Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long February 27, 2006. Skul overseer bae conductim wanfala 30-minute review long information wea kamap insaed olketa assignment start long week bilong January 2 go kasem February 27. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul, pp. 36-7.]
OLKETA POINT KAONSEL
1. Long olketa wanem wei nao Theocratic Ministry Skul helpem iumi for ‘givim sakrifaes bilong praise long God and for talemaot nem bilong hem long pablik’? (Heb. 13:15) [1, be-SP p. 5 par. 3–p. 6 par. 1] Skul showim iumi hao for iusim present for toktok wea God givim iumi long gudfala wei. Training wea iumi kasem hem helpem iumi for mekem grow olketa difren kaen savve olsem, wei for lisin and rememberim samting, duim study, research, ting raonem and organizem samting, story witim narawan, ansarem olketa kwestin, and raetem olketa idea. From Bible nao main buk iumi iusim long skul, iumi lane tu for garem tingting bilong God.
2. Why nao iumi shud waka hard for read long stretfala wei? [2, be-SP p. 83 par. 1-5] For read long stretfala wei hem main wei for talem narawan abaotem stretfala savve bilong Bible, and iumi Olketa Jehovah’s Witness ting strong long disfala responsibility. (1 Tim. 2:4) From Word bilong God “hem laef and garem paoa for duim samting” and hem garem spesol savve wea lead go long laef olowe, hem shud goal bilong iumi for read long gudfala wei. (Heb. 4:12; Ps. 119:140; Jer. 26:2)
3. Why nao hem important tumas for toktok klia taem iumi story and teach? [4, be-SP p. 86 par. 1-6] Sapos iumi no story long kliafala wei, pipol bae no minim plande samting wea iumi talem. And tu, hem bae hard for muvim pipol sapos toktok bilong iumi no klia. (1 Cor. 14:8, 9) Sapos iumi tok fast tumas, joinim olketa word tugeta, missim olketa syllable, or katem end bilong word, diswan bae spoelem wei wea iumi teach gud.
4. Why nao stretfala wei for talem word hem important, and wanem nao olketa samting wea man need for tingim? [6, be-SP p. 89 par. 1–p. 90 par. 3, box] Stretfala wei for talem olketa word hem affectim wei wea pipol tinghae long message bilong Kingdom wea iumi preachim. Hem mekem man tingim truth from Bible wea iumi preachim winim wei for tingim nomoa wei wea iumi readim rong wanfala word. For kamap moabeta long diswan, man need for (1) iusim olketa saond wea fitim mekem iu savve talem, (2) strongim olketa syllable wea fitim, and (3) wei for followim olketa diacritic.
5. Wanem nao samfala wei for helpem iumi story long smoothfala wei? [9, be-SP p. 94 par. 5-6, box] Iumi bae story long smoothfala wei sapos iumi traem best for mekem grow namba bilong olketa word wea iumi savve long wei for chekim olketa word wea iumi no savve long dictionary. Iumi bae tok long smoothfala wei sapos iumi tingting firstaem bifor iumi story. Iumi shud lane for ting raonem wanem iumi laek for talem and then talem olketa full sentence and no stop long ples wea no fitim, or talem moa samting wea iumi talem finis.
TOK NO. 1
6. Hao nao 2 Chronicles 36:17-23 pruvim hao man fit for trustim profesi long Bible? [2, bsi06-SP p. 4 par. 35] Toktok wea Ezra talem long 2 Chronicles 36:21 pruvim hao samting Jeremiah profesi abaotem long Jeremiah 25:12 and 29:10 hem fulfill. And tu, toktok bilong Ezra showimaot hao datfala 70 year wea Jerusalem stap emti hem start long taem wea olketa ‘tekem olketa prisoner wea no dae long sword long Babylon’ long “mek-seven month” bilong 607 B.C.E. go kasem taem olketa Jew go bak long hom bilong olketa long “mek-seven month” bilong 537 B.C.E. (2 Ki. 25:25, 26; Ezra 3:1)
7. Olketa wanem samting wea happen nao mekem olketa Jew fit for go bak long hom bilong olketa long 537 B.C.E. mekem olketa buildim moa haos bilong Jehovah? [3, bsi06-SP p. 5 par. 1-3] Cyrus bilong Persia wea hem “shepherd” and “anointed wan” bilong Jehovah tekovarem Babylon long 539 B.C.E. (Isa. 44:28; 45:1) Cyrus no followim wei bilong olketa long Babylon for no letem olketa prisoner kamap free, taem hem mekem law for letem olketa Jew go bak long Jerusalem.
