Strongim Go Moa Bible!
1. Long fastaem, hu nao main sekson wea olketa pablisim Wastaoa for olketa, and The Golden Age hem for hu nao?
1 Long October 1, 1919, olketa pablisim fasfala issue bilong The Golden Age magasin. Datwan hem nambawan tul for iusim long preaching waka. Why nao olsem? Bikos information insaed hem for pipol long community. Bat Wastaoa hem no for pipol long community. For plande year olketa ting long Wastaoa olsem magasin for datfala “smolfala sekson bilong sheep.” (Luke 12:32) From olketa Kingdom pablisa barava hapi for kasem datfala niu pablikeson, for plande year namba bilong olketa The Golden Age magasin wea olketa givimaot hem winim namba bilong Wastaoa.
2. Wanem nao nem bilong The Golden Age distaem, and wanem nao goal bilong hem from taem hem start kam kasem distaem?
2 Olketa pablisim The Golden Age magasin for showim pipol hao only wei for stretem olketa problem long world hem datfala Thousand Year Rul Bilong Christ, wea bae mekem wanfala niu world wea bae garem peace kamap. Long olketa year bihaen, olketa mekem samfala change long The Golden Age magasin mekem hem fitim olketa need bilong pipol wea gohed for change. Long 1937 olketa changem nem bilong hem go long Consolation. Long 1946 hem kamap Awake!, wea hem nao nem wea iumi iusim kam kasem distaem.
3. Awake! hem wanfala barava strongfala tul wea help for fulfillim wanem profesi?
3 From taem wea olketa start for pablisim disfala magasin, hem barava help long bigfala waka for givim witness wea gohed start kam long 1919. (Matt. 24:14) Bat from iumi barava stap klosap long end, luk olsem hem wise for mekem samfala change moa long Awake!
4. (a) Wanem nao man need for duim sapos hem laek for stap sef long “day bilong kros bilong Jehovah”? (b) Olsem Revelation 14:6, 7 talem, datfala “angel wea flae long skae” talem evriwan for duim wanem samting?
4 Plande million pipol laek for readim Awake! bikos hem storyim staka difren subject wea no abaotem religion long wei wea mekem man interest. For sure, bigfala haf long olketa wea attendim Memorial each year readim Awake! evritaem. Nomata olsem, sapos eniwan laek for stap sef long “day bilong kros bilong Jehovah,” bae hem need for duim moa samting winim for readim evritaem olketa pablikeson bilong iumi.—Zeph. 2:3; Rev. 14:6, 7.
5. (a) Start witim Awake! bilong January 2006, wanem nao disfala magasin bae strongim go moa? (b) Maet disfala information muvim plande pipol for duim wanem samting, wea datwan hem fulfillim wanem profesi?
5 So, start long January 2006, Awake! bae strongim Kingdom bilong God long bigfala wei moa. Bae hem barava encouragem olketa reader for faendemaot wanem nao olketa ansa long Bible for olketa problem bilong olketa, and bae hem barava mekhae go moa long samting wea Bible talem abaotem olketa samting wea happen distaem. Long wei olsem, olketa reader bae minim long wei wea moa klia olketa samting wea happen distaem, and maet diswan muvim olketa for laek lanem moa samting abaotem Jehovah.—Zech. 8:23.
6, 7. (a) Hao nao bae Awake! helpem plande pipol for followim 1 Thessalonians 2:13? (b) Haomas taem insaed year nao bae olketa pablisim Awake!, and disfala change bae affectim haomas languis?
6 Awake! bae gohed for storyim olketa difren subject wea pipol interest long hem. Bat bae hem strongim go moa Bible. (1 Thess. 2:13) From Wastaoa storyim olketa deep information from Bible, and Awake! bae garem kaen information wea join witim Bible, luk olsem no eni need stap for gohed pablisim Awake! tufala taem insaed month. So, start long January 2006 issue, olketa bae pablisim Awake! wantaem evri month nomoa. Diswan bae barava mekem hem moa simpol for redim, transleitim, and sendem go literature bilong iumi.
7 Disfala change bae affectim samting olsem 40 percent bilong olketa Awake! wea olketa transleitim long nara languis. Long klosap evri languis, Awake! hem magasin wea olketa pablisim wanfala taem evri month or fofala taem insaed year. Bae no eni samting change saed long Wastaoa.
8. Hao nao olketa pablisa savve iusim Awake! witim Wastaoa?
8 Olketa pablisa savve offerim Awake! for each month witim eniwan long tufala issue bilong Wastaoa for datfala month. Olketa wea laek offerim Awake! bae fit for iusim sem issue for full month, and bae no need for changem wei for startim story long midol bilong month, olsem hao iumi duim distaem.
9. Wanem nao Awake! magasin bae gohed for duim?
9 Start kam long first issue bilong hem long 1919, disfala magasin wea bifor garem olketa nem olsem The Golden Age and Consolation, and wea distaem garem nem Awake!, hem duim bigfala part insaed waka for preachim gud nius. Iumi prea for Jehovah gohed blessim waka for givimaot disfala magasin wea bae garem olketa change hia, and for disfala magasin bae helpem plande moa pipol from “evri nation and tribe and pipol and languis” ting long Kingdom bilong God olsem only hope bilong olketa.—Rev. 7:9.