Wanem Jesus Teachim Abaotem Kingdom Bilong God

“Hem go long evri taon and vilij for preachim gud nius abaotem kingdom bilong God.”​—LUKE 8:1.

IUMI evriwan savve laek storyim olketa samting wea important long iumi olsem olketa samting wea iumi tinghae long hem. Olsem Jesus talem, “samting wea man tingting tumas abaotem nao bae hem storyim.” (Matthew 12:34) Taem iumi tingim olketa samting wea Jesus storyim taem hem duim ministry bilong hem, iumi savve Kingdom bilong God nao barava important long hem.

Wanem nao Kingdom bilong God? Wanfala kingdom hem gavman wea king nao rulim. So Kingdom bilong God hem wanfala gavman wea God nao startim. Staka taem nao Jesus story abaotem Kingdom bilong God. Datwan nao main samting wea hem teachim long pipol. Disfala toktok Kingdom hem stap winim 110 taem long olketa Gospel. Bat Jesus no talem nomoa olketa samting abaotem datfala Kingdom. Olketa samting wea hem duim tu teachim iumi staka samting abaotem Kingdom bilong God and wanem datfala Kingdom bae duim.

Hu nao King long Kingdom? God nao chusim man wea King long Kingdom bilong Hem and no olketa pipol. Olketa samting wea Jesus teachim showimaot hem nao man wea God chusim for kamap King.

Jesus savve long olketa profesi long Bible wea talem hao Messiah wea God promisim bae rul long wanfala Kingdom wea no savve finis. (2 Samuel 7:​12-​14; Daniel 7:​13, 14; Matthew 26:63, 64) Jesus tu talem long pipol hem nao Messiah. Datwan showimaot hem nao King wea God chusim for rul. (John 4:​25, 26) Dastawe Jesus talem datfala toktok “kingdom bilong mi” staka taem.​—John 18:36.

Jesus talem tu hao olketa narawan bae rul witim hem long datfala Kingdom. (Luke 22:28-​30) Hem sei olketa hia nao “smol sekson bilong olketa sheepsheep” bikos olketa no staka tumas. Jesus sei olsem abaotem olketa: “Dadi bilong iufala hem hapi for givim kingdom long iufala.” (Luke 12:32) Lastfala buk long Bible showimaot hao 144,000 nao bae rul witim Christ.​—Revelation 5:​9, 10; 14:1.

Wea nao Kingdom bilong God hem stap? Jesus sei olsem long Pontius Pilate wea hem bigman long Rome: “Kingdom bilong mi hem no bilong disfala world.” (John 18:36) Kingdom bilong God wea Christ nao King long hem bae no iusim eni gavman long earth for rul long hem. Staka taem Jesus sei datfala Kingdom bilong God hem “kingdom wea hem bilong heven.”a (Matthew 4:​17; 5:​3, 10, 19, 20) So Kingdom bilong God hem gavman wea stap long heven.

Jesus savve finis bihaen hem dae, hem bae laef bak and go bak long heven. Hem sei hem bae go “redyim ples” for olketa wea bae rul witim hem long heven.​—John 14:​2, 3.

Wanem nao Kingdom bae duim? Jesus teachim olketa man wea lisin long hem for prea long God olsem: “Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.” (Matthew 6:​9, 10) God duim olketa samting wea hem plan for duim long heven. Hem bae iusim Kingdom for duim wanem hem plan for duim long disfala earth tu. Disfala Kingdom bae changem staka samting long earth for mekem datfala plan kamap tru.

Wanem nao Kingdom bae duim for earth? Jesus talem hao Kingdom bilong God bae finisim evri nogud samting. Hem bae finisim pipol wea duim olketa rabis samting. (Matthew 25:31-​34, 46) So hem minim datfala Kingdom bae finisim evri rabis samting and wei for raverave. Jesus sei pipol wea “hambol,” raeteous, sorre long nara pipol, “garem gudfala heart,” and wea stap gud witim narawan, olketa nao bae stap long earth.​—Matthew 5:​5-9.

