ANSA FOR OLKETA BIBLE KWESTIN

Wanem nao Judgment Day?

Long taem bilong Bible, God garem olketa judge for sevem pipol bilong hem from olketa nogud pipol wea spoelem olketa. (Judges 2:18) Bible story abaotem Judgment Day wea bae kamap long future olsem taem for hapi bikos Jehovah, wea hem Judge bilong full earth bae sevem olketa man from olketa nogud pipol wea spoelem olketa.—Readim Psalm 96:12, 13; Isaiah 26:9.

God markem Jesus for judgem olketa wea laef and olketa wea dae finis. (Acts 10:42; 17:31) Staka pipol wea dae olketa no savve long God. Long taem bilong Judgment Day, Jesus bae mekem olketa hia for laef bak mekem olketa garem chance for savve long trufala God and for lovem hem.—Readim Acts 24:15.

Why nao Judgment Day bae gohed for wan thousand year?

Olketa wea dae finis bae laef bak insaed datfala wan thousand year. (Revelation 20:4, 12) Olketa bae needim taem for lane abaotem God and for duim wanem hem laekem. Staka pipol tingse God bae judgem olketa wea resurrect followim wanem olketa duim taem olketa laef yet. Bat Bible showimaot God bae judgem olketa followim wanem olketa duim bihaen olketa resurrect.—Readim Rome 6:7.

Bible storyim tu wanfala day wea God bae judgem pipol wea bae seknomoa happen bifor start bilong datfala wan thousand year. Olsem iumi storyim long kava subject long disfala magasin, datfala day hem end bilong world. Long datfala taem God bae finisim olketa wea no obeyim hem. (2 Peter 3:7) So distaem iumi laek for traem best bilong iumi for duim wanem God hem laekem.—Readim 2 Peter 3:9, 13.