Jehovah Hem Sef Ples Bilong Iumi

1, 2. (a) Wanem nao tingting bilong pipol bilong God abaotem disfala world? (b) Wanem nao sef ples bilong pipol bilong God?

WASWE, iu feel sef and hapi for stap long disfala nogud world? Sapos nomoa, iu semsem witim olketa narawan wea worshipim Jehovah bifor. From bifor kam, evriwan wea lovem Jehovah feel olsem olketa stranger long disfala world. Olsem example, samfala faithful wakaman bilong God bifor wea mas go stap long olketa difren ples long Canaan feel olsem stranger tu. Bible sei olketa “talemaot olketa stranger nomoa and stap for lelebet taem nomoa long ples wea olketa stap.”—Heb. 11:13.

² Olketa anointed disaepol bilong Christ olketa citizen bilong heven. Olketa tu feel olsem “pipol bilong difren kantri and olketa stranger” long disfala world. (Phil. 3:20; 1 Pet. 2:11) “Olketa nara sheepsheep” bilong Christ tu “no olsem pipol long world,” olsem Jesus hem no olsem pipol long world. (John 10:16; 17:16) Nomata olsem, pipol bilong God garem wanfala sef ples. Hem no ples wea iumi savve lukim witim eye bilong iumi, bat hem wanfala ples wea iumi barava sef and kasem love winim eni nara ples. Wanem nao diswan? Moses sei: “Jehovah, iu nao sef ples bilong mifala long distaem and long future.”a (Ps. 90:1) Hao nao Jehovah hem “sef ples” for pipol bilong hem bifor? Hao nao hem “sef ples” for pipol bilong hem distaem? And wanem nao bae hem duim long future for showimaot hem nomoa “sef ples” for pipol bilong hem?

JEHOVAH HEM “SEF PLES” FOR PIPOL BILONG HEM BIFOR

3. Psalm 90:1 hem comparem Jehovah witim wanem samting, and why nao olsem?

³ Samfala taem Bible comparem Jehovah witim samting wea iumi savve lukim for helpem iumi minim olketa wei bilong hem. Olsem example, Psalm 90:1 hem comparem Jehovah witim wanfala “sef ples” or haos wea man savve stap. Haos bilong iumi hem ples wea famili wea lovem iumi olketa stap, and hem ples wea iumi stap gud and stap sef. Why nao Bible comparem Jehovah witim datwan? Bible sei Jehovah hem love. (1 John 4:8) Hem sei tu hem God wea givim peace and hem protectim pipol bilong hem. (Ps. 4:8) Olsem example, bae iumi storyim wei wea Jehovah hem sef ples for Abraham, Isaac, and Jacob.

4, 5. Hao nao God blessim and protectim Abraham?

⁴ Maet Abraham no savve why nao Jehovah sei olsem long hem: “Lusim kantri bilong iu and olketa relative bilong iu . . . and go long kantri wea mi bae showim long iu.” Bat masbi next samting wea Jehovah talem hem barava comfortim Abraham. Hem sei: “Mi bae mekem wanfala big nation kamaot from iu and mi bae blessim iu and mi bae mekem iu garem bignem.” Jehovah sei tu: “Mi bae blessim olketa wea blessim iu, and bae mi cursim man wea cursim iu.”—Gen. 12:1-3.

⁵ Jehovah promis for blessim and protectim Abraham and olketa pikinini bilong hem, and hem duim wanem hem promisim. (Gen. 26:1-6) Olsem example, hem no letem Pharaoh bilong Egypt and King Abimelech bilong Gerar for killim dae Abraham and tekem waef bilong hem Sarah. Hem protectim Isaac and Rebekah long sem wei tu. (Gen. 12:14-20; 20:1-14; 26:6-11) Bible sei: “[Jehovah] no letem eni man for spoelem olketa, dastawe hem stretem olketa king, and sei: ‘Iufala mas no tasim olketa anointed wan bilong mi, and no duim eni nogud samting long olketa profet bilong mi.’”—Ps. 105:14, 15.

