Hem Kam From Famili Bilong Caiaphas

Samfala taem, pipol wea studyim olketa samting long bifor faendem wanfala samting wea pruvim samwan wea Bible story abaotem hem really laef bifor. Olsem example, long 2011, olketa savveman long Israel pablisim information abaotem wanfala samting wea samwan faendem wea story abaotem samwan wea laef bifor. Hem wanfala box for putim olketa bon bilong man wea dae finis insaed. Datfala box hem 2,000 year old.

Raeting wea stap long datfala box hem sei: “Miriam wea hem dota bilong Yeshua, son bilong Caiaphas, wea hem priest from laen bilong Maʹaziah, from Beth ʹImri.” Hae priest bilong olketa Jew wea insaed long sekson wea kotem and killim dae Jesus, hem Caiaphas. (John 11:48-50) Man for raetem history, Flavius Josephus, sei nem bilong datfala priest hem “Joseph, wea nara nem bilong hem Caiaphas.” Luk olsem Miriam hem wanfala relative bilong disfala priest. Why nao olketa ting olsem? Long bifor, olketa faendem nara box olsem wea olketa tingse hem bilong hae priest hia. Raeting long datfala box hem sei Yehosef bar Caiapha, wea minim Joseph, son bilong Caiaphas.a So luk olsem Miriam hem relative bilong Caiaphas.

Datfala organization wea olketa kolem Israel Antiquities Authority (IAA) hem sei olketa tekem disfala box bilong Miriam from samfala man wea stealim from wanfala grev. Taem olketa savveman chekim disfala box and raeting wea stap long hem, olketa faendem disfala box hem tru wan.

Disfala box bilong Miriam hem mekem iumi savve long wanfala niu samting tu. Hem story abaotem “Maʹaziah,” wea hem wanfala long 24 sekson bilong olketa priest wea waka long temple long Jerusalem. (1 Chron. 24:18) IAA sei raeting long disfala box hem showimaot “famili bilong Caiaphas hem kam from laen bilong Maʹaziah.”

Nara samting tu, raeting long disfala box hem story abaotem Beth ʹImri. Olketa savveman no really sure long barava mining bilong diswan. IAA sei maet “Beth ʹImri hem nem bilong wanfala famili wea priest, wea olketa son bilong Immer (Ezra 2:36-37; Nehemiah 7:39-42), and samfala long olketa kam from laen bilong Maʹaziah.” Or maet Beth ʹImri hem “nem bilong hom bilong Miriam or ples wea famili bilong hem kam from.” Nomata wanem, box bilong Miriam pruvim pipol wea Bible story abaotem, and famili bilong olketa, olketa pipol wea really laef bifor.