Wanem Nao Olketa Narawan Savve Lanem Taem Olketa Lukluk Long Iu?
1. Wanem nao olketa disaepol bilong Jesus lanem taem olketa lukim hem duim preaching waka?
1 Jesus sei: “Waka witim mi and lane from mi.” (Matt. 11:29) Hem isi for luksavve hao Jesus teachim pipol, no long toktok nomoa bat long samting wea hem duim. Tingim olketa samting wea olketa disaepol lanem taem olketa lukim samting wea Jesus duim. Hem feel sorre long pipol, hem kaen, and showimaot love. (Matt. 8:1-3; Mark 6:30-34) Hem barava hambol. (John 13:2-5) Taem olketa disaepol go witim Jesus long ministry, olketa luksavve Jesus waka hard for teachim truth long gudfala wei long olketa narawan. (Luke 8:1; 21:37, 38) Taem olketa narawan lukim iumi duim preaching waka, hao nao datwan savve affectim olketa?
2. Taem iumi duim ministry, hao nao gudfala wei and lukluk bilong iumi savve affectim haosholder?
2 Haosholder: Taem iumi werem gudfala kaleko, showimaot gudfala wei, and interest long pipol, datwan savve barava affectim haosholder. (2 Cor. 6:3; Phil. 1:27) Olketa luksavve iumi evritaem iusim Bible. Olketa narawan tinghae long iumi from iumi lisin gud taem olketa story. Iumi mas no ting smol long wei for showimaot gudfala example long olketa samting hia, bikos datwan savve helpem pipol for laek herem message abaotem Kingdom.
3. Hao nao iumi savve encouragem olketa brata and sista long gudfala wei?
3 Olketa Brata and Sista: Tingim, gudfala wei bilong iumi savve affectim tu olketa brata and sista. Wei wea iumi strong for duim ministry savve strongim olketa narawan. Taem iumi redi gud for duim ministry, datwan savve encouragem olketa narawan for kamap gud long wei for preach, olsem iron savve sharpenem iron. (Prov. 27:17) Sapos iumi evritaem faithful for raetem daon olketa wea showimaot interest and for go bak kwiktaem long olketa, datwan savve helpem olketa narawan for duim sem samting. Taem iumi duim gud ministry bilong iumi, datwan savve encouragem tu olketa brata and sista.—2 Tim. 4:5.
4. Why nao samfala taem hem gud for iumi ting raonem olketa wei bilong iumi?
4 Samfala taem hem gud for iumi ting raonem wanem iumi duim and talem, and hao datwan bae affectim olketa narawan. Taem iumi duim olsem, Jehovah bae hapi long iumi, and iumi bae garem sem tingting olsem aposol Paul taem hem sei: “Iufala mas followim wei bilong mi, olsem mi tu followim wei bilong Christ.”—1 Cor. 11:1.