Theocratic Ministry Skul
Goal: For trainim olketa pablisa mekem olketa savve gud long hao for duim waka for preachim gud nius and for teachim pipol.
Hao Long?: Evri week.
Ples: Kingdom Hall.
Hu Nao Savve Join?: Olketa wea evritaem kam long olketa meeting, bilivim olketa teaching long Bible, and followim olketa Bible principle long laef.
Hao for Join: Theocratic Ministry Skul overseer nao raetem nem bilong olketa wea laek join. Sharon, wea paralyze from hem garem sik wea olketa kolem amyotrophic lateral sclerosis (ALS), hem sei: “Theocratic Ministry Skul hem helpem mi for savve hao for duim research and for story long kliafala wei. Hem helpem mi tu for no tingim nomoa spiritual saed bilong miseleva, bat bilong olketa narawan tu.”
Arnie, wea hem traveling overseer for staka year finis, hem sei: “Taem mi smol, toktok bilong mi savve paspas, and mi savve shame for luk long eye bilong narawan taem mi story witim hem.” Hem sei Theocratic Ministry Skul helpem hem for no fraet for story witim narawan, and hem lanem samfala teknik for helpem toktok bilong hem for no paspas. Arnie sei tu: “Mi barava tinghae long training wea mi kasem wea helpem mi for praisem God long kongregeson and long ministry.”
Skul for Olketa Niu Bethelite
Goal: For helpem olketa niu Bethelite for gohed gud long assignment bilong olketa.
Hao Long?: 45 minute each week for 16-fala week.
Ples: Bethel.
Hu Nao Savve Join?: Hem mas wanfala Bethelite, or wanfala temporary volunteer wea olketa appruvim for waka long Bethel for wan year or winim wan year.
Hao for Join: Evri niu Bethelite bae attendim disfala skul.
Demetrius wea attendim disfala skul winim 20 year go finis, hem sei: “Disfala skul hem mekem mi savve hao for study gud and hem helpem mi for stap long Bethel for longfala taem. Olketa wea tekem disfala skul, olketa subject wea mifala skulim, and gudfala advaes wea mifala kasem hem mekem mi luksavve Jehovah lovem mi, and hem laekem mi for gohed gud long assignment bilong mi long Bethel.”
Kaitlyn hem sei: “Hem helpem mi for luksavve barava important samting nao hem for mi mas strong long spiritual wei. Skul for Olketa Niu Bethelite hem helpem mi for savve gud and tinghae long Jehovah, haos bilong hem, and organization bilong hem.”
Kingdom Ministry Skul
Goal: Hem for trainim olketa traveling overseer, elder, and samfala taem olketa ministerial servant for duim gud waka bilong olketa long kongregeson and olketa nara privilege wea olketa kasem long organization bilong Jehovah. (Acts 20:28) Hem storyim tu samfala problem or danger samting wea savve affectim olketa brata and sista distaem. Governing Body nao arrangem disfala skul for kamap evri tu-thri year.
Hao Long?: For olketa traveling overseer disfala skul hem for tu or tu and haf day, for olketa elder hem for wan and haf day, and for olketa ministerial servant hem for wanfala day.
Ples: Staka taem hem kamap long wanfala Kingdom Hall or Assembly Hall.
Hu Nao Savve Join?: Hem for olketa traveling overseer, elder, or ministerial servant.
Hao for Join: Circuit overseer nao invaetem olketa elder and ministerial servant. Branch office nao invaetem olketa traveling overseer.
“Nomata skul hia storyim staka information insaed short taem nomoa, hem strongim olketa elder and helpem olketa for gohed faithful and hapi long waka bilong Jehovah. Hem trainim olketa niu elder and olketa wea elder for longtaem tu for garem wan mind and for lukaftarem gud olketa sheepsheep.”—Quinn (long daon).
“Information wea mifala kasem long disfala skul hem barava helpem mifala for minim gud olketa Bible teaching, hem warnim mifala long olketa danger samting, and hem helpem mifala for lukaftarem gud olketa sheepsheep. Jehovah hem kaen tumas for helpem mifala long wei olsem.”—Michael.
Pioneer Service Skul
Goal: Hem for helpem olketa pioneer for ‘barava duim gud ministry bilong olketa.’—2 Tim. 4:5.
Hao Long?: Tufala week.
Ples: Branch office nao bae talem ples. Staka taem hem long Kingdom Hall.
Hu Nao Savve Join?: Olketa wea regular pioneer for wan year or winim wan year finis.
Hao for Join: Olketa pioneer wea fit bae kasem invitation from circuit overseer for joinim disfala skul.
