CHAPTER 5 (Part 4)
Organized to Do Jehovah’s Will, page 35-38
Olketa Overseer for Shepherdim Olketa Sheepsheep
Taem body of elders recommendim brata for kamap overseer, olketa mas tingim wei wea Jehovah ting long olketa seleva and wei wea olketa deal witim olketa Christian brata. Romans 12:3 givim kaonsel hao no eniwan shud “tinghae tumas long [hemseleva] winim wanem hem fitim; bat garem gudfala tingting, fitim faith wea God givim each wan.” Evri brata mas tingim hao olketa narawan hem moa hae winim olketa. No eniwan mas kamap “raeteous tumas” taem olketa trae for luksavve sapos narafala brata hem fit for kamap overseer. (Eccl. 7:16) Taem body of elders ting raonem olketa mark from Bible for olketa elder, olketa mas disaed sapos wanfala brata wea olketa ting for recommendim hem kasem olketa mark hia or sapos hem barava short long wan or tufala mark hia wea mekem hem no fit for serve olsem overseer. From olketa elder luksavve hao no eniwan hem perfect and olketa no saed witim eniwan or garem hypocrite fasin, olketa bae recommendim olketa brata long wei wea showimaot respect for olketa raeteous standard bilong Jehovah and wea bae helpem kongregeson. Olsem Timothy and Titus, olketa elder distaem need for prea taem olketa ting for recommendim samwan and for followim wei wea holy spirit bilong God leadim olketa. Diswan hem wanfala serious responsibility wea olketa garem, and olketa mas duim diswan followim kaonsel bilong Paul for ‘no kwiktaem putim hand bilong olketa antap long eni man.’—1 Tim. 5:21, 22.
Olketa man wea kasem olketa Christian mark for serve olsem overseer fit for protectim kongregeson from olketa samting wea spoelem spiritual saed bilong kongregeson, and olketa showimaot gudfala example saed long fasin for evriwan followim. From olketa elder showimaot gudfala example, olketa free for toktok wea mekem olketa no fraet for givim kaonsel long olketa insaed kongregeson wea needim datwan and hem mekem olketa strong for talemaot gud nius long field ministry.—Acts 4:29; 1 Tim. 3:13; Heb. 10:19-23, 35.
FRUT BILONG SPIRIT
Olketa man wea kasem olketa mark long Bible bae showimaot long laef bilong olketa hao holy spirit nao leadim olketa. Olketa bae showimaot frut bilong spirit wea Galatians 5:22, 23 storyim olsem “love, hapi, peace, long-safaring, kaenfala fasin, gudfala fasin, faith, kwaet fasin, [and] fasin for kontrolem seleva.” Wei wea olketa lukaftarem kongregeson bae strongim spiritual saed bilong olketa brata and bae helpem kongregeson garem wan mind taem olketa duim holy service. Fasin bilong olketa and olketa gud samting wea kamaot from waka bilong olketa bae showimaot klia hao holy spirit nao appointim olketa. (Acts 20:28) From Bible storyim olketa mark wea olketa overseer and shepherd mas kasem, datwan hem mekem iumi garem olketa man wea fit for lukaftarem olketa sheepsheep distaem.
OLKETA MAN WEA ENCOURAGEM KONGREGESON FOR GAREM WAN MIND
Hem important tumas for olketa elder waka tugeta witim each other for encouragem kongregeson for garem wan mind. Nomata each elder garem difren tingting and fasin, olketa keepim wan mind long wei for showimaot respect and lisin long each other nomata sapos olketa no agree long evri samting wea olketa storyim. Sapos body of elders mekem disison wea no againstim eni Bible principle, each elder shud willing for acceptim and sapotim datwan. Wei wea olketa willing for duim olsem hem showimaot hao olketa followim “wisdom from antap,” wea hem nao “keepim peace, [and] hem balance.” (Jas. 3:17, 18) No eni elder shud tingse hemseleva nao hae winim olketa nara elder, and no eni elder shud trae for bossim olketa narawan. Taem olketa elder wea waka olsem body for helpem kongregeson kasem gudfala samting, datwan showimaot hao olketa waka witim Jehovah.—1 Cor., chap. 12; Col. 2:19.
TRAE FOR KASEM PRIVILEGE OLSEM OVERSEER
Waka bilong overseer hem samting wea olketa mature Christian man shud trae for kasem. (1 Tim. 3:1) Bat wei for waka olsem overseer hem minim man mas waka hard and garem fasin for sakrifaesim seleva. Hem mas redi for servem olketa brata, wea minim for helpem olketa gohed fren gud witim God. For kasem disfala responsibility olsem overseer, man mas trae hard for kasem olketa mark insaed long Bible. Olketa overseer long kongregeson garem bigfala responsibility, and tu, olketa mas givim ansa long God long wei wea olketa lukaftarem kongregeson.
Olketa overseer tingting strong long samting wea Hebrews 13:17 talem. Long there, Bible storyim olketa olsem ‘olketa wea lead,’ olketa wea “gardim” olketa brata, and ‘olketa wea bae givim ansa.’ Olketa overseer mas careful for no “bossim” olketa sheepsheep bilong God, mas no iusim paoa bilong olketa for kasem samting for olketa seleva nomoa, and mas willing for serve olsem overseer and no from olketa tingse hem wanfala samting wea olketa mas duim. Olketa overseer mas showimaot olketa lovem olketa sheepsheep bilong God.—1 Pet. 5:2, 3; Prov. 27:23.
Hebrews 13:17 hem givim kaonsel tu long olketa member insaed long kongregeson taem hem sei olsem: “Obeyim olketa wea leadim iufala and stap anda long olketa, from olketa bae ansa for wei wea olketa gardim iufala; mekem olketa duim diswan witim hapi and no witim sorre, from datwan bae spoelem iufala.” Nomata olketa overseer no perfect, evriwan long kongregeson shud stap anda long olketa, from hem nao arrangement bilong Jehovah and olketa overseer nao bae ansa long Hem for samting wea olketa duim. Olketa stand for God and theocratic rul bilong hem. Long sem wei Jehovah iusim holy spirit for appointim wanfala man, hem iusim datfala sem holy spirit for aotem privilege bilong olketa overseer wea no showimaot frut bilong datfala spirit and wea no followim olketa mark insaed long Bible.
Iumi barava tinghae long hard waka and gudfala example wea olketa kongregeson overseer showimaot! Paul encouragem olketa brata long kongregeson long Thessalonica olsem: “Mifala askem iufala olketa brata, for tingim olketa wea waka hard midolwan long iufala and wea Lord markem olketa for lukaftarem and kaonselem iufala; and barava tinghae long olketa from waka wea olketa duim.” (1 Thess. 5:12, 13) Staka waka wea olketa kongregeson overseer duim hem helpem iumi for servem God and kasem hapi from datwan. And tu, long firstfala leta wea Paul raetem long Timothy, hem storyim wei wea olketa brata insaed long kongregeson shud ting long olketa overseer. Hem sei: “Hem fitim for olketa elder wea lead long gudfala wei kasem dabol honor, main wan nao hem olketa wea waka hard for toktok and teach.”—1 Tim. 5:17.