Waswe, olketa faithful pipol hia mas stap long disfala earth wea pipol spoelem? Olketa bae stap long earth bat earth bae no olsem distaem! Jesus promisim hao Kingdom bilong God bae changem staka samting long earth. Wanfala man wea hange saed long Jesus hem sei long hem: “Jesus, plis, iu tingim mi taem iu king.” Jesus sei long hem: “Mi talem iu tru samting, Iu bae stap witim mi long Paradaes.” (Luke 23:42, 43) Tru tumas, Kingdom bilong God bae mekem full earth kamap paradaes, olsem long garden bilong Eden.

Wanem moa bae Kingdom duim for olketa man? Hem tru, Jesus talem wanem nao Kingdom bilong God bae duim, bat hem showimaot tu wanem datfala Kingdom bae duim. Jesus duim staka mirakol for healim pipol. Bat long future, hem bae healim staka pipol moa taem hem rul long Kingdom. Gospel bilong Matthew hem sei olsem abaotem Jesus: “Hem go long evri ples long Galilee. Hem teach long olketa sinagog and hem preachim datfala gud nius abaotem kingdom. Hem healim enikaen sik wea pipol garem.”​—Matthew 4:​23.

Jesus healim pipol wea garem olketa difren kaen sik. Hem “mekem eye bilong man wea blind taem hem born for lukluk.” (John 9:​1-7, 32, 33) Jesus tasim man wea garem nogud sik leprosy and man hia gud nao. (Mark 1:​40-​42) Taem pipol tekem kam long Jesus “wanfala man wea earpas and wea no savve toktok gud,” Jesus showimaot hem savve “mekem olketa wea earpas for herehere and olketa wea no savve toktok for toktok moa.”​—Mark 7:​31-​37.

Disfala King wea God chusim garem paoa tu for mekem pipol wea dae for laef bak. Bible storyim thrifala wea Jesus mekem olketa for laef bak. Thrifala nao hem boy bilong wanfala widow woman, wanfala gele wea 12 year, and fren bilong hem Lazarus.​—Luke 7:​11-​15; 8:​41-​55; John 11:38-​44.

Jesus showim vision long aposol John abaotem olketa nambawan samting wea pipol wea stap long earth bae kasem taem Kingdom bilong God rulim olketa. Hem sei long John: “Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. Hem bae aotem evri tias from eye bilong olketa, and no eniwan bae dae moa, and no eniwan bae sorre or krae or feel pain moa. Olketa samting long bifor bae nomoa nao.” (Revelation 1:1; 21:​3, 4) Tingim datwan. No eniwan bae sorre, feel pain, or dae! Long datfala taem, prea for plan bilong God for disfala earth bae kamap tru long sem wei wea hem kamap tru long heven.

Wanem taem nao bae Kingdom bilong God kam? Jesus talem hao taem hem start for rul olsem King, hem nao taem wea hem “stap.” Jesus story abaotem staka samting wea bae happen wea bae showimaot hem start for rul. Long datfala taem, olketa nogud samting bae happen long full world. Pipol long wanfala ples bae faetem pipol long nara ples, plande pipol bae hangre, olketa earthquake bae sekem staka ples, plande pipol bae kasem olketa barava nogud sik, and staka pipol bae duim olketa samting wea no stret. (Matthew 24:​3, 7-​12; Luke 21:10, 11) Olketa samting hia witim staka nara samting wea Jesus talem hem start for happen long 1914, wea hem nao year World War I hem start. Datwan showimaot Jesus hem King distaem. Klosap nao datfala Kingdom bae kam and mekem samting wea God plan for duim long earth kamap tru.b

Taem Kingdom bilong God hem kam, wanem nao bae happen long iu? Datwan depend nao sapos iu chus for acceptim message bilong Jesus or nomoa.

[Olketa Footnote]