6. Wanem nao Isaac talem Jacob for duim, and wanem nao maet samfala samting wea Jacob hem wari abaotem?

⁶ Jehovah lukaftarem gud tu Jacob, wea hem grani bilong Abraham. Taem Jacob laek for marit, dadi bilong hem Isaac sei long hem: “Iu mas no maritim wanfala gele from Canaan. Iu go long Paddan-aram long famili bilong Bethuel, wea hem dadi bilong mami bilong iu, and maritim wanfala dota bilong Laban.” (Gen. 28:1, 2) Jacob hem obeyim dadi bilong hem. Hem lusim famili bilong hem long Canaan and hem go seleva for plande handred kilometer go kasem Haran. (Gen. 28:10) Maet hem no sure hao long nao bae hem stap farawe from famili bilong hem. Maet hem no sure tu sapos uncle bilong hem bae hapi for lukim hem, or sapos hem bae faendem wanfala waef wea lovem Jehovah. Bat samting wea happen taem Jacob kasem Luz, wea hem 100 kilometer from Beer-sheba, hem helpem Jacob for no wari tumas. Wanem nao happen?

7. Hao nao God comfortim Jacob?

⁷ Long Luz, Jacob lukim Jehovah long wanfala dream and Jehovah sei long hem: “Mi bae stap witim iu long evri ples wea iu go long hem and mi bae tekem iu kam bak long disfala ples, bikos mi bae no lusim iu go kasem taem wea mi duim samting wea mi promisim long iu.” (Gen. 28:15) Masbi disfala toktok barava comfortim Jacob, and mekem hem laekem tumas for lukim hao nao Jehovah bae duim samting wea hem promisim. Sapos iu lusim hom bilong iu for duim waka bilong Jehovah long nara kantri, maet iu wari olsem Jacob tu. Nomata olsem, iu luksavve hao Jehovah hem lukaftarem iu long staka difren wei.

8, 9. Hao nao Jehovah hem “sef ples” for Jacob, and wanem nao iumi lanem from datwan?

⁸ Taem Jacob arrive long Haran, uncle bilong hem Laban hem hapi for welkamim hem, and bihaen, hem letem Jacob maritim tufala dota bilong hem, Leah and Rachel. Bat gogo, Laban hem start for mekful long Jacob and hem ravem hem saed long wages bilong hem! (Gen. 31:41, 42) Bat Jacob hem no givap bikos hem trustim Jehovah for lukaftarem hem. From diswan Jehovah blessim Jacob, and taem God talem hem for go bak long Canaan, Jacob garem “staka sheepsheep, haosgele, wakaman, and olketa camel and donkey.” (Gen. 30:43) Jacob hem tinghae tumas long evri samting wea Jehovah duim for hem and hem prea olsem: “Iu kaen tumas long wakaman bilong iu and iu duim wanem iu promisim long hem, nomata mi no fit for kasem evri samting hia. Taem mi akrosim Jordan River, mi holem nomoa walking stik bilong mi, bat distaem famili bilong mi hem big and mi fit for divaedem olketa long tufala grup.”—Gen. 32:10.

⁹ Olketa example hia showimaot samting wea Moses talem hem tru, taem hem sei: “Jehovah, iu nao sef ples bilong mifala long distaem and long future”! (Ps. 90:1) Jehovah hem no change. Distaem tu hem lovem, protectim, and lukaftarem olketa wea faithful long hem. (Jas. 1:17) Bae iumi storyim hao nao hem duim datwan.

