Iumi Witness Abaotem Jehovah Evritaem
1. Wanem nao iumi lanem from wei wea Jesus witness long datfala woman saed long well?
1 Jesus hem wakabaot for staka hour finis. Hem taed and laek for drink. Taem olketa disaepol bilong hem go for baem kaikai, hem sidaon for rest saed long wanfala well aotsaed long wanfala taon long Samaria. Hem no go long Samaria for preach, bat hem go pas nomoa for go long Galilee for gohed duim ministry. Nomata olsem, hem mekius long chance for witness long wanfala woman wea kam for tekem wata. (John 4:5-14) Why nao olsem? Bikos Jesus hem datfala “faithful and tru witness” bilong Jehovah evritaem. (Rev. 3:14) Iumi savve followim Jesus sapos iumi witness abaotem Jehovah evritaem.—1 Pet. 2:21.
2. Hao nao iumi savve prepare for witness enitaem?
2 Mas Prepare: Iumi savve prepare for witness enitaem long wei for tekem samfala pablikeson. Staka pablisa tekem samfala tract and givim long olketa stoakeeper, pipol wea waka long refilling station, and samfala wea olketa meetim long datfala day. (Eccl. 11:6) Wanfala sista wea savve gogo long olketa difren ples, hem evritaem tekem smol Bible and wanfala Bible Teach buk insaed basket bilong hem, and hem trae for startim story witim olketa wea sidaon klosap long hem.
3. Hao nao iumi savve startim story?
3 Startim Wanfala Story: Taem iumi witness enitaem, iumi no need for stretawe startim story abaotem wanfala Bible kwestin. Taem Jesus story witim datfala woman long well, hem no startim story long wei for sei hem nao Messiah. Hem ask for drink nomoa, wea mekem datfala woman interest for story. (John 4:7-9) Wanfala sista trae for startim story long sem wei olsem Jesus, taem samwan askem hem sapos hem enjoyim holiday. Winim wei for sei hem no celebratem wanfala holiday olsem Christmas or Niu Year bikos hem wanfala Jehovah’s Witness, hem sei olsem: “Miseleva nao disaed for no celebratem.” Datfala man wea askem kwestin bae laek for savve why nao olsem, and datwan givim chance for sista hia witness.
4. Long wanem wei nao Matthew 28:18-20 muvim iu?
4 Nomata ministry bilong Jesus long earth hem finis, hem barava interest long preaching waka for gohed long sem wei wea hem duim bifor. (Matt. 28:18-20) Dastawe, iumi redi for witness and talemaot faith bilong iumi enitaem, olsem Jesus tu duim.—Heb. 10:23.