Lily (raet saed) hem sei: “Datfala skul helpem mi for deal witim olketa hard samting wea mi kasem long ministry and long laef bilong mi.” Hem sei tu: “Mi kamap moabeta long wei for study, teach, and iusim Bible. Skul hia helpem mi for savve hao for helpem narawan, sapotim olketa elder, and helpem kongregeson for gohed gud.”
Brenda, wea attendim disfala skul tufala taem finis, hem sei: “Long taem wea skul gohed mi busy nomoa long olketa spiritual samting, mi strongim konsens bilong mi, and mi busy for helpem olketa narawan. Jehovah hem barava kaen tumas!”
Skul for Olketa Elder
Goal: Hem for helpem olketa elder for duim gud waka bilong olketa long kongregeson, and for savve gud long wanem Jehovah laekem olketa for duim.
Hao Long?: Faevfala day.
Ples: Branch office nao bae talem ples. Staka taem hem long Kingdom Hall or Assembly Hall.
Hu Nao Savve Join?: Olketa elder.
Hao for Join: Branch office nao invaetem olketa elder.
Diswan hem toktok bilong samfala wea attendim mek-92 class long America.
“Mi kasem staka gud samting from disfala skul. Hem helpem mi for lukluk long miseleva, and hem teachim mi for lukaftarem olketa sheepsheep bilong Jehovah.”
“Disfala skul helpem mi for savve hao for mekhae long olketa main point long Bible for strongim olketa narawan.”
“Mi bae iusim disfala training long full laef bilong mi.”
Skul for Olketa Traveling Overseer and Waef
Goal: Hem for helpem olketa circuit and distrik overseer for duim gud waka bilong olketa taem olketa visitim olketa kongregeson and for “waka hard for storyim and teachim toktok bilong God.”—1 Tim. 5:17; 1 Pet. 5:2, 3.
Hao Long?: Tufala month.
Ples: Branch office nao bae talem ples.
Hu Nao Savve Join?: Olketa circuit and distrik overseer.
Hao for Join: Branch office nao invaetem olketa traveling overseer and waef.
“Disfala skul helpem mifala for barava tinghae long wei wea Jesus hem hed long kongregeson. Hem helpem mifala for luksavve mifala mas encouragem olketa brata and sista, and helpem olketa kongregeson wea mifala visitim for garem wan mind. Nomata waka bilong traveling overseer hem for givim advaes and samfala taem givim kaonsel tu, disfala training helpem mifala for savve main goal bilong mifala hem for helpem olketa brata luksavve Jehovah hem lovem olketa.”—Joel, 1st class, 1999.
Bible Skul for Olketa Singol Brata
Goal: Hem for helpem olketa singol elder and ministerial servant for duim olketa waka long organization bilong Jehovah. Staka wea attendim disfala skul savve kasem assignment for go long ples wea need hem stap long kantri bilong olketa. Olketa narawan savve kasem assignment for go long nara kantri sapos olketa willing. Samfala maet kasem assignment olsem temporary spesol pioneer for preach and for startim olketa kongregeson long olketa niu territory.
Hao Long?: Tufala month.
Ples: Branch office nao bae talem ples. Staka taem hem long Kingdom Hall or Assembly Hall.
Hu Nao Savve Join?: Olketa singol brata wea age bilong olketa hem midolwan long 23 and 62 year wea garem gudfala health and wea laek for talemaot gud nius long ples wea garem need. (Mark 10:29, 30) Olketa mas regular pioneer for winim tufala year finis. And tu, olketa mas elder or ministerial servant for winim tufala year finis, and no stop for duim datwan insaed tufala year hia.
Hao for Join: Olketa savve holem wanfala meeting long circuit assembly for storyim diswan long olketa wea interest.
Rick, wea attendim mek-23 class long America hem sei Bible training wea hem kasem hem barava affectim heart bilong hem. Hem sei: “Taem Jehovah givim wanfala assignment long iu, hem bae helpem iu for duim datwan. Wanem mi lanem nao, sapos mi tingting strong for duim wanem God laekem and no depend long miseleva, God bae strongim mi for duim waka bilong hem.”
Andreas, wea hem wanfala brata long Germany, hem sei: “Training wea mi kasem helpem mi for luksavve wei wea organization bilong God waka distaem hem olsem wanfala mirakol.” Hem sei tu: “Datfala training redyim mi for waka wea mi bae duim. And tu, staka example long Bible wea mifala storyim helpem mi for luksavve long disfala tru samting: Wei for waka for olketa brata and sista and for Jehovah savve mekem mi kasem trufala hapi.”