JEHOVAH HEM “SEF PLES” BILONG IUMI DISTAEM

10. Why nao iumi sure Jehovah hem “sef ples” for pipol bilong hem distaem?

¹⁰ Tingim sapos iu wanfala witness insaed long kot case againstim wanfala man wea garem bigfala savve and paoa. Hem man for laea and killim man dae, and hem garem staka wakaman raonem world. Waswe, bae iu feel sef bihaen iu story finis long datfala kot and iu go aot? Barava nomoa nao! Bae iu ask for olketa protectim iu. Olsem tu, iumi wea worshipim Jehovah talemaot long pipol tru samting abaotem nogud enemy bilong Jehovah, Satan! (Readim Revelation 12:17.) Bat waswe, Satan hem win for stopem pipol bilong God for duim diswan? Nomoa! Distaem iumi preach long staka pipol raonem world winim bifor. Hao nao olsem? Bikos Jehovah hem “sef ples” bilong iumi. Long olketa last day distaem, hem protectim and blessim pipol bilong hem winim enitaem bifor. (Readim Isaiah 54:14, 17.) Bat Jehovah no savve gohed olsem “sef ples” bilong iumi sapos iumi letem Satan switim iumi for lusim datfala ples.

11. Wanem nao nara samting wea iumi savve lanem from example bilong Abraham, Isaac, and Jacob?

¹¹ Tingim nara samting wea iumi savve lanem from example bilong Abraham, Isaac, and Jacob. Nomata olketa stap long Canaan, olketa stap difren from pipol long datfala ples and heitim olketa nogud samting wea pipol hia duim. (Gen. 27:46) Olketa no needim olketa rul for savve wanem nao hem stret and wanem nao hem no stret. Olketa savve long olketa samting wea Jehovah lovem and heitim. So olketa traem best for no olsem pipol long world. Olketa showimaot nambawan example for iumi! Waswe, iu traem best for followim example bilong olketa hia? Waswe, hapitaem or olketa fren wea iu chusim showimaot iu no laek for olsem pipol long world? Sorre samting nao, samfala long kongregeson laekem samfala samting bilong disfala world bilong Satan. Sapos iu tu feel olsem lelebet, iu mas prea long Jehovah for helpem iu. Iumi mas no forget, disfala world hem bilong Satan, and Satan hem selfish and nating lovem iumi.—2 Cor. 4:4; Eph. 2:1, 2.

12. (a) Wanem nao Jehovah givim for helpem pipol bilong hem? (b) Hao nao iu ting long olketa samting wea Jehovah givim for helpem iumi?

¹² Sapos iumi no laekem Satan for trikim iumi, iumi mas kasem gud samting from evri spiritual samting wea Jehovah givim for pipol bilong hem. Olsem example, iumi garem olketa Christian meeting, famili worship, and olketa elder wea comfortim and sapotim iumi mekem iumi no givap taem iumi kasem olketa problem. (Eph. 4:8-12) Brata George Gangas, wanfala member bilong Governing Body for plande year bifor hem sei: “Taem mi stap witim [pipol bilong God], mi feel olsem mi stap witim famili bilong mi and mi feel sef.” Waswe, iu feel olsem tu?

13. Wanem important samting nao iumi savve lanem from Hebrew 11:13?

¹³ Nara important samting wea iumi lanem from example bilong Abraham, Isaac, and Jacob hem for no fraet for difren from nara pipol. Olsem iumi readim long paragraf 1, olketa faithful man hia “talemaot olketa stranger nomoa and stap for lelebet taem nomoa long ples wea olketa stap.” (Heb. 11:13) Waswe, iu showimaot iu difren from pipol long world? Samfala taem diswan no isi. Bat iu fit for duim diswan witim help bilong God and olketa brata and sista bilong iu. Iu mas no forget, hem no iu nomoa wea feisim diswan. Evriwan wea laek for worshipim Jehovah mas faet againstim Satan and disfala world! (Eph. 6:12) Bat iumi savve win sapos iumi trust long Jehovah and sapos hem nao sef ples bilong iumi.

14. Wanem nao datfala “taon” wea Abraham weitim?

¹⁴ Iumi shud followim example bilong Abraham and evritaem tingim reward wea iumi bae kasem. (2 Cor. 4:18) Aposol Paul sei Abraham “weitim datfala taon wea garem strongfala faondeson wea God nao planim and buildim.” (Heb. 11:10) Datfala “taon” hem Kingdom bilong God. Abraham mas weitim datfala “taon” for kam. Bat iumi no need for weit. Kingdom bilong God hem gohed for rul distaem long heven, and profesi long Bible showimaot klia klosap nao bae hem rul ovarem full earth. Waswe, evri samting iu duim long laef bilong iu showimaot iu barava biliv long datfala Kingdom? Waswe, Kingdom hem first samting long laef bilong iu? Waswe, iu traem best for no olsem pipol long disfala world?—Readim 2 Peter 3:11, 12.

