Mi Faendem Samting wea Mekem Mi Hapi Tumas

Story bilong Gaspar Martínez

Story bilong mi hem olsem. Mi boy from bush nomoa wea poor. Taem mi kam long taon, mi kasem staka samting. Bat bae iu lukim hao staka samting wea mi kasem hem no samting wea mi tingim bae mi kasem.

MI BIG kam long Rioja area long north part bilong Spain long olketa year bihaen 1930. Hem wanfala ples long bush wea drae tumas. Taem mi 10 year nomoa, mi no skul nao. Nomata olsem, mi savve hao for read and raet. Mifala sevenfala pikinini long famili bilong mi, and mi lukaftarem olketa sheepsheep and wakem garden long olketa smol pis land bilong mifala.

From mifala poor tumas, mifala tingse wei for kasem selen and olketa material samting nao important tumas. Mifala jealous long pipol wea garem staka samting. Nomata olsem, bishop long church bilong mifala talem vilij bilong mifala nao “strong for go long church long diocese bilong hem.” Bat bishop no luksavve hao gogo staka pipol long vilij bae lusim Catholic religion.

Mi Trae for Lukaotem Gud Samting

Mi maritim Mercedes, wanfala gele long vilij bilong mi. No longtaem bihaen, mitufala garem wanfala boy. Long 1957, mifala muv long Logroño, wanfala taon wea klosap long vilij bilong mifala. Gogo evriwan long famili bilong mi muv long there tu. Bat from mi no skulim wanfala waka, hem lelebet hard for faendem waka wea sapotim famili bilong mi. Mi no savve wanem nao bae helpem mi. Mi go long library, bat mi no savve wanem buk nao bae helpem mi.

Bihaen, mi herem wanfala program long radio offerim Bible study course wea olketa sendem long pipol. No longtaem bihaen mi finisim datfala course, samfala Evangelical Protestants story long mi. Mi go tu-thri taem long ples wea olketa hipap for worship, bat mi lukim samfala bigman bilong olketa raoa. Mi no go bak long datfala ples and mi tingse evri religion bae semsem nomoa.

Samting wea Luk Olsem Scale Bilong Fish Foldaon From Eye Bilong Mi

Long 1964, wanfala young man Eugenio kam long haos bilong mifala. Hem wanfala Jehovah’s Witness. Nomata mi nating savve long datfala religion, mi hapi tumas for story abaotem Bible. Mi tingse mi savve gud long Bible. Taem hem askem mi kwestin, mi talem samfala Bible scripture wea mi lanem long course wea mi tekem. Mi trae for defendim olketa teaching bilong olketa Protestant, bat mi no barava bilivim olketa teaching hia.

Long tufala taem wea mitufala story, mitufala story abaotem staka samting. Eugenio hem savve tumas hao for iusim Bible. Mi sapraes hem savve faendem olketa scripture and storyim hao olketa scripture savve helpem mi, nomata hem no skul gud olsem mi. Eugenio showim mi long Bible hao iumi stap long olketa last day and klosap nao Kingdom bilong God bae mekem earth kamap paradaes. Mi laek savve samfala samting moa.—Ps. 37:11, 29; Isa. 9:6, 7; Matt. 6:9, 10.

Mi start for studyim Bible. Klosap evri samting wea mi lanem hem niu long mi and hem barava kasem heart bilong mi. Mi garem hope for kasem gudfala samting long future. Mi faendem nao samting wea mekem mi hapi tumas. Olketa samting wea mi trae hard for kasem bifor wea mi tingse hem important, mi no tingim olketa important nao. And hard taem wea mi kasem for faendem gudfala waka, mi no tingim tumas tu. Sapos no eniwan bae sik and dae long future, olketa problem wea mi kasem bae nomoa tu!—Isa. 33:24; 35:5, 6; Rev. 21:4.

Taem mi lanem olketa samting hia, mi go storyim long olketa relative bilong mi. Mi hapi tumas taem mi talem olketa God bae mekem earth kamap paradaes and olketa man wea faithful long God bae stap olowe long earth.

Famili Bilong Mi Acceptim Truth

No longtaem bihaen, samting olsem 12-fala long mifala hipap long haos bilong uncle bilong mi evri Sunday aftanun for storyim olketa promis long Bible. Mifala savve story for tu or thri hour evri week abaotem diswan. Taem Eugenio lukim staka relative bilong mi interest long Bible, hem markem taem for helpem evri famili.

Samfala relative bilong mi stap long Durango, wanfala smol taon wea stap 120 kilometer from mifala. Bat no eni Witness stap long datfala taon. So bihaen thrifala month, mi tekem tu-thri day holiday for go lukim olketa mekem mi savve storyim samting wea mi lanem. Long datfala taem, samting olsem 10-fala relative hipap tugeta evri evening, and mi story long olketa go kasem midolnaet. Evriwan hapi for lisin long mi. Taem mi lusim olketa, mi givim samfala Bible and buk bilong iumi long olketa. Bihaen mifala savve story tugeta samfala taem.

