Waka wea Barava Important
1. Taem iumi tinghae long ministry, wanem nao bae iumi laek for duim?
1 Why nao iumi herem evritaem for iusim taem, strong, and samting wea iumi garem for duim ministry? Bikos no eni waka moa hem important winim diswan! Taem iumi ting raonem samting wea kamaot from ministry, datwan bae mekem iumi laek for duim moa disfala waka wea bae no kamap moa enitaem.—Acts 20:24.
2. Hao nao preaching waka helpem iumi for mekhae long nambawan nem bilong Jehovah?
2 Mekhae Long Nem Bilong Jehovah: Preaching waka hem mekhae long Kingdom bilong Jehovah wea Christ Jesus bae rulim, wea bae changem olketa gavman bilong man and finisim evri problem wea kasem olketa man. (Matt. 6:9, 10) Jehovah nomoa fit for sevem iumi from sik and dae. (Isa. 25:8; 33:24) From iumi garem nem bilong God, pipol wea lukim gudfala wei and strong wea iumi garem for duim ministry, maet datwan mekem olketa praisem God. (1 Pet. 2:12) Iumi hapi tumas for talemaot nem bilong Sovereign Lord Jehovah evriwea long world!—Ps. 83:18.
3. Wanem gud samting nao pipol bae kasem taem olketa herem and followim wanem Bible talem?
3 Sevem Laef: Jehovah “hem no laekem eniwan for dae bat hem laekem evriwan for repent.” (2 Pet. 3:9) Bat sapos no eniwan teachim pipol, hard for olketa savve long tingting bilong Jehovah abaotem olketa fasin wea stret or no stret. (Jonah 4:11; Rom. 10:13-15) Taem pipol lusim nogud wei and followim wanem Bible talem, laef bilong olketa bae kamap gud tumas. (Mic. 4:1-4) And tu, olketa bae garem hope for laef olowe. Taem iumi gohed for preach and teachim pipol, diswan savve sevem laef bilong iumi and olketa wea lisin. (1 Tim. 4:16) Hem nambawan privilege for duim disfala important waka!
4. Why nao iumi shud busy for preach abaotem Kingdom and teachim pipol for kamap disaepol?
4 Klosap nao datfala big trabol bae seknomoa finisim disfala rabis world. Olketa wea worshipim Jehovah nomoa bae stap laef. Dastawe waka for preach and teachim pipol for kamap disaepol hem barava important, and hem savve helpem pipol long disfala taem. Hem gud for mekem disfala waka kamap main samting long laef bilong iumi!—Matt. 6:33.