8. Hao nao buk bilong Ezra vindicatem Jehovah olsem trufala God and buildimap wei for trustim hem? [4, bsi06-SP p. 6, 7 par. 14, 18] Buk bilong Ezra strongim hao profesi toktok bilong Jehovah thru long Jeremiah abaotem wei wea Jerusalem bae distroe and kamap gud moa hem stret evribit. (Jer. 29:10) Hem showim hao Jehovah fulfillim toktok bilong hem long barava taem. Wei wea olketa Jew go bak long hom hem mekem kamap feeling for expectim hao long barava taem Jehovah bae mekem kamap King wea hem promisim from laen bilong David. (2 Sam. 7:12, 13)
9. Why nao “mek-twenti year bilong king Artaxerxes” hem important date long Bible? (Neh. 2:1, 5, 6, 11, 17, 18) [5, bsi06-SP p. 7, 8 par. 2, 5] Disfala date (455 B.C.E.) for buildim bak Jerusalem and wall bilong hem help for markem taem wea Messiah bae arrive. Sixti-naen week bilong olketa year, or 483 year, wea start long 455 B.C.E. bae go kasem 29 C.E., wea datwan hem year wea Jehovah anointim Jesus. (Dan. 9:24-27; Luke 3:1-3, 23)
10. Hao nao Nehemiah hem wanfala gud example for olketa servant bilong God distaem? [8, bsi06-SP p. 8 par. 16-17] Wei for worshipim God hem kamap first samting long laef bilong Nehemiah. Hem willing for lusim spesol waka for selen mekem hem savve duim olketa theocratic samting. (Neh. 2:17, 18) Hem nating fraet nomata hem stap long danger. (Neh. 4:14) Hem nating iusim position wea hem garem for kasem gud samting for hemseleva. Hem tok strong againstim wei for lovem tumas material samting. (Neh. 5:14) Hem interest for mekem kamap big faith bilong olketa wea worshipim Jehovah and hem and Ezra waka hard for mekem pipol minim gud Word bilong God. (Neh. 8:8, 9)
BIBLE READING EVRI WEEK
11. Waswe, Urim and Thummim, wea olketa iusim for kasem ansa from Jehovah, hem stap for olketa Jew wea go bak for iusim? (Ezra 2:61-63) No eni story long Bible showimaot hao olketa iusim Urim and Thummim long datfala taem or bihaen. Long kastom story bilong olketa Jew, datfala Urim and Thummim lus taem temple distroe long 607 B.C.E. [3, w06-SP 2/1 “Word Bilong Jehovah Hem Laef—Olketa Main Point From Buk Bilong Ezra”; w86 1/15 p. 8]
12. Why nao plande Jew long Babylon no willing for go bak long Jerusalem witim Ezra? (Ezra 7:28–8:20) For go bak long Jerusalem man mas startim niu laef anda long olketa hard and danger samting. Living long Jerusalem long datfala taem hem no rich olsem living wea olketa Jew garem long Babylon. Datfala gogo hem danger tumas tu. Olketa wea go bak mas garem strongfala faith long Jehovah, strong for tru worship and no fraet for go bak. [4, w06-SP 2/1 “Word Bilong Jehovah Hem Laef—Olketa Main Point From Buk Bilong Ezra”; it-1 p. 797 par. 3]
13. Hao nao man savve iusim wanfala hand nomoa for duim datfala waka for buildim bak wall? (Neh. 4:17, 18) Hem isi nomoa for olketa wea karem hevi samting. Sapos olketa karem hevi samting antap long hed or shoulder, olketa savve balancem witim wanfala hand “taem nara hand holem missile.” Olketa wea build wea mas iusim tufala hand evriwan, each wan “garem sword long hip bilong hem taem hem build.” Long wei olsem, olketa redi for faet sapos enemy hem attak. [5, w06-SP 2/1 “Word Bilong Jehovah Hem Laef—Olketa Main Point From Buk Bilong Nehemiah”; w86 2/15 p. 25]
14. From olketa savve putim olketa private leta insaed bag wea olketa taemap, why nao Sanballat sendem go “wanfala open leta” long Nehemiah? (Neh. 6:5) Maet Sanballat ting for showimaot laea toktok insaed datfala open leta long pablik. Maet hem hope diswan bae mekem Nehemiah kros tumas and bae hem lusim datfala waka for build for kam defendim hemseleva. Or maet Sanballat tingse toktok insaed datfala leta bae mekem olketa Jew barava fraet and stop for duim datfala waka. Nehemiah nating letem datwan for mekem hem fraet, bat hem gohed nomoa for duim assignment wea God givim long hem. [6, w06-SP 2/1 “Word Bilong Jehovah Hem Laef—Olketa Main Point From Buk Bilong Nehemiah”; it-2 p. 239 par. 6]
15. Witim wei for ‘tok stret’ long olketa Jew wea bakslaed, olsem hem duim finis long olketa prince and bigman, wanem moa Nehemiah duim for stretem olketa? (Neh. 13:25, 28) Nehemiah ‘talem hao trabol bae kasem olketa’ wea minim hem talem hao olketa bae kasem judgment wea stap insaed Law bilong God. Hem ‘hitim samfala’ long tokpiksa wei wea maet datwan minim hem duim judicial samting againstim olketa. For showimaot hem barava feel nogud long samting olketa duim wea no stret, hem ‘pullimaot samfala hair bilong olketa.’ Hem raosem tu granson bilong Hae Priest Eliashib wea maritim wanfala dota bilong Sanballat, datfala Horonite. [8, w06-SP 2/1 “Word Bilong Jehovah Hem Laef—Olketa Main Point From Buk Bilong Nehemiah”; it-2 p. 487 par. 5]