Hem Kam Long Barava Taem

“NAMBAWAN!” Hem nao toktok bilong staka pipol bihaen olketa lukim datfala “Creation Drama.” Hem kam long barava taem and olketa wea lukim datwan hard for forgetim. Datfala “Creation Drama” mekhae long Jehovah no longtaem bifor Hitler start for barava persecutim pipol bilong God long Europe. Bat wanem nao datfala “Creation Drama”?

Long 1914, hedquarter bilong pipol bilong Jehovah long Brooklyn, New York, long America, releasem “Photo-Drama of Creation.” Hem wanfala movie wea eit hour wea garem olketa kala piksa and slide and saond tu. Staka pipol raonem world lukim datfala movie. Long datfala sem year olketa releasem “Eureka Drama” wea hem no long tumas olsem datfala “Photo-Drama.” Bat kasem olketa year bilong 1920, olketa slide, movie, and projector wea olketa iusim for showim “Photo-Drama” hia hem start for nogud nao. Nomata olsem, staka pipol laek for lukim moa “Photo-Drama.” Olsem example, samfala pipol long Ludwigsburg, Germany, ask olsem: “Wanem taem nao bae iufala showim moa datfala ‘Photo-Drama’?” Wanem nao bae olketa brata duim?

Long datfala taem samfala brata long Bethel long Magdeburg, Germany, peim olketa movie and slide from olketa company long Paris, Leipzig, and Dresden. Olketa joinim olketa movie and slide hia witim samfala slide wea gud yet from datfala “Photo-Drama.”

Brata Erich Frost, wea savve tumas long music, hem raetem music for olketa pleim witim datfala movie. Toktok wea go witim datfala movie hem kam from Creation buk. Dastawe olketa kolem disfala niu movie “Creation Drama.” Hem nao changem datfala “Photo-Drama.”

“Creation Drama” tu hem eit hour. Olketa no showim wantaem nomoa, bat pipol mas kam tu-thri naet for lukim datfala full movie. Hem showim interesting information abaotem creation, storyim history, and showimaot false religion hem nating helpem olketa man. Olketa showim datfala “Creation Drama” long Austria, Germany, Luxemburg, and Switzerland, and long olketa nara ples wea pipol savve long German languis.

Erich Frost sei: “Taem mifala showim ‘Creation Drama,’ mi encouragem olketa narawan, especially olketa wea pleim music witim mi, for iusim taem bilong spel for go offerim olketa nambawan buk bilong iumi long pipol wea sidaon long audience. Mifala offerim staka literature winim taem mifala go from haos tu haos.” Johannes Rauthe, wea mekem arrangement for showim “Creation Drama” long Poland and Czech Republic, hem sei staka wea kam lukluk givim address bilong olketa for eniwan go lukim olketa bihaen. Taem olketa brata and sista duim return visit, pipol hia interest tumas for story abaotem Bible.

Go kasem olketa year bilong 1930, staka pipol hipap long evri ples wea olketa showim datfala “Creation Drama,” and datwan mekem plande pipol long olketa taon hia story abaotem Olketa Jehovah’s Witness. Kasem 1933, klosap wan million pipol nao lukim finis datfala “Creation Drama.” Käthe Krauss hem sei: “Olketa showim datfala Drama long faevfala naet. From mifala barava laek for lukim, evriday mifala wakabaot 20 kilometer for go and kam. Mifala wakabaot long bush, and ap and daon long olketa hill tu.” Else Billharz sei: “Datfala ‘Creation Drama’ nao mekem mi start for interest long truth.”

Alfred Almendinger sei bihaen mami bilong hem lukim datfala Drama hem “hapi tumas, so hem go peim wanfala Bible and trae for faendem datfala word ‘purgatory’ insaed long hem.” From mami bilong hem no faendem datfala word insaed long Bible, hem lusim church bilong hem and hem baptaes. Erich Frost hem sei: “Staka pipol kam insaed long truth bikos long datfala ‘Creation Drama.’”—3 John 1-3.

Long semtaem wea namba bilong pipol wea lukim “Creation Drama” start for kamap big, rul bilong olketa Nazi kamap strong long Europe and olketa start for mek trabol. Start long 1933, gavman long Germany tambuim waka bilong olketa Witness long there. Start long datfala taem go kasem end bilong World War II long 1945, pipol bilong Jehovah long Europe kasem bigfala persecution. Long datfala taem Erich Frost stap long prison for eitfala year. Bihaen datwan hem waka long Bethel long Wiesbaden, Germany. Hem gud tumas from datfala “Creation Drama” hem kam long barava taem for strongim faith bilong staka Christian bifor olketa kasem bigfala test long World War II!—From branch office long Germany.