Samting wea Showimaot Strongfala Faith!
1. Wanem samting nao Jesus storyim wea bae mekem pipol wari?
1 Olketa aposol barava lisin gud taem Jesus storyim taem wea hem bae stap and taem wea disfala world bae finis. Hem storyim olketa samting wea bae mekem pipol wari—olketa faet, no inaf kaikai, olketa earthquake, barava nogud sik. Jesus talem tu hao pipol bae heitim olketa follower bilong hem, persecutim olketa, and killim dae olketa. Olketa false profet bae leadim plande pipol go difren. Love bilong plande pipol bae gogo daon.
2. Why nao wei wea olketa preachim gud nius evriwea long world hem mekem iumi sapraes?
2 From evri nogud samting hia bae happen, olketa aposol mas seke taem Jesus talem hao olketa bae preachim gud nius abaotem Kingdom bilong God long full world. (Matt. 24:3-14) Datfala spesol profesi wea Jesus talem hem kamap tru long taem bilong iumi. Nomata iumi stap long olketa barava hard and nogud taem, Olketa Jehovah’s Witness strong for talemaot gud nius. Taem love bilong world gogo daon, love bilong iumi hem strong go moa. Klosap evri nation nao iumi preach long hem nomata “evri nation” heitim iumi.
3. Taem iu lukim datfala report abaotem waka wea gohed evriwea long world, wanem namba nao iu hapi tumas for lukim?
3 Hem barava encouragem iumi for lukluk long waka bilong Olketa Jehovah’s Witness long last service year wea stap long page 3 go kasem 6! Evri year for 16 year finis iumi duim winim wan billion hour for preach and mekem disaepol. Datwan hem samting wea barava showimaot strongfala faith! Namba bilong olketa pioneer hem kamap big 5.8 percent, olketa pablisa hem big 3.1 percent, and olketa Bible study hem big 4.4 percent. Olketa wea baptaes long last service year hem kamap big 20.1 percent. Hem wanfala hapi samting for lukim hao klosap seven million pipol nao gohed for faithful for servem Jehovah. Datfala namba hem big winim enitaem bifor! Taem iu lukluk gud long page 3 go kasem 6, wanem nao iu lukim wea iu barava hapi long hem?
4. Wanem kaen problem nao wanfala man hem winim for hem baptaes?
4 Nomata iumi tinghae long olketa namba hia, iumi mas tingim hao olketa namba hia minim pipol wea showimaot faith. Tingim disfala story. Guillermo hem big kam long Bolivia. Hem born long 1935, hem waka long coca plantation start taem hem naen year nomoa. Taem hem pikinini nomoa, hem start kaikai leaf coca for mekem hem no tingim tumas hard waka wea hem duim. Bihaen, hem start drink beer evritaem and smoke tu. Taem hem start for lanem samting wea Jehovah laekem hem for duim, Guillermo stop for smoke and tu hem stop for drinkim beer evritaem. Wei for stop kaikai leaf coca nao hard samting for hem bikos hem kaikaim long full laef bilong. Hem gohed for prea and hem winim disfala rabis wei bilong hem. Bihaen hem lusim olketa rabis wei bilong hem, hem baptaes. Hem talem olsem “Distaem, mi klin nao and mi hapi tumas.”
5. Wanem nao iu barava laek for duim?
5 Jehovah hem barava tingim pipol. Hem barava laekem evriwan for repent. (2 Pet. 3:9) Iumi tu laek for garem sem kaen tingting. Iumi mas barava helpem olketa wea laek for lisin for savve long Jehovah and lovem hem olsem iumi.