Astrology and Pipol wea Sei Olketa Savve Long Future—Iumi Fit for Trustim?

ASTROLOGY

Astrology (biliv wea sei olketa star, moon, and olketa planet savve affectim laef bilong pipol) hem part long spiritism. Pipol wea followim diswan sei taem man born, samting wea affectim future and wei bilong hem nao position bilong olketa star, moon, and olketa planet.

Nomata astrology start kam long Babylon bifor, staka pipol distaem bilivim yet. Long 2012, olketa duim survey long United States and faendaot staka pipol bilivim astrology hem “garem pruv saed long science,” and samfala nomoa no sure sapos hem “garem pruv saed long science or nomoa.” Waswe, astrology garem pruv saed long science? Nomoa. Diswan nao samfala reason.

• Olketa planet and olketa star no garem paoa wea savve affectim pipol olsem olketa wea bilivim astrology talem.

• Staka taem samting wea olketa talem hem savve fitim eniwan nomoa.

• Olketa calculation saed long astrology distaem, olketa wakem followim biliv bilong pipol bifor wea sei olketa planet go raonem earth. Bat tru samting nao, olketa planet go raonem sun.

• Sapos samwan askem tufala man wea bilivim astrology for talem future bilong hem, bae tufala no talem sem samting.

• Pipol sei wei bilong evriwan bae followim olketa zodiac saen wea matchim date wea olketa born. Bat tru samting nao, wei bilong pipol wea born long sem day no semsem. Pipol wea bilivim astrology no tingim iumi evriwan garem wei bilong iumiseleva, bat olketa guessim nomoa wei bilong pipol followim date wea olketa born. Man wea garem kaen tingting olsem abaotem narawan hem ting daonem hem, iaman?

PIPOL WEA SEI OLKETA SAVVE LONG FUTURE

From bifor yet, pipol savve go long olketa wea sei olketa savve long future. Samfala wea duim diswan savve faendaot long mining bilong olketa samting taem olketa studyim bele bilong animal or bele bilong man wea olketa aotem finis. Or olketa savve lukluk long hao wanfala man kokorako hem kaikaim grain. Olketa narawan savve lukluk long sheip bilong olketa tea leaf or coffee mekem olketa savve talem future bilong man followim datwan. Distaem pipol iusim olketa tarot card, crystal ball, daes, and olketa nara samting for talem future bilong man. Waswe, iumi fit for trustim pipol wea duim olketa samting hia? Nomoa. Bae iumi storyim samfala reason.

Tingim diswan. Pipol wea iusim olketa difren samting for talem wanem bae happen long future, staka taem olketa talem samting wea no agree witim each other. Nomata olketa wea iusim sem samting for talem wanem bae happen long future, olketa tu olsem. Olsem example, sapos samwan askem tufala man wea iusim sem card for talem future bilong hem, iumi expectim ansa bilong tufala for semsem. Bat staka taem tufala bae talem difren ansa.

Staka pipol distaem daotem olketa wea sei olketa savve long future. Olketa sei olketa no trustim olketa samting wea olketa iusim olsem olketa card or crystal ball. Hem no olketa samting hia nao helpem olketa for talem future bilong man, bat akson and wanem man talem nao helpem olketa long diswan. Olsem example, olketa bae askem samfala kwestin long man for herem tingting bilong hem and for lukluk long akson bilong hem. Datwan nao bae helpem olketa for savve wanem for talem long datfala man. Then bae olketa talem toktok wea luk olsem olketa nao savve long evri samting abaotem man hia, batawea, datfala man nao givim information long olketa. From pipol trustim olketa, olketa kasem bigfala selen from pipol hia.

WANEM BIBLE TALEM

Astrology and pipol wea sei olketa savve long future, mekem pipol bilivim God disaedem finis future bilong iumi. Waswe, datwan hem tru? Nomoa. Bible showimaot iumi savve chusim wanem bae iumi bilivim or wanem iumi laek for duim, and tu, samting wea iumi chusim nao savve affectim future bilong iumi.—Josua 24:15.

Man wea worshipim God hem garem narafala reason tu for rejectim astrology and pipol wea sei olketa savve long future. God barava heitim evri samting wea join witim spiritism. Bible sei: “Yufala mas no letem eniwan mekem sakrifaes fo save abaotem wanem bae hemi kamap bihaen [“future,” NW]. Yufala mas no letem eniwan fo mekem enikaen majik o poesen. Yufala mas no letem eniwan wakem grinlif. An yufala mas no letem eniwan fo kolem olketa devoldevol, o toktok long spirit blong man hu hemi dae. Eniwan hu hemi mekem olketa kaen wei ya, hemi barava nogud tumas long ae blong [Jehovah].”a—Diutronomi 18:10-12.