Showimaot Thankiu Long Jehovah for Loving-Kaeness Bilong Hem
Iumi Bae Celebratem Dae Bilong Christ Long March 24
1. Hao nao Jehovah showimaot loving-kaeness long iumi?
1 Man wea raetem psalm sei olsem: “Pipol mas talemaot thankiu long Jehovah for loving-kaeness bilong hem and olketa nambawan waka bilong hem for olketa son bilong man.” (Ps. 107:8) Moa samting hem insaed long loving-kaeness bilong God winim wei for kaen and minim feeling bilong pipol nomoa. Diswan showaot klia long datfala toktok for praisem hem wea holy spirit muvim man for raetem, wea sei: “Loving-kaeness bilong iu, O Jehovah, hem gohed for strongim mi.” (Ps. 94:18) Jehovah showimaot barava spesol loving-kaeness taem hem givim only Son wea hemseleva nao wakem for kam dae for iumi!—1 John 4:9, 10.
2. Hao nao iumi savve showimaot thankiu bilong iumi long Jehovah?
2 From klosap nao bae iumi celebratem Memorial bilong dae bilong Christ, hao nao iumi savve showimaot thankiu long “God bilong loving-kaeness”? (Ps. 59:17) Iumi wanwan bae laek for markem taem for ting raonem olketa lastfala day wea Jesus stap long earth. (Ps. 143:5) Iumi bae kasem gud samting tu taem iumi duim spesol Bible reading for Memorial wea stap long Lukluk Long Olketa Scripture Evriday—2005 and trae for readim and duim research tu long chapter 112-16 long Nambawan Man buk and olketa nara Bible pablikeson. Ting raonem wanem iu readim, and tingting strong abaotem datwan. (1 Tim. 4:15) Wei for study and prea strongim heart, and tu, hem showimaot iumi lovem Jehovah.—Matt. 22:37.
3, 4. (a) Hao nao iumi savve followim example bilong olketa brata long Liberia? (b) Hu nao iu ting for invaetem long Memorial?
3 Muvim Olketa Narawan for Showimaot Thankiu Long God: Last year 16,760,607 attendim Memorial evriwea long world. Long wanfala vilij long Liberia, olketa brata raetem leta long chief bilong taon for talem hem hao olketa laek celebratem Evening Kaikai Bilong Lord long taon bilong hem. Chief hia letem olketa brata for iusim field for plei soccer and hem mekem announcement abaotem diswan for invaetem pipol wea stap long datfala area for attend. Nomata faevfala pablisa nomoa stap long datfala vilij, 636 nao attendim Memorial!
4 Long sem wei tu, iumi laek encouragem staka pipol for joinim iumi for celebratem Memorial. Waswe, sapos iu raetem nem bilong olketa wea iu laek invaetem? Piksa wea stap long last page bilong March 8 Awake! and March 15 Wastaoa invaetem pipol for kam long Memorial. Iu savve givim tu Memorial pepa for invaetem pipol. Raetem klia long datfala pepa, taem and ples for celebratem Memorial, and givim long evriwan wea iu invaetem. Taem March 24 kakam klosap, go lukim olketa moa for remindim olketa and for mek sure samting iu arrangem witim olketa hem set nao.
5. Hao nao iumi savve encouragem olketa Bible student for kam long Memorial?
5 Hao nao iumi savve helpem olketa Bible student wea no attendim yet eni meeting for attend and barava kasem gud samting from Memorial? Iusim lelebet taem long study for helpem olketa minim hao disfala celebration hem important tumas. Gudfala information stap long March 15, 2004, Wastaoa, page 3-7, and Reasoning buk, page 266-9.
6. Why nao hem important for welkamim olketa niu wan long Memorial?
6 Welkamim Olketa Niu Wan wea Attend: Long taem bilong Memorial, story witim and welkamim olketa niu wan wea attend. (Rom. 12:13) Sidaon witim olketa wea iu invaetem, and mek sure olketa garem Bible and songbuk. Iumi shud faswan for welkamim olketa inactive brata and sista wea kam long Memorial. Wei wea iumi showimaot interest long olketa maet helpem olketa for start kaban moa witim kongregeson. (Luke 15:3-7) Long disfala taem wea barava holy, iumi laek for duim best bilong iumi for encouragem olketa narawan for joinim iumi for showimaot thankiu long Jehovah for “nambawan loving-kaeness” bilong hem.—Ps. 31:21.