Bible Skul for Olketa Hasband and Waef
Goal: Hem for givim spesol training long olketa hasband and waef mekem olketa fit for duim moa samting long organization bilong Jehovah. Olketa wea attendim disfala skul maet kasem assignment for go long ples wea need hem stap long kantri bilong olketa, or sapos olketa willing, long nara kantri. Maet samfala kasem assignment olsem temporary spesol pioneer for preach and for startim olketa kongregeson long olketa niu territory.
Hao Long?: Tufala month.
Ples: Disfala skul hem kamap long America, and start long September 2012, bae hem kamap long samfala nara kantri tu, long wanfala Kingdom Hall or Assembly Hall.
Hu Nao Savve Join?: Olketa hasband and waef wea midolwan long 25 and 50 year, garem gudfala health, fit for go long ples wea garem need, and wea garem sem tingting olsem Isaiah wea sei: “Mi long hia! Sendem mi.” (Isa. 6:8) Olketa mas marit for winim tufala year finis, and mas insaed full-taem service for winim tufala year finis, and no stop for duim datwan insaed tufala year hia. Hasband mas elder or ministerial servant for winim tufala year finis, and no stop for duim datwan insaed tufala year hia.
Hao for Join: Olketa savve holem meeting long distrik convention for storyim information for olketa wea interest. Sapos no eni meeting kamap long convention long kantri bilong iu, iu savve raet go long branch office for kasem moa information.
“Training wea mifala kasem insaed long eitfala week hia hem bigfala samting long laef bilong mitufala! Hem nambawan samting for olketa hasband and waef wea laek duim moa samting long organization bilong Jehovah. Mitufala bae traem best for gohed garem simpol laef mekem mifala savve iusim taem bilong mifala long wise wei.”—Eric and Corina (long daon), 1st class, 2011.
Watchtower Bible Skul Bilong Gilead
Goal: Hem for trainim olketa student for duim missionary waka long field long ples wea garem big population, for duim traveling waka, or for waka long Bethel. Goal bilong skul hem for helpem preaching waka and waka long Bethel for organize gud.
Hao Long?: Faevfala month.
Ples: Watchtower Educational Center, Patterson, New York, U.S.A.
Hu Nao Savve Join?: Olketa hasband and waef wea insaed spesol full-taem service finis, wea minim olketa missionary wea stap long field wea no go long Gilead yet, olketa spesol pioneer, olketa traveling overseer, or olketa Bethelite. Olketa mas duim spesol full-taem service tugeta for winim thrifala year finis, and no stop for duim datwan insaed thrifala year hia. Olketa mas savve gud for readim, raetem, and story long English.
Hao for Join: Branch Komiti savve invaetem olketa hasband and waef for apply.
Lade and Monique from America kasem assignment for go long Africa. Lade sei: “Training wea mifala kasem long Gilead Skul hem redyim mitufala for go long eni ples long world, and for willing for waka witim olketa brata and sista bilong iumi.”
Monique sei tu: “Taem mi followim wanem mi lanem long Bible, datwan mekem mi barava hapi long assignment bilong mi. Hapi wea mi kasem hem mekem mi luksavve Jehovah hem lovem mi.”
Skul for Olketa Branch Komiti Member and Waef
Goal: Hem for helpem olketa brata long Branch Komiti for lukaftarem olketa Bethel hom, and for lukaftarem olketa samting saed long olketa kongregeson and saed long olketa circuit and distrik. Hem helpem olketa for savve tu abaotem waka long transleison, printing, and shipping.
Hao Long?: Tufala month.
Ples: Watchtower Educational Center, Patterson, New York, U.S.A.
Hu Nao Savve Join?: Olketa Branch Komiti member or Kantri Komiti member, or olketa brata wea kasem assignment for duim datfala waka bat olketa no start yet.
Hao for Join: Governing Body nao invaetem olketa brata hia and waef bilong olketa.
Lowell and Cara, wea attendim mek-25 class, tufala stap long Nigeria. Lowell hem sei: “Skul hia hem helpem mi for no forget nomata mi barava busy or nomata wanem waka nao mi kasem, main samting hem for duim olketa samting hia followim tingting bilong Jehovah and datwan nao bae mekem hem hapi.” Hem sei tu: “Skul hia teachim mifala for luksavve hao hem barava important for mifala showimaot love long narawan olsem hao Jehovah hem lovem pipol bilong hem.”
Cara hem sei tu: “Wanfala samting wea mi lanem wea mi tingting strong long hem nao hem diswan: Sapos mi no savve explainim gud wanfala point for narawan minim, mi need for studyim gud datfala subject bifor mi trae for teachim long narawan.”