“Olketa Bae Talemaot Disfala Gud Nius”!
1. Hao nao iumi savve no eni samting savve stopem disfala waka for preach?
1 No eni samting savve stopem Jehovah for duim wanem hem laekem. (Isa. 14:24) Nomata luk olsem Judge Gideon and 300 man bilong hem bae no winim 135,000 Midianite, Jehovah talem Gideon: ‘Iu bae barava sevem Israel from olketa Midianite. Waswe, hem no mi nao sendem iu?’ (Judg. 6:14) Wanem waka nao Jehovah sapotim distaem? Jesus sei: “Olketa bae talemaot disfala gud nius abaotem kingdom long evri ples long world mekem pipol long evri kantri mas herem. Bihaen datwan nao, world bae finis.” (Matt. 24:14) No eniwan bae fit for stopem disfala waka!
2. Why nao iumi savve Jehovah bae helpem iumi wanwan long ministry?
2 Jehovah Helpem Iumi Wanwan: Iumi savve Jehovah bae helpem olketa Witness bilong hem for win, so waswe, Jehovah savve helpem iumi wanwan? Taem aposol Paul kasem hard taem, Jehovah iusim Jesus for strongim Paul. (2 Tim. 4:17) Iumi savve tu Jehovah bae blessim hard waka wea iumi wanwan duim taem iumi duim wanem hem laekem.—1 John 5:14.
3. Jehovah savve helpem iumi taem iumi kasem olketa wanem samting?
3 Waswe, wari and hevi wea kamap evriday mekem iu taed tumas for duim ministry? “Hem givim paoa long man wea taed.” (Isa. 40:29-31) Waswe, iu kasem persecution or pipol againstim iu? “Torowem hevi bilong iu long Jehovah, and hem nao bae strongim iu.” (Ps. 55:22) Waswe, samfala taem iu tingse iu no fit? ‘Iu go, and miseleva nao bae helpem iu for toktok.’ (Ex. 4:11, 12) Waswe, iu no duim staka samting long ministry from iu sik? Jehovah tinghae and savve mekem gud samting kamaot from wanem iu duim nomata hem smol samting.—1 Cor. 3:6, 9.
4. Taem iumi savve Jehovah bae strongim iumi, hao nao datwan helpem iumi?
4 Taem Jehovah ‘mekem plan bilong hem, hu nao bae stopem?’ (Isa. 14:27) From iumi savve Jehovah blessim ministry wea iumi duim, hem gud for iumi gohed and no givap for preach, from ‘Jehovah nao strongim iumi for no fraet.’—Acts 14:3.