Mi nomoa preach long Durango. Taem olketa Witness kasem long there, olketa faendem 18 pipol laek for studyim Bible. Olketa Witness hapi for markem taem for evri famili garem Bible study.

Go kasem datfala taem, Mercedes hem no interest long truth. Hem olsem bikos hem fraetem olketa man and no from hem no laekem olketa teaching long Bible. Long datfala taem, gavman long Spain tambuim preaching waka bilong Olketa Jehovah’s Witness. Mercedes tingse gavman bae stopem tufala pikinini bilong mitufala for no skul and pipol bae raosem mifala from ples wea mifala stap long hem. Bat taem hem lukim full famili acceptim truth, hem tu laek for study.

Insaed tufala year nomoa, 40 long famili bilong mi baptaes for showimaot olketa dedicate long God. Famili bilong mi garem sem hope olsem mi. Mi feel olsem mi duim bigfala samting nao. Mifala lanem staka samting from God.

Taem Mi Olo Mi Hapi Go Moa

Insaed 20 year bihaen, mi waka hard for lanem tufala boy bilong mi and helpem kongregeson. Taem mitufala Mercedes muv long Logroño, samting olsem 20 Witness nomoa stap long datfala taon wea garem 100,000 pipol. No longtaem bihaen, mi kasem staka waka long kongregeson.

Then taem mi 56 year, company wea mi waka long hem satem factory and mi no garem waka nao. From mi laek tumas for duim preaching waka full taem, mi tingim hem gudfala taem for mi pioneer. Selen wea mi kasem from gavman hem smol nomoa, and hem no isi for mifala kasem need bilong mifala. Mercedes duim samfala klining waka mekem mifala savve kasem need bilong mifala. Mifala evritaem kasem wanem famili bilong mifala needim. Mi gohed pioneer, and samfala month Mercedes hem auxiliary pioneer. Hem laekem tumas preaching waka.

Long samfala year wea go finis, Mercedes evritaem givim olketa magasin long wanfala young gele, Merche, wea studyim Bible taem hem smol. Merche barava laekem olketa buk bilong iumi, and Mercedes lukim hao Merche tinghae yet long olketa tru samting wea hem lanem finis long Bible. Gogo Merche hem study and hem gohed gud. Bat hasband bilong hem, Vicente, hem drink tumas and evritaem lusim waka bilong hem. From hem olsem, hem no sapotim Merche and tufala no stap gud.

Mercedes askem Merche sapos hem laekem mi for story long Vicente. Gogo mitufala story. Bihaen mi visitim hem staka taem, hem studyim Bible. Vicente start for change nao. Hem no savve drink for staka day. Gogo hem no savve drink for wanfala week or winim datwan. Then hem no drinkim alcohol nao. Lukluk bilong hem barava difren nao, and famili bilong hem stap gud. Full famili bilong hem, witim waef and dota bilong hem, olketa barava helpem smolfala kongregeson long Canary Islands wea olketa stap long hem distaem.

Mi Tingim Gudfala Laef Bilong Mi

Nomata samfala relative bilong mi wea lanem olketa teaching long Bible olketa dae finis, famili bilong mifala big go moa, and God barava blessim mifala. (Prov. 10:22) Mi hapi tumas hao klosap evri relative bilong mi wea start for studyim Bible 40 year go finis, olketa gohed faithful long Jehovah witim olketa pikinini bilong olketa and grani bilong olketa tu!

Staka relative bilong mi distaem olketa Witness, and staka long olketa elder, ministerial servant, and pioneer. Firstborn boy bilong mi witim waef bilong hem, tufala waka long branch office bilong Olketa Jehovah’s Witness long Madrid, Spain. Taem mi kamap Witness, samting olsem 3,000 brata and sista nao stap long Spain. Distaem hem winim 100,000. Mi hapi tumas for pioneer, and mi tinghae long God from hem givim nambawan laef long mi. Nomata mi no skul gud, samfala taem mi duim waka olsem substitute circuit overseer.

Long samfala year go finis, mi herem hao no staka pipol stap long vilij wea mi big kam long hem. From staka pipol poor, gogo evriwan mas lusim land and haos bilong olketa and go lukaotem nara ples wea bae mekem olketa kasem gud samting. Staka long olketa hia faendem nambawan samting wea mi faendem. Olketa lane abaotem God. Mifala lanem hope hem stap and wei for worshipim Jehovah bae mekem man barava hapi narawe.

[Piksa long page 32]

Klosap full famili bilong Brata Martínez wea insaed long truth