“Gohed for Duim Olsem for Rememberim Mi”
Iumi Bae Celebratem Dae Bilong Jesus Long April 2
1. Why nao April 2, 2007, hem wanfala important date?
1 Long April 2, 2007, evriwea long world plande million pipol bae hipap for celebratem wei wea Jesus dae olsem wanfala sakrifaes. Jesus hem dae bikos hem sapotim haefala rul bilong Dadi bilong hem long heven wea diswan pruvim hao Satan hem laea taem hem talem hao only reason why olketa man servem God hem from olketa bae kasem gud samting for olketa seleva. (Job 2:1-5) Evening Kaikai Bilong Lord remindim iumi tu hao taem Jesus givim laef bilong hem wea perfect and no garem sin olsem sakrifaes, hem “givim soul bilong hem olsem ransom for baem bak plande pipol.” (Matt. 20:28) Dastawe Jesus komandim olketa disaepol bilong hem olsem: “Gohed for duim olsem for rememberim mi.” (Luke 22:19) Waswe, wei for tinghae long disfala spesol present from God muvim iu for start reredi for celebratem disfala nambawan wei for showimaot love?—John 3:16.
2. Wanem nao iumi savve duim for redyim heart bilong iumi for Memorial?
2 Redyim Heart Bilong Iu: Iumi savve redyim heart bilong iumi for disfala Memorial long wei for ting raonem olketa samting wea happen long olketa lastfala day wea Jesus stap long earth. (Ezra 7:10) For helpem iumi for duim datwan, wanfala schedule for duim spesol Bible reading hem stap long Lukluk Long Olketa Scripture Evriday—2007 and long 2007 Calendar. Disfala Bible reading schedule storyim olketa samting wea happen long olketa day wea lead go long dae bilong Jesus followim olketa day long kalenda wea iumi iusim distaem. Olketa day and date long Bible hem followim kalenda bilong olketa Jew, wea each day hem start taem sun go daon and finis long next day taem sun go daon. Mifala followim datfala wei for kaontem day and Memorial Bible reading schedule followim tu datwan. Wei for reviewim datfala Bible reading and for prea and ting raonem bigfala love bilong God bae helpem iumi for barava kasem gud samting from datfala celebration bilong Memorial.
3. Wanem nao iumi savve duim for helpem olketa wea interest and wea inactive for kasem gud samting from Memorial?
3 Invaetem Olketa Narawan for Kam: Insert bilong February Kingdom Ministry Bilong Iumi storyim spesol waka for invaetem pipol for kam long disfala important samting. Waswe, iu bae changem samfala samting long living bilong iu mekem iu savve share evribit long disfala waka? Waswe, iu raetem nem bilong olketa wea iu laek for invaetem, and waswe, iu talem finis evriwan wea stap long list bilong iu? Plan for go early long evening bilong Memorial mekem iu savve welkamim olketa wea iu invaetem, and tu, olketa narawan wea interest. Maet hem gud for iu sidaon witim olketa and mek sure olketa garem Bible and song buk. Tekem olketa for go story witim olketa narawan long kongregeson. Bihaen long program, ansarem eni kwestin bilong olketa. Invaetem olketa for kam herem spesol pablik tok wea bae kamap long April 15. Olketa elder bae need for mek sure olketa wea joinim kongregeson bifor bat wea kamap inactive kasem invitation for kam long Memorial and spesol tok.
4. Long wanem wei nao iumi savve helpem pipol for muv ahed long spiritual wei bihaen iumi celebratem Memorial?
4 Helpem Olketa Niu Wan wea Interest and Olketa wea Inactive for Muv Ahed: Brata wea givim tok long Memorial bae explainim hao iumi savve duim Bible study witim pipol, and hem bae encouragem olketa niu wan wea interest for gohed lane abaotem Jehovah. Iu savve iusim wanem speaker talem for encouragem olketa wea iu invaetem for lanem moa samting abaotem Jehovah. Sapos distaem olketa no studyim Bible, bihaen Memorial kwiktaem for visitim olketa and showim hao iumi duim Bible study. For olketa muv ahed long savve and faith bilong olketa long God, olketa need tu for kam long olketa kongregeson meeting. (Heb. 10:24, 25) So encouragem olketa for kam long olketa meeting evritaem. Olketa elder shud visitim olketa Christian wea inactive wea kam long Memorial and helpem olketa for ting raonem go moa olketa point insaed tok wea kamap long Memorial. Maet diswan encouragem olketa for start bak moa for waka witim kongregeson.
5. Hao nao iumi savve kasem gud samting from Memorial?
5 Memorial hem taem for iumi barava ting strong raonem samting wea Jehovah and Jesus duim for iumi. Wei for duim datwan bae barava strongim love bilong iumi for tufala and fasin bilong iumi bae showimaot iumi tinghae long samting tufala duim. (2 Cor. 5:14, 15; 1 John 4:11) Distaem nao hem taem for iumi redyim iumiseleva and olketa wea interest for disfala barava important taem wea ‘‘talemaot dae bilong Lord.”—1 Cor. 11:26.