JEHOVAH BAE “SEF PLES” BILONG IUMI GO KASEM END

15. Wanem nao bae kasem olketa wea trustim disfala world?

¹⁵ Bifor disfala world hem finis, olketa problem bae kamap worse. (Matt. 24:7, 8) And taem datfala big trabol hem start, laef bae barava hard. Staka samting bae finis and pipol bae konfius and fraet fogud. (Hab. 3:16, 17) Bible sei from pipol fraet fogud bae olketa go haed long “olketa cave and bihaen long olketa bigfala ston long olketa maunten.” (Rev. 6:15-17) Bat no eni cave or bigfala bisnis or sekson bilong politik bae protectim olketa.

16. Hao nao iumi shud ting long Christian kongregeson, and why nao olsem?

¹⁶ Jehovah bae protectim iumi long datfala big trabol. Olsem profet Habakkuk, bae iumi hapi long God bilong iumi wea savve sevem iumi. (Hab. 3:18) Hao nao Jehovah bae protectim iumi long datfala hard taem? Bae iumi mas weit and lukluk. Bat iumi sure pipol bilong Jehovah bae organize and kasem instruction from hem, olsem long taem wea olketa Israelite lusim Egypt. (Readim Exodus 13:18; Rev. 7:9) Hao nao bae iumi kasem olketa instruction hia from Jehovah? Maet hem iusim kongregeson for duim datwan. Profesi long Isaiah 26:20 storyim “olketa rum” wea pipol bilong God bae kasem protection insaed. Maet diswan minim olketa kongregeson raonem world. (Readim Isaiah 26:20.) Waswe, iu tinghae long olketa kongregeson meeting? Waswe, iu kwiktaem for obeyim olketa samting wea Jehovah talem iumi long olketa meeting?—Heb. 13:17.

17. Long wanem wei nao Jehovah hem “sef ples” bilong olketa faithful wan wea dae finis?

¹⁷ Nomata olketa faithful wan wea dae bifor datfala big trabol, Jehovah hem “sef ples” bilong olketa tu. Long wanem wei? Hem bae resurrectim olketa. Longfala taem bihaen Abraham, Isaac, and Jacob dae, Jehovah talem Moses hem God bilong olketa yet. (Ex. 3:6) Jesus talem moa datfala toktok and hem sei tu: “Hem God bilong olketa wea laef, hem no God bilong olketa wea dae finis, bikos long tingting bilong hem, evriwan hia laef nomoa ia.” (Luke 20:38) From Jehovah bae resurrectim olketa faithful wan wea dae, and no eni daot hem stap abaotem datwan, hem olsem olketa laef yet.—Eccl. 7:1.

18. Hao nao Jehovah bae hem “sef ples” for pipol bilong hem long niu world?

¹⁸ Long niu world, Jehovah bae “sef ples” bilong pipol bilong hem long wanfala spesol wei. Revelation 21:3 hem sei: “Tent bilong God hem stap witim olketa man [and] hem bae stap witim olketa.” For wan thousand year, Jehovah bae iusim Jesus Christ for rul ovarem earth. Long end bilong datfala wan thousand year, Jesus bae givim Kingdom go bak long Jehovah bihaen hem duim finis evri samting wea Dadi bilong hem laekem hem for duim long disfala earth. (1 Cor. 15:28) Then Jehovah seleva nao bae rulim olketa man wea perfect. Nambawan future hem stap front long iumi! Sapos iumi followim example bilong olketa faithful wan bifor wea Jehovah hem “sef ples” bilong olketa, bae Jehovah hem “sef ples” bilong iumi tu distaem.