Mekem Grow Klos Wei for Fren Witim Jehovah
1. Wanem nao wanfala sista start for luksavve abaotem spiritual schedule bilong hem?
1 Wanfala Christian sista sei: “Mi stap insaed long truth for samting olsem 20 year long wei for attendim olketa meeting and share long field ministry nomoa.” Bat, hem sei moa: “Mi lukim hao nomata olketa samting hia important, olketa no savve sapotim mi evribit taem living kamap hard. . . . Mi luksavve hao mi mas changem tingting bilong mi and startim wanfala gudfala study program mekem mi savve kasem savve abaotem Jehovah for fren witim hem and lovem hem and tinghae long wanem Son bilong hem duim for iumi.”
2. Why nao hem important for mekem grow klos wei for fren witim Jehovah?
2 Man need for waka hard for buildim klos wei for fren witim Jehovah. Hem needim moa samting winim wei for just followim schedule bilong Christian waka. Sapos iumi fail for story evritaem witim Jehovah, bae gogo hem kamap long iumi olsem wanfala fren wea iumi no lukim for longfala taem. (Rev. 2:4) Bae iumi lukluk long hao wei for studyim Bible seleva and prea savve helpem iumi for fren klos witim Jehovah.—Ps. 25:14.
3. Wanem goal saed long wei for study seleva nao bae helpem iumi for kam klos long God?
3 Prea and Wei for Ting Raonem Samting Hem Important: Wei for study seleva wea feedim heart hem minim moa samting winim wei for andalaenem olketa main point long study article and readim olketa scripture olketa raetem insaed. Iumi need for tingting long wanem nao datfala information hem showimaot abaotem olketa wei, standard, and fasin bilong Jehovah. (Ex. 33:13) For minim olketa spiritual samting bae muvim feeling bilong iumi and mekem iumi for tingim living bilong iumi. (Ps. 119:35, 111) Man shud study seleva witim goal for kam klos long Jehovah. (Jas. 4:8) For duim study wea moa deep needim taem and gudfala ples for duim long hem tu, and for duim evritaem hem needim discipline. (Dan. 6:10) Nomata sapos iumi busy tumas, waswe, iu markem taem each day for ting raonem olketa nambawan fasin bilong Jehovah?—Ps. 119:147, 148; 143:5.
4. Hao nao prea long taem bilong study seleva hem helpem iumi for mekem grow wei for fren klos witim Jehovah?
4 Prea from heart hem important part bilong wei for study seleva. For Bible truth hem muvim heart bilong iumi and muvim iumi for “givim holy service wea God acceptim witim fasin for fraet long hem and respect,” iumi needim holy spirit bilong God. (Heb. 12:28) So, iumi shud startim each study witim wei for barava askem Jehovah for spirit bilong hem. (Matt. 5:3) Taem iumi ting raonem olketa Scripture and iusim olketa buk for study wea organization bilong Jehovah provaedem, iumi openem heart bilong iumi long Jehovah. (Ps. 62:8) For duim study olsem hem part bilong worship wea iumi showimaot long Jehovah hao iumi lovem hem and iumi strongim wei wea iumi fren witim hem.—Jude 20, 21.
5. Why nao hem important for iumi ting raonem Word bilong God each day?
5 Olsem hem tru long evri wei for fren, wei wea iumi fren witim Jehovah hem samting iumi mas evritaem waka hard long hem for mekem hem gohed for grow. So, iumi shud baem taem evriday for kam klos long God, from iumi savve diswan bae mekem hem kam klos long iumi.—Ps. 1:2, 3; Eph. 5:15, 16.