting wea showimaot diswan. Olketa lukim olketa angel satem garden bilong Eden, and olketa lukim pipol kamap olo and dae. (Gen. 3:23, 24) Gogo olketa man no savve laef longtaem nao. Adam hem laef for 930 year. Bihaen long Flood, Shem hem laef for 600 year, and boy bilong hem Arpachshad hem laef for 438 year. Dadi bilong Abraham, Terah, hem laef for 205 year. Abraham hem laef for 175 year, son bilong hem Isaac hem laef for 180 year, and Jacob hem laef for 147 year. (Gen. 5:5; 11:10-13, 32; 25:7; 35:28; 47:28) Staka pipol long datfala taem luksavve wanem nao diswan showimaot. Olketa man no savve laef olowe nao! Waswe, eni samting mekem olketa bilivim man savve garem hope for laef olowe moa?
4. Wanem nao mekem olketa man bifor bilivim God bae mekem pipol kasem bak olketa gud samting wea Adam lusim?
4 Bible hem sei: “Olketa [man] wea God wakem kamap iusles . . . bat God givim hope long olketa tu.” (Rom. 8:20) Wanem nao datfala hope? Firstfala profesi long Bible storyim hao wanfala “pikinini” bae ‘killim hed bilong snek.’ (Readim Genesis 3:1-5, 15.) Taem God promis for givim kam datfala Pikinini, datwan mekem olketa man wea faithful savve God no forgetim plan bilong hem for olketa man. Disfala promis mekem Abel and Noah bilivim God bae mekem pipol kasem bak olketa gud samting wea Adam lusim. Maet olketa luksavve wei for ‘killim leg bilong datfala pikinini’ minim pikinini hia mas dae nao.—Gen. 4:4; 8:20; Heb. 11:4.
5. Wanem nao showimaot Abraham bilivim olketa man bae laef bak moa?
5 Tingim Abraham. Taem Abraham kasem test, “hem willing for sakrifaesim son bilong hem Isaac, wea hem nomoa pikinini bilong hem.” (Heb. 11:17) Why nao hem willing for duim datwan? (Readim Hebrews 11:19.) Hem bilivim God bae mekem olketa man laef bak moa! Abraham fit for bilivim diswan bikos Jehovah mekem Abraham and Sarah savve garem pikinini nomata tufala olo finis. (Gen. 18:10-14; 21:1-3; Rom. 4:19-21) Jehovah talem diswan tu long Abraham: “Long laen bilong Isaac nao pikinini wea mi promisim iu bae kamaot long hem.” (Gen. 21:12) Dastawe Abraham barava bilivim God bae mekem Isaac laef bak moa.
6, 7. (a) Wanem agreement nao Jehovah mekem witim Abraham? (b) Long wanem wei nao promis wea Jehovah talem long Abraham mekem olketa man garem hope?
6 From Abraham garem bigfala faith long Jehovah, Jehovah mekem agreement witim hem abaotem “pikinini” bilong hem. (Readim Genesis 22:18.) Gogo hem showaot klia Jesus Christ nao hem barava important “pikinini” long laen bilong Abraham. (Gal. 3:16) Jehovah talem Abraham “pikinini” bilong hem bae kamap staka, “olsem olketa star long skae and sandbis long saedsea,” bat Abraham bae no savve long namba bilong olketa. (Gen. 22:17) Gogo pipol savve long namba hia. Jesus Christ and 144,000 wea bae rul witim hem long Kingdom, olketa nao datfala “pikinini.” (Gal. 3:29; Rev. 7:4; 14:1) Messiah Kingdom nao bae mekem “evri nation long earth . . . kasem blessing.”
7 Abraham hard for minim evri samting abaotem datfala agreement wea Jehovah mekem witim hem. Nomata olsem, Bible sei “hem weitim taon wea garem trufala faondeson.” (Heb. 11:10) Datfala taon hem Kingdom bilong God. Abraham mas laef moa for kasem olketa gud samting taem Kingdom hem rul. Taem hem laef bak, hem bae stap olowe long earth. Pipol wea no dae long Armageddon and olketa wea laef bak savve laef olowe tu.—Rev. 7:9, 14; 20:12-14.
“Holy Spirit Mekem Mi Laek Toktok Nao”
8, 9. Buk bilong Job storyim hard taem wea kasem Job, bat wanem moa hem storyim?
8 Job stap laef midolwan long taem bilong Joseph, grani bilong Abraham, and profet Moses. Luk olsem Moses nao raetem Bible buk Job. Datfala buk talem why nao Jehovah letem Job safa and wanem nao kasem hem bihaen. Datfala buk no storyim nomoa hard taem wea kasem Job bat hem storyim olketa important samting wea evri man and angel tu insaed long hem. Buk hia helpem iumi for luksavve hao Jehovah hem rul long stretfala wei. Samting wea happen long Eden join witim story long buk bilong Job. Buk bilong Job showimaot wei wea iumi faithful long God and hope bilong iumi for future hem join witim disfala samting wea happen long Eden tu. Job no minim samting wea happen long Eden, nomata olsem hem no letem wanem thrifala fren bilong hem talem mekem hem tingse hem no faithful long God. (Job 27:5) Diswan shud strongim faith bilong iumi and helpem iumi luksavve iumi savve gohed faithful long Jehovah and sapotim rul bilong hem.
9 Bihaen thrifala man hia story finis long Job, “Elihu, son bilong Barachel wea kam from laen bilong Buz hem tok go long olketa.” Wanem nao mekem hem tok long olketa? Hem sei: “From mi laek talem staka samting, holy spirit mekem mi laek toktok nao.” (Job 32:5, 6, 18) Nomata wanem Elihu talem hem kamap tru taem Jehovah mekem Job gud bak moa, samting wea Elihu talem hem important for olketa narawan tu. Hem givim hope long evriwan wea gohed faithful long God.
10. Wanem nao showimaot samfala taem message wea Jehovah givim long wanfala man hem garem bigfala mining tu for olketa man?
10 Samfala taem message wea Jehovah givim long wanfala man hem garem bigfala mining tu for olketa man. Iumi savve lukim diswan long profesi wea Daniel talem abaotem dream wea King Nebuchadnezzar bilong Babylon garem abaotem wanfala mamaeti tree wea olketa katem. (Dan. 4:10-27) Datfala dream hem kamap tru long Nebuchadnezzar, bat hem minim big samting moa. Hem showimaot God bae iusim wanfala kingdom wea bae kam from laen bilong King David for rulim earth moa. Datfala Kingdom bae showaot 2,520 year bihaen long 607 B.C.E., wea hem nao 1914.a Long 1914 Jehovah mekem Jesus Christ kamap King long heven for showimaot rul bilong hem. Tingim olketa nambawan samting wea datfala Kingdom bae duim for pipol wea obey!
“No Letem Hem Go Daon Insaed Long Grev!”
11. Samting wea Elihu talem showimaot wanem abaotem God?
11 Taem Elihu ansarem Job, hem story abaotem “hao nomata wan thousand man for talemaot message hem stap, wanfala spesol wan nao savve helpem man and talem hem wanem nao hem stret.” Wanem nao bae happen sapos man hia hem “prea long God for mekem God hapi long hem”? Elihu hem sei: “God bae hapi long hem and sei, ‘No letem hem go daon insaed long grev! Mi garem price for sevem hem! Body bilong hem bae kamap gud moa winim taem hem young and hem bae strong moa olsem taem hem young.’ ” (Job 33:23-26) Olketa toktok hia showimaot God willing for acceptim wanfala “price” for sevem olketa man wea repent.—Job 33:24.
12. Samting wea Elihu talem givim wanem hope for olketa man?
12 Maet Elihu no minim evri samting abaotem price for sevem man, olsem olketa profet tu no minim evri samting wea olketa raet abaotem. (Dan. 12:8; 1 Pet. 1:10-12) Nomata olsem, wanem Elihu talem mekem olketa man garem hope. God bae acceptim price for sevem olketa man and mekem olketa man no savve olo and no dae. Samting wea Elihu talem mekem iumi garem hope for laef olowe. Buk bilong Job tu showim hao olketa man wea dae finis bae laef bak moa.—Job 14:14, 15.
13. Samting wea Elihu talem hem minim wanem long olketa Christian?
13 Samting wea Elihu talem hem givim hope long staka million Christian distaem wea bae no dae taem God finisim disfala world. Olketa olo bae kamap young moa. (Rev. 7:9, 10, 14-17) Nara samting tu, olketa faithful Christian luk forward long taem wea pipol wea dae finis bae young moa taem olketa laef bak. Olketa anointed Christian wea garem hope for laef olowe long heven and “olketa nara sheepsheep” bilong Jesus wea garem hope for laef olowe long earth, olketa mas gohed showimaot faith long dae bilong Jesus sapos olketa laek kasem hope bilong olketa.—John 10:16; Rom. 6:23.
Hem Bae Finisim Dae
14. Wanem nao showimaot olketa Israelite needim samting wea winim Law mekem olketa garem hope for laef olowe?
14 Olketa pikinini bilong Abraham kamap wanfala spesol nation taem God mekem agreement witim olketa. Taem Jehovah givim Law bilong Moses long olketa, hem sei: “Iufala mas obeyim olketa law bilong mi and judgem pipol followim tingting bilong mi. Sapos man duim olsem, hem mas followim olketa samting hia tu.” (Lev. 18:5) Bat from datfala Law hem perfect, olketa Israelite no fit for followim evri samting wea Law talem, dastawe Law judgem olketa and showimaot hao olketa needim samting wea winim datfala Law.—Gal. 3:13.
15. Wanem blessing nao Jehovah mekem David for raet abaotem?
15 Nomata Moses storyim disfala hope for laef olowe, Jehovah mekem olketa nara man tu wea raetem Bible for story abaotem diswan. (Ps. 21:4; 37:29) Tingim wanem David raet abaotem. Long wanfala psalm, hem storyim hao pipol wea worshipim Jehovah long Zion garem wan mind. Then hem sei: “Long there nao Jehovah givim blessing and laef olowe.”—Ps. 133:3.
16. Wanem nao bae happen long “full earth” wea Jehovah mekem Isaiah for talem?
16 Jehovah mekem Isaiah for talem profesi abaotem laef olowe long earth. (Readim Isaiah 25:7, 8.) Sin and dae hem olsem wanfala blanket wea kavarem hed bilong man mekem hem no savve brith nao. Bat Jehovah promisim pipol bilong hem hao hem bae finisim sin and dae from “full earth.”
17. Wanem nao Isaiah talem wea Messiah bae duim mekem man savve laef olowe?
17 Tingim samting wea Law bilong Moses talem abaotem datfala goat for Azazel. Long wanfala taem evri year, long Atonement Day, hae priest ‘putim tufala hand bilong hem long hed bilong goat and talemaot evri sin wea olketa Israelite duim. Long disfala wei hem putim evri sin go long datfala goat and datfala goat karem evri sin bilong olketa go long drae ples.’ (Lev. 16:7-10, 21, 22) Isaiah talem hao Messiah bae kam and duim semkaen samting olsem datfala goat. Hem bae karem go evri “sik,” “pain,” and “sin bilong staka pipol” mekem olketa savve laef olowe.—Readim Isaiah 53:4-6, 12.
18, 19. Wanem hope nao Isaiah 26:19 and Daniel 12:13 storyim?
18 Jehovah mekem Isaiah for talem olketa Israelite olsem: “Olketa bilong iumi wea dae finis bae laef bak moa. Pipol bilong mi wea dae finis bae laef bak. Olketa wea stap long grev bae wekap and hapi! Olsem dew bilong iu hem helpem olketa mallow plant, long sem wei tu, earth bae aotem olketa wea dae finis.” (Isa. 26:19) Hebrew Scripture showimaot klia pipol wea dae finis bae laef bak and stap long earth. Taem Daniel hem klosap 100 year, Jehovah promisim hem olsem: “Iu bae rest, bat iu bae laef bak moa and kasem olketa gudfala samting bilong iu long taem wea evriwan laef bak.”—Dan. 12:13.
19 Martha bilivim hao pipol wea dae finis bae laef bak moa, dastawe hem story olsem long Jesus abaotem brata bilong hem wea dae: “Mi savve bae hem laef bak long taem wea evriwan laef bak moa.” (John 11:24) Waswe, olketa samting wea Jesus teachim and wanem olketa disaepol bilong hem raetem long Bible hem difren from disfala hope? Waswe, hem plan bilong Jehovah yet for iumi garem hope for laef olowe long earth? Bae iumi ansarem olketa kwestin hia long study bihaen.
[Footnotes]
Waswe, Iu Savve Minim Kam?
• Olketa man “kamap iusles,” bat God givim wanem hope long olketa?
• Wanem nao showimaot Abraham bilivim olketa man bae laef bak moa?
• Samting wea Elihu talem long Job givim wanem hope for olketa man?
• Wanem nao Hebrew Scripture talem wea showimaot olketa man bae laef bak moa and stap olowe long earth?
[Piksa long page 5]
Samting wea Elihu talem long Job mekem iumi garem hope for no savve olo and no dae
[Piksa long page 6]
God promisim Daniel ‘hem bae laef bak moa long taem wea evriwan laef bak’