Showimaot Iu Really Kea Long Evriwan wea Interest
1 Klosap nao waka for preachim Kingdom evriwea long world bae finis, and bihaen datwan, evriwan “wea no savve long God” bae finis evribit. (2 Thess. 1:7-9) Dastawe, wei for really kea abaotem laef bilong olketa narawan hem muvim pipol bilong Jehovah for trae preachim message bilong Kingdom long staka pipol.—Zeph. 2:3.
2 Evri month, iumi spendem plande million hour for lukaotem olketa wea laek for herem “gud nius abaotem samting wea moabeta.” (Isa. 52:7) From pipol tinghae and enjoyim pablikeson wea iumi offerim long olketa olsem offer for month, olketa willing for acceptim tu olketa Wastaoa and Awake! or disfala brochure Wanem Nao God Mas Kasem From Iumi? Wei for really kea long pipol hia shud muvim iumi for go bak long evriwan wea interest.—Prov. 3:27.
3 Keepim Stretfala Record: Iumi bae duim moa samting sapos iumi keepim stretfala record long evriwan wea interest and literature wea man tekem. Information olsem nem and address bilong haosholder, day and taem wea iu story witim hem, literature wea hem tekem, and point wea iu storyim, bae mekem iu fit for storyim olketa samting wea bae really helpem hem taem iu go bak. And tu, sapos iu raetem samfala samting wea haosholder talem taem iufala story long firstaem, bae iu savve story abaotem datwan long gudfala wei taem iu go bak for story moa witim hem.
4 Kwiktaem for Duim Return Visit: Haomas pipol wea tekem literature from iu last month nao iu trae for visitim moa? Waswe, samfala week go pas finis and iu nating go bak long olketa? Wei for really laekem olketa for kasem gud samting for olowe shud muvim iu for go bak kwiktaem, maet bihaen tu-thri day, taem hem still rememberim story bilong iutufala. Taem iu go bak kwiktaem for mekem interest bilong hem grow, maet iu fit for stopem Satan, bifor hem savve “kam and tekem awe disfala word wea [iu] plantim insaed long olketa.”—Mark 4:15.
5 Important for Prepare: For duim return visit long gudfala wei hem depend long hao iu prepare. Planim story bilong iu bifor iu go bak. Hem important for tingim samfala point for iu sharem taem iu go bak. Wanem nao iu savve talem taem iu go bak long man wea interest? Hao nao for startim wanfala Bible study?
6 Taem iu go bak for story moa abaotem wanem nao bae mekem disfala earth kamap klin and kamap barava gudfala ples for stap long hem, maet iu sei:
◼ “Lastaem mi kam, iumi agree hao samfala big samting mas happen bifor disfala earth savve kamap paradaes wea garem peace. Waswe, iu tingse olketa man fit for duim diswan? [Letem hem ansa.] Plis lukim why God nao bae need for duim samting.” Readim Psalm 37:38. Then go long leson 5 long Kasem brochure, and readim samfala toktok long paragraf 4-5 for showim hao God bae fulfillim disfala profesi. Then offer for iusim disfala brochure for studyim Bible witim hem.
7 Sapos iu story abaotem Kingdom bilong God and offerim “Kasem” brochure long first kol, taem iu go bak iu savve sei olsem:
◼ “Taem iumi story lastaem, iumi lukim Kingdom bilong God hem wanfala really gavman wea bae rulim full earth. Bible showimaot Christ Jesus nao ruler bilong hem. Waswe, iu savve tingim eni gudfala samting wea bae kamap sapos iumi garem diskaen gavman and leader?” Letem hem ansa. Openem Kasem brochure long leson 6. Iusim samfala point long paragraf 6-7 and piksa long page 13 for showim wanem Kingdom bilong God bae duim long future for olketa man. Readim Daniel 2:44, and sapos hem fitim, showim Savvy buk and offerim Bible study.
8 Sapos iu meetim samwan wea luksavve olketa religion long world kosim problem for olketa man, maet iu ask olsem long return visit:
◼ “Waswe, enitaem iu askem iuseleva hao nao iumi fit for luksavve long religion wea God acceptim? [Letem hem ansa.] Disfala brochure Wanem Nao God Mas Kasem From Iumi? storyim samfala mark for luksavve long trufala religion.” Openem leson 13, and mekhae long faevfala point wea stap long italic raeting long paragraf 3-7. Iu savve sei moa: “Iumi mas faendem trufala religion, bat iumi mas faendemaot tu wanem nao God laekem iumi wanwan for duim.” Readim John 4:23, 24. Talem hem iu laek for story moa abaotem diswan. Go long leson 1 long brochure, and showim hem hao iumi savve duim study.
9 Taem iu go bak for story moa abaotem wei for famili stap hapi, iu savve talem samting olsem:
◼ “Taem mi meetim iu lastaem, mi sharem witim iu samting wea savve mekem famili hem hapi, wea hem nao for followim kaonsel long Word bilong God, Bible. Taem iumi tingim need bilong olketa famili distaem, waswe, iu tingse Bible hem oldfala buk nomoa or iu tingse hem fitim distaem tu?” Letem hem ansa. Showim Savvy buk. Go long chapter 2, and readim toktok bilong wanfala man wea stap long paragraf 13. Iusim olketa point long paragraf 3 and offerim famili Bible study.
10 Taem iumi keepim stretfala record, prepare gud, and go bak kwiktaem for mekem interest grow, iumi savve showimaot datkaen love for neiba wea bae pullim olketa kam and wea bae mekem olketa interest for followim wei wea lead go long salvation.—Matt. 22:39; Gal. 6:10.