Gideon Winim Olketa Midianite

Gogo, olketa Israelite lusim Jehovah moa and start for worshipim olketa false god. For sevenfala year, olketa Midianite stealim animal and spoelem garden blo olketa Israelite. For olketa Midianite no attakim olketa, olketa Israelite haed insaed lo cave and lo olketa maunten. Olketa begim Jehovah for sevem olketa. So Jehovah sendem wanfala angel lo wanfala man wea nem blo hem Gideon. Datfala angel sei: ‘Jehovah chusim iu for kamap strongfala man for faet.’ Gideon ask olsem: ‘Hao nao bae mi sevem Israel? Mi no important nomoa.’

Hao nao Gideon bae savve Jehovah chusim hem? Hem putim samfala wool lo graon and sei lo Jehovah: ‘Lo morning, sapos dew hem fulap lo datfala wool bat graon hem drae, bae mi savve dat iu chusim mi for sevem Israel.’ Early lo next day, datfala wool hem fulap lo wata and graon hem drae! Bat then Gideon askem God moa for lo next morning for God mekem datfala wool hem drae and graon nao for tuwet. Taem datwan happen, Gideon hem sure Jehovah chusim hem. Hem and olketa soldia blo hem go camp for faetem olketa Midianite.

Jehovah talem Gideon: ‘Mi bae helpem olketa Israelite for win. Bat from iu garem staka soldia, if iufala winim datfala faet, maet iufala tingse datwan hem from strong blo iufala seleva. Talem eniwan wea fraet for go bak hom.’ So 22,000 soldia go bak and 10,000 nao stap. Then Jehovah sei: ‘Olketa soldia hia staka yet. Tekem olketa go daon lo wata, and talem olketa for drink. Keepim nomoa olketa soldia wea gohed lukaot for enemy taem olketa drink.’ So 300 man nomoa gohed lukaot taem olketa drink. Jehovah promis dat 300 man hia nomoa bae faet and winim 135,000 Midianite soldia.

Lo datfala naet, Jehovah talem Gideon: ‘Attakim camp blo olketa Midianite!’ Gideon givim olketa horn and olketa bigfala jar witim olketa stik wea laet for olketa man blo hem. Hem talem olketa: ‘Luk followim mi, and duim sem samting mi duim.’ Gideon blowim horn blo hem, smasem jar blo hem, holem stik wea laet, and hem singaot: ‘Sword blo Jehovah and blo Gideon!’ Thri handred man blo hem tu duim sem samting. Olketa Midianite fraet fogud and ran olobaot. Lo datfala taem, olketa start for attakim each other. Jehovah helpem olketa Israelite moa for winim enemy blo olketa.