Followim Example wea Jesus Showimaot
1. Wanem example nao Jesus showimaot?
1 Taem iumi share long waka for mekem pipol kamap disaepol, iumi mas tingim hao example bilong iumi savve barava affectim olketa wea lukim iumi. Jesus teachim pipol thru long toktok and samting wea hem duim. Olketa wea lukim hem fit for lukim wei wea hem strong for duim disfala waka, garem love for pipol, tingim nomoa for mekhae long nem bilong Dadi bilong hem, and wei wea hem disaed strong for duim will bilong Dadi bilong hem.—1 Pet. 2:21.
2. Long wanem wei nao example bilong iumi savve affectim olketa wea waka witim iumi long ministry?
2 Taem Iumi Duim Haos–tu–Haos Ministry: Semsem olsem Jesus, example bilong iumi savve affectim olketa wea waka witim iumi. Olketa pablisa wea niu lelebet or no garem bigfala savve wea lukim iumi strong for share long ministry bae ting raonem hao for olketa kamap moabeta long wei wea olketa share long preaching waka. Taem olketa lukim wei wea iumi hapi and barava interest long olketa narawan, bae olketa tingim wei wea hem important for showimaot olketa fasin olsem long ministry bilong olketa. Taem olketa lukim wei wea iumi barava traem best for iusim Bible, for duim olketa return visit, and for conductim olketa Bible study, diswan bae muvim olketa tu for duim sem samting.
3. Long wanem wei nao example bilong iumi teachim olketa Bible student, and wanem nao maet olketa lanem?
3 Taem Iumi Conductim Olketa Bible Study: Olketa Bible student bilong iumi bae barava lukim fasin bilong iumi. Olsem example, maet iumi explainim long olketa why hem important for prepare for study, readim olketa scripture, and andalaenem olketa main point, bat bae olketa laek lukim sapos iumi tu prepare. (Rom. 2:21) Sapos iumi no miss for study witim olketa followim arrangement wea iumi mekem witim olketa, bae olketa luksavve hao datwan hem important and no letem olketa nara samting for stopem wei wea olketa studyim Bible. For sure, bae olketa lukim tu hao iumi willing for sakrifaesim samfala samting mekem iumi garem taem for duim ministry bilong iumi and wei wea iumi garem strongfala faith. Iumi no sapraes hao taem olketa pablisa barava followim example wea Jesus showimaot, olketa student bilong olketa lukim datwan and olketa tu kamap strong for talemaot gud nius.
4. Taem iumi attendim olketa kongregeson meeting, example bilong iumi teachim wanem samting?
4 Taem Iumi Attendim Olketa Kongregeson Meeting: Evriwan wea insaed Christian kongregeson duim part bilong olketa for teach thru long example wea olketa showimaot. Pipol wea interest wea start for attendim olketa meeting kasem gud samting from gudfala example wea olketa lukim insaed kongregeson. Bae olketa lukim wei wea evriwan lovem each other, wei wea olketa garem wan mind, and wei wea kaleko and lukluk bilong olketa hem fitim and showimaot respect. (Ps. 133:1) Bae olketa lukim tu wei wea iumi faithful for attendim olketa kongregeson meeting and wei wea iumi talemaot faith bilong iumi long wei for tekpart long olketa meeting. Long wanfala meeting bilong iumi, wanfala visitor hem lukim wei wea wanfala smol gele fit for kwiktaem faendem wanfala scripture long Bible bilong hem and wei wea hem lisin gud long datfala reading. From example bilong disfala smol gele, man hia ask for samwan studyim Bible witim hem.
5. Why nao iumi mas no ting smol long wei wea example bilong iumi savve barava helpem narawan?
5 Bible encouragem iumi for followim gudfala example bilong narawan. (Phil. 3:17; Heb. 13:7) Dastawe, iumi shud tingim hao sapos iumi barava followim example wea Jesus showimaot, bae nara pipol lukim and hem savve affectim olketa long gudfala wei. From iumi luksavve long diswan, iumi mas barava tingim toktok wea stap long 1 Timothy 4:16 wea hem sei: “Lukluk gud evritaem long iuseleva and teaching